Mɛlkisedɛɛkɩ tɔm
7
1 *Mɛlkisedɛɛkɩ ɛnʋ, ɛɛkɛ Saalɛm wiyaʋ nɛ ɛtɛ ɛkɛ Ɛsɔ Caabiyuu cɔjɔ. *Abraham lɩnɩ awiya naayɛ ɖɩwaɖɛ nɛ ɛkɔŋ lɛ, Mɛlkisedɛɛkɩ katɩ-ɩ nɛ ɛwazɩ Abraham ɛnʋ ɛ-yɔɔ. 2 Peeye ɛlɛ tayɩ ɛ-ñɩm tɩŋa tɔm hiu nɛ ɛcɛlɩ-ɩ pʋ-hɔɔlʋʋ kʋɖʋmʋʋ. Mɛlkisedɛɛkɩ tɔbʋʋ se: “Toovenim wiyaʋ.” Ɖɔɖɔ lɛ, ɛkɛ Saalɛm wiyaʋ. Pʋbʋ tɔbʋʋ se: “Laŋhɛzɩyɛ wiyaʋ.” 3 Ɛfɛyɩnɩ caa yaa ɖoo yaa liɖe. Pɔtɔyɔɔdɩ ɛ-lʋlʋʋ yaa ɛ-sɩm tɔm ɖoli. Ɛnɩɣzɩnɩ Ɛsɔ Pɩyalʋ nɛ ɛkɛ cɔjɔ tam yɔɔ.
4 Ɩcɔnɩ ɩna ɛzɩma mbʋ ɛkɩlaa kpem yɔ! Ɖɔ-cɔzɔ *Abraham maɣmaɣ hiɣ ñɩm mbʋ you taa yɔ, ɛtayɩ-pʋ tɔm hiu nɛ ɛkpaɣ pʋ-hɔɔlʋʋ kʋɖʋmʋʋ nɛ ɛha-ɩ. 5 *Leevi liɖe taa ñɩma mba pɛkɛɣ cɔjɔnaa yɔ, Ɛsɔ kaɖʋ-wɛ paɣtʋ natʋyʋ. Ndʋ lɛ se pɔpɔzɩ *Izrɛɛlɩ ñɩma lɛlaa se patayɩ pa-ñɩm tɔm hiu nɛ pakpaɣ pʋ-hɔɔlʋʋ kʋɖʋmʋʋ nɛ pɛcɛlɩ-wɛ. Palakaɣ mbʋ, ŋgʋ paba ɖɔɖɔ kɛ Abraham liɖe taa ñɩma. 6 *Mɛlkisedɛɛkɩ ɛnʋ, ɛtaakɛ Leevi liɖe taa tʋ. Paa mbʋ yɔ, Abraham tayɩ ɛ-ñɩm tɔm hiu nɛ ɛkpaɣ pʋ-hɔɔlʋʋ kʋɖʋmʋʋ nɛ ɛcɛlɩ-ɩ nɛ ɛlɛ wazɩ ɛ-yɔɔ. Ŋgʋ Abraham ɛnʋ, Ɛsɔ kɛtɛm ɖʋʋ se ɛlakɩ-ɩ pʋyʋ. 7 Ŋgʋ, paa weyi ɛsɩm mbʋ se sɔsɔ wazɩɣnɩ pɩɣa yɔɔ. 8 Leevi piya mba Izrɛɛlɩ ñɩma tayɩɣ pa-ñɩm tɔm hiu nɛ pɛcɛlɩɣ-wɛ pʋ-hɔɔlʋʋ kʋɖʋmʋʋ yɔ, pasɩkɩ ɖɔɖɔ ɛzɩ ɛyaa lɛlaa yɔ. Piyele Mɛlkisedɛɛkɩ yɔ, ɛ-tɔm pama Ɛsɔtɔm Takayaɣ taa se ɛwɛ wezuu. 9 Pɩtɛ, papɩzɩɣ pɔtɔ se Abraham katayʋʋ ɛ-ñɩm nɛ ɛha Mɛlkisedɛɛkɩ yɔ, Leevi weyi e-liɖe taa ñɩma Izrɛɛlɩ ñɩma tayɩɣ pa-ñɩm nɛ pɛcɛlɩɣ-wɛ yɔ, ɛlɛ kahawa ɖɔɖɔ. 10 Mbʋ pʋyɔɔ yɔ, paa pataalʋlɩdɩ-ɩ yɔ, ɛɛwɛ Abraham calɩm taa alɩwaatʋ ndʋ Mɛlkisedɛɛkɩ katɩ-ɩ yɔ.
11 Ɛsɔ ɖʋ *Izrɛɛlɩ ñɩma paɣtʋ se pala pɩtɩŋa ɛzɩ pʋmʋnaʋ yɔ. Ŋgʋ, ye *Leevi liɖe taa ñɩma ɛɛlabɩ mbʋ yɔ, pɩtaapɔzɩ ɖɔɖɔ se cɔjɔ nɔɔyʋ ɛtasɩ lɩʋ ɛzɩ *Mɛlkisedɛɛkɩ yɔ nɛ ɛtalɩnɩ *Aarɔɔnɩ liɖe taa. 12 Mbʋ pʋyɔɔ yɔ, ye pɛlɛɣzɩ cɔjɔnaa liɖe yɔ, pʋwɛɛ se pɛlɛɣzɩ ɖɔɖɔ paɣtʋ. 13 Ɖa-Kɩpaɣlʋ weyi pɔyɔɔdʋʋ ɛ-tɔm cɩnɛ yɔ, e-cejewiye kɛwɛnɩ ndɩ. Ɖɩ-taa tʋ nɔɔyʋ taalakɩ cɔjɔtʋ tʋmɩyɛ tɩlaaɖɩnaa ɖɩhɔɖɛ kaʋ. 14 Mbʋ pʋyɔɔ yɔ, ɖɩsɩm ɖeu se ɖa-Kɩpaɣlʋ kɛ Yuda liɖe taa tʋ. *Mooyiizi tɔyɔɔdɩ pe-cejewiye taa cɔjɔnaa tɔm natʋyʋ alɩwaatʋ ndʋ ɛyɔɔdaɣ cɔjɔnaa tɔm yɔ.
15 Lɛɛlɛɛyɔ ɖɩnɩɣ tɔm ndʋ pɔyɔɔdaa yɔ tɩ-taa camɩyɛ: ndʋ lɛ se cɔjɔ lɛlʋ weyi ɛnɩɣzɩnɩ *Mɛlkisedɛɛkɩ yɔ, ɛlɩwa. 16 Pɩtɛkɛ paɣtʋ ndʋ ɛyaa ɖʋwa yɔ tɩhanɩ-ɩ waɖɛ se ɛpɩsɩ cɔjɔ. Ɛlɛ, wezuu ŋgʋ kɩfɛyɩ tɩnaɣ yɔ, ku-ɖoŋ taa ɛkɛ mbʋ. 17 Mbʋ pʋyɔɔ yɔ, pama ɛ-tɔm Ɛsɔtɔm Takayaɣ taa se:
“Ŋkɛɣ cɔjɔ tam yɔɔ ɛzɩ Mɛlkisedɛɛkɩ yɔ.”
18 Mbʋ peyebi paɣtʋ kɩbɩndʋ se tɩfɛyɩ ɖoŋ, tɩɩwazɩɣ pʋyʋ. 19 Toovenim lɛ, *Mooyiizi paɣtʋ teɖezi nabʋyʋ Ɛsɔ ɛsɩndaa. Ɛlɛ, Ɛsɔ lɛɣzɩ tu-lone taa liu taʋ mbʋ pɩkɩlɩ-tʋ ɖeu siŋŋ yɔ. Mbʋ haɣnɩ-ɖʋ waɖɛ se ɖɩñɔtɩnɩ-ɩ.
20 Yesu cɔjɔtʋ wɛ ndɩ nɛ lɛlaa ñɩndʋ. Mbʋ pʋyɔɔ yɔ, Ɛsɔ ɖuwaa nɛ pʋcɔ ɛkɛ cɔjɔ. Piyele lɛlaa yɔ, etoɖuu. 21 Yesu tɔm taa lɛ, ɛɛtɔm se:
“Ma Kɩpaɣlʋ monɖuwaa se:
‘ŋkɛɣ cɔjɔ tam yɔɔ.’
Maalɛɣzɩɣ-pʋ kaʋ.”
22 Pʋ-yɔɔ Yesu pɩsɩ *nɔɔ haʋ mbʋ pɩkɩlɩ ɖeu yɔ pʋ-yʋsaɣ.
23 Ɖɔɖɔ lɛ, cɔjɔnaa lɛlaa ñaaɖɔ sakɩyɛ, mbʋ pʋyɔɔ yɔ, sɩm tahaɣ-wɛ waɖɛ se pala pa-tʋmɩyɛ tam yɔɔ. 24 Ɛlɛ, Yesu ñɛwɛ wezuu tam yɔɔ. Pɩɩpɔzʋʋ se pɛcɛlɩ nɔɔyʋ ɛ-cɔjɔtʋ tʋmɩyɛ. 25 Pʋ-yɔɔ ɛpɩzɩɣ ɛya mba patɩŋɩɣnɩ ɛ-yɔɔ nɛ pañɩnɩɣ Ɛsɔ yɔ pa-ñʋʋ kpem. Mbʋ pʋyɔɔ yɔ, ɛwɛ wezuu tam yɔɔ nɛ etendiɣ Ɛsɔ pɔ-yɔɔ.
26 Toovenim lɛ, Yesu lɛ *cɔjɔ *sɔsɔ weyi pʋmʋnaa se ɖɩwɛna yɔ: ɛwɛ cɩɖɩcɩɖɩ, paanaɣ ndʋ paawanɩ-ɩ yɔ, ɛtala kɩwɛɛkɩm nabʋyʋ. Ɛ nɛ kɩwɛɛkɩm laɖaa pɛfɛyɩ ɖoli kʋɖʋm, ɛwɛ ɖooo ɛsɔdaa. 27 Ɛfɛyɩ ɛzɩ cɔjɔnaa ñʋŋ tɩnaa lɛlaa yɔ. Mbʋ pʋyɔɔ yɔ, pʋpɔzʋʋ se palaɣ Ɛsɔ kɩyakɩŋ tɩŋa. Kajalaɣ lɛ, palaɣ pa-maɣmaɣ pa-kɩwɛɛkɩm yɔɔ. Pʋwayɩ lɛ, palaa ɛyaa tɩŋa ñɩmbʋ yɔɔ. Piyele Yesu lɛ, tɔm kʋɖʋm koŋ ɛla alɩwaatʋ ndʋ ɛkpaɣ ɛ-maɣmaɣ ɛ-tɩ nɛ ɛha ɛyaa kɩwɛɛkɩm yɔɔ yɔ. 28 Mba *Mooyiizi paɣtʋ kapɩsɩ-wɛ cɔjɔnaa ñʋŋ tɩnaa yɔ, paawɛnɩ ɛjandʋ ɖɔɖɔ ɛzɩ ɛyaa lɛlaa yɔ. Ɛlɛ, ɖuuu mbʋ Ɛsɔ ñaaɖuu paɣtʋ wayɩ yɔ, pɩpɩsɩ ɛ-Pɩyalʋ kʋtʋʋzʋ cɔjɔnaa ñʋʋ tʋ tam yɔɔ.