Poluŋuu Ɛsɔ tɛɛ tataa nɛ ɛsɔdaa yɔ
9
1 Kajalaɣ *nɔɔ haʋ kɛwɛnɩ paɣtʋ ndɩ ndɩ ɛzɩma mbʋ poluŋuu Ɛsɔ tɛɛ ɛ-ɖɩɣa taa tataa cɩnɛ yɔ pʋ-yɔɔ. 2 Paasiɣ ka-taa kɩɖanɖʋʋ nakʋyʋ nɛ patayɩ-kʋ hɔɔlɩŋ naalɛ: payaɣ kajalaɣ ñɩŋgʋ se lone kaɖɛ ñɩnɖɛ. Paasɩ peeye mbʋ pʋ-yɔɔ pasɩɣ kanɖʋnaa yɔ nɛ taabɩlɩ. Kʋ-yɔɔ wɛ tɔɔnaɣ ŋga paha Ɛsɔ yɔ. 3 Lone kaɖɛ ñɩnɖɛ nɖɩ ɖɩ-wayɩ lɛ, patasɩ pɩsaʋ ɖɩɣʋ. Kʋ-wayɩ lone nɖɩ payaɣ se lone nɖɩ ɖɩkɩlɩ kaɖɛ yɔ ɖɩwɛɛ. 4 Peeye tɩlaaɖɩnaa ɖɩhɔɖɛ nɖɩ palabɩnɩ ñɩɣlɩm yɔ ɖɩwɛɛ. Nɔɔ haʋ aɖakaɣ ŋga pohuuzi katɩŋa payɩ ñɩɣlɩm yɔ, kɛwɛ peeye ɖɔɖɔ. Ka-taa wɛ ñɩɣlɩm pɛʋ ŋgʋ paɖʋ kɩ-taa tɔɔnaɣ ŋga kalɩnɩ ɛsɔdaa nɛ payaɣ-kɛ se maanɩ yɔ. *Aarɔɔnɩ ɖaʋ ŋgʋ kɩɩlɩzɩ hatʋ yɔ nɛ pɩtaahɛlɛnzɩ nzɩ paama sɩ-yɔɔ Ɛsɔ paɣtʋ yɔ, pɛwɛ peeye ɖɔɖɔ.ILLUSTRATION 27
5 Pasɩ Ɛsɔ tiyiyaa lɛzɩŋ sɩʋ kpelisi naalɛ nasɩyɩ aɖakaɣ ŋga kɔ-yɔɔ nɛ pɩwɩlɩɣ se Ɛsɔ wɛ peeye. Si-keŋ huuzi lone nɖɩ ɖɩ-taa pamɩzɩɣ calɩm Ɛsɔ ɛsɩndaa se ekpeɣ ɛyaa pa-kɩwɛɛkɩm yɔ, ɖɩ-yɔɔ. Tɔm sakɩyɛ wɛɛ se mɔyɔɔdʋʋ pʋ-yɔɔ, ɛlɛ, pɩtɛkɛ lɛɛlɛɛyɔ pʋwɛɛ se mantazɩ tɩtɩŋa tɩ-taa.
6 Paañɔɔzɩ pɩtɩŋa payɩ mbʋ nɛ pasɩɩ nɛ piyele cɔjɔnaa ñasʋʋ paa kɩyakʋ ŋgʋ kɩɖanɖʋʋ kajalaɣ hɔɔlʋʋ taa se pala pa-tʋmɩyɛ. 7 Ɛlɛ, cɔjɔnaa ñʋʋ tʋ ɖeke sʋwaɣnɩ kɩɖanɖʋʋ hɔɔlʋʋ naalɛ ñɩŋgʋ taa tɔm kʋɖʋm pɩnaɣ taa. Pʋwɛɛ se ewoni kpɩna wena ɛhaɣ Ɛsɔ yɔ a-calɩm ɛ-maɣmaɣ ɛ-kɩwɛɛkɩm nɛ mbʋ lɛlaa laba nɛ patatɩlɩ yɔ pʋ-yɔɔ. 8 Mbʋ Ɛsɔ Kalɩzaɣ wɩlaa se: alɩwaatʋ ndʋ Ɛsɔ kɩɖanɖʋʋ kajalaɣ hɔɔlʋʋ wɛɣ yɔ, nɔɔyʋ ɛɛpɩzɩɣ ɛsʋʋ lone nɖɩ ɖɩkɩlɩ kaɖɛ yɔ ɖɩ-taa. 9 Mbʋ wɩlɩɣnɩ alɩwaatʋ ndʋ ɖɩwɛ tɩ-taa lɛɛlɛɛyɔ yɔ. Pʋ-tɔbʋʋ se haɖɛ nɛ kpɩna wena palaɣ Ɛsɔ yɔ, paapɩsɩɣ mba palakɩ kʋjɔŋ ɩnʋ yɔ kʋtʋʋzaa Ɛsɔ ɛsɩndaa. 10 Pɩtɩŋa payɩ pɩkɛnɩ paɣtʋ yem. Tomnaɣ yɔɔ paɖʋ-tʋ: paɖʋ-tʋ tɔɔnasɩ nɛ sʋlʋm nɛ cɩɖɩcɩɖɩ wɛtʋ sɔnzɩ ndɩ ndɩ pɔ-yɔɔ, nɛ tɩwɛnɩ ɖoŋ nɛ pʋkɔɔ pɩsɩnɩ alɩwaatʋ ndʋ Ɛsɔ lɛɣzɩ pɩtɩŋa payɩ yɔ.
11 Ɛlɛ, Krɩstʋ ñɔkɔm se ɛkɛ ñɩm mbʋ pʋwɛ lɛɛlɛɛyɔ yɔ pʋ-cɔjɔnaa ñʋʋ tʋ. Kɩɖanɖʋʋ ŋgʋ ɛlakɩ ɛ-tʋmɩyɛ kɩ-tɛɛ yɔ, ŋgʋ kɩlɩnɩ wazaɣ nɛ kʋmʋna kpem. Pɩtɛkɛ ɛyaa siɣni-kʋ. Pʋ-tɔbʋʋ se kɩtɛkɛ kedeŋa kanɛ kɔ-yɔɔ pʋyʋ. 12 Krɩstʋ sʋ kpaagbaa sʋʋ lone nɖɩ ɖɩkɩlɩ kaɖɛ yɔ ɖɩ-taa. Ɛsʋwaɣ lɛ, ɛtɛkpɛndɩnɩ tuluŋ nɛ neɣna pa-calɩm. Ɛlɛ, ɛ-maɣmaɣ ɛ-calɩm ɛsʋnaa. Mbʋ ɛlaba nɛ ɖihiɣ ñʋʋ yabʋ pɩɩtɛŋ. 13 Sɔnzɩ taa lɛ, paɖʋwa se ye nɔɔyʋ ɛlabɩ kɩwɛɛkɩm yɔ, pʋwɛɛ se pataa-ɩ tuluŋ nɛ naŋ abalaa pa-calɩm nɛ nɔ halɩñɩnʋ weyi paɖʋ-ɩ miŋ nɛ ɛñaɣ yɔ ɛ-tɔlɩma nɛ ɛpɩsɩ cɩɖɩcɩɖɩ tʋ. 14 Ye mbʋ pʋwɛɛ lɛ, ɛzɩma Krɩstʋ calɩm mbʋ pɩkɩlɩ ɖoŋ yɔ, pɩɩpɩzɩɣ pɩñalɩ ɛyaa kɩwɛɛkɩm! Kalɩzaɣ ŋga kɛwɛ tam yɔɔ yɔ, kɔ-yɔɔ pɩtɩŋnaa nɛ ɛha ɛ-maɣmaɣ ɛ-tɩ Ɛsɔ se palaa-ɩ nɛ pɩkɛnɩ kɩlaʋ kɩbaŋgʋ siŋŋ. Kɩlaʋ ŋgʋ kɩñalɩɣnɩ lakasɩ nzɩ sɩɩwazɩɣ pʋyʋ yɔ ɖa-taa se ɖɩpɩzɩ ɖɩla Ɛsɔ wezuu tʋ tʋmɩyɛ.
15 Pʋ-yɔɔ Krɩstʋ kɛ ceyiyu *nɔɔ haʋ kɩfam mbʋ pʋwɛ Ɛsɔ nɛ ɛyaa pɛ-hɛkʋ taa yɔ pɩ-taa. Ɛlabɩ mbʋ se mba Ɛsɔ ya-wɛ se pɛkɛ ɛ-ñɩma yɔ, papɩzɩ pehiɣ ñɩm pɩɩtɛŋ mbʋ ɛɖʋwa se ɛhaɣ-wɛ yɔ. Krɩstʋ ɛnʋ, ɛ-sɩm yɔɔ pɩtɩŋnaa nɛ pehiɣ-pʋ. Mbʋ ɖɔɖɔ lɩzɩnɩ-wɛ kɩwɛɛkɩm mbʋ paalabɩ alɩwaatʋ ndʋ paawɛ kajalaɣ nɔɔ haʋ paɣtʋ tɛɛ yɔ pi-nesi taa.
16 Ye nɔɔyʋ ɛɖʋwa se ñakaɣnɩ kpaɣʋ ɛ-ñɩm ɛ-sɩm wayɩ yɔ, pʋmʋnaa se ŋna siŋŋ se ɛsɩba nɛ pʋcɔ. 17 Toovenim lɛ, mbʋ ɛɖʋwa yɔ, pɩfɛyɩ wazaɣ alɩwaatʋ ndʋ ɛwɛnɩ ɛ-ɛza yɔ. Ɛlɛ, ɛ-sɩm wayɩ pʋwɛɣ wazaɣ. 18 Mbʋ ɖɔɖɔ pʋwɛɛ: pʋwɛɛ se palaa nɛ pɛkpɛdɩ calɩm nɛ pʋcɔ kajalaɣ *nɔɔ haʋ maɣmaɣ wɛɛ wazaɣ. 19 Alɩwaatʋ ndʋ lɛ, *Mooyiizi calɩ kalʋʋ paɣtʋ tɩŋa payɩ ɛyaa tɩŋa ɛsɩndaa ɛzɩ paɖʋʋ tɩ-taa yɔ. Nabʋlɛ ɖeɖe lɛ, ɛkpaɣ neɣna nɛ tuluŋ pa-calɩm nɛ lɩm nɛ esidi. Ɛkpaɣ ɖɔɖɔ kpɛm kɩsɛmɩm nɛ ñɩyʋʋ ŋgʋ payaɣ se iizoopu yɔ nɛ eliɣ nɛ ɛmɩzɩɣ paɣtʋ takayaɣ nɛ ɛyaa tɩŋa pɔ-yɔɔ. 20 Ɛmɩzaa lɛ, ɛtɔ se: “Calɩm pʋnɛ pɩwɩlɩɣnɩ nɔɔ haʋ mbʋ Ɛsɔ ɖʋ mɩ nɛ ɩ mɩ-hɛkʋ taa se ɩɖɔ pʋ-yɔɔ yɔ.” 21 Ɖɔɖɔ lɛ, ɛmɩzɩ Ɛsɔ kɩɖanɖʋʋ nɛ wondu ndʋ tɩtɩŋa payɩ palakɩnɩ tʋmɩyɛ alɩwaatʋ ndʋ poluŋuu ɛ-tɛɛ yɔ pɔ-yɔɔ calɩm. 22 Paɖʋ paɣtʋ taa se calɩm ñalɩɣ wondu sakɩyɛ nɛ tɩwɛɛ cɩɖɩcɩɖɩ. Calɩm ɛtɛkpɛdɩ yɔ, kpeɣu ɛɛwɛɣ.
Krɩstʋ calɩm ñalʋʋ kɩwɛɛkɩm yɔ
23 Ye mbʋ, mbʋ pʋwɛɛ se pañalɩ mbʋ pɩwɩlɩɣ ɛzɩma mbʋ pɩlakɩ ɛsɔdaa yɔ nɛ pʋwɛɛ cɩɖɩcɩɖɩ. Ɛlɛ, mbʋ pʋwɛ ɛsɔdaa yɔ, pʋpɔzʋʋ-pʋ kɩlaŋ weyi ɩkɩlɩ mbʋ yɔ. 24 Mbʋ pʋyɔɔ yɔ, Krɩstʋ tasʋʋ kɩɖanɖʋʋ ŋgʋ ɛyaa siɣaa yɔ kɩ-tɛɛ. Ŋgʋ lɛ ɛsɔdaa ñɩŋgʋ lɛzʋʋ. Ɛlɛ, ɛkpa ɛsɔdaa maɣmaɣ se ewolo Ɛsɔ cɔlɔ lɛɛlɛɛyɔ nɛ ɖɔ-nɔɔ. 25 Ɛtasʋʋ kɩ-tɛɛ se ɛlaa ɛ-tɩ tɔm sakɩyɛ ɛzɩ cɔjɔnaa ñʋʋ tʋ kpɛndʋʋnɩ kpɩnɛ calɩm paa pɩnaɣ ŋga nɛ ɛsʋʋ yɔ. 26 Ye mbʋ pɩɩwɛɛ yɔ, ɖooo ɛzɩ palabʋ kedeŋa yɔ, Krɩstʋ kalabɩ kʋñɔŋ tɔm sakɩyɛ. Toovenim lɛ, lɛɛlɛɛyɔ ɛlɩ kpaagbaa lɩʋ kɛtɛzaɣ alɩwaatʋ tʋnɛ tɩ-taa se ɛha ɛ-tɩ nɛ palaa-ɩ nɛ Ɛsɔ hɛzɩ ɛyaa kɩwɛɛkɩm. 27 Pʋwɛɛ se paa weyi ɛsɩ tɔm kʋɖʋm koŋ nɛ pʋwayɩ lɛ, Ɛsɔ hʋnɩ-ɩ tɔm. 28 Mbʋ ɖɔɖɔ Krɩstʋ ha ɛ-tɩ kpaagbaa haʋ se palaa-ɩ nɛ Ɛsɔ kpeɣ ɛyaa sakɩyɛ pa-kɩwɛɛkɩm. Pʋ-yɔɔ lɛ, ɛkɔŋʋʋ nabʋlɛ ɖeɖe yɔ, kɩwɛɛkɩm tɔm ɛɛtasɩɣ wɛʋ. Ɛlɛ, ɛkɔŋ se ɛya mba paɖaŋ-ɩ kpam yɔ pa-ñʋʋ.