Ñʋʋ yabʋ siŋŋ tɔm
2
1 Pʋ-yɔɔ pʋwɛɛ se ɖɛ-ɛzɩyɛ ɛsɛnɩ tɔm ndʋ ɖɩnɩwa yɔ nɛ pɩkɩlɩ ɛzɩ pɩtɩɩ yɔ nɛ ɖɩtaakɔɔ ɖile nʋmɔʋ. 2 Mbʋ pʋyɔɔ yɔ, tɔm ndʋ Ɛsɔ tiyiyaa yɔɔdaa yɔ tɩwɛ wazaɣ siŋŋ. Mba patɩŋa payɩ pɔtɔɖɔ tɩ-yɔɔ yaa patañam-tʋ yɔ, Ɛsɔ hɔm pa-nɩŋgbaaŋ ɛzɩ pʋmʋnaʋ yɔ. 3 Ye mbʋ pʋwɛɛ lɛ, ɛzɩma ɖa ɖapɩzɩɣ ɖɩlɩɩ pɩ-taa alɩwaatʋ ndʋ ɖɩtakpaɣ ñʋʋ yabʋ siŋŋ tɔm tʋnɛ nɛ ɖɩyaa pʋyʋ yɔ? Kɩpaɣlʋ Yesu calɩnɩ pʋ-tɔm yɔɔdʋʋ nɛ mba panɩ-tʋ yɔ, paɖaɣnɩ-ɖʋ-tʋ heyuu se tɩkɛ toovenim. 4 Ɛsɔ ñatɩŋnɩ kawɩlɩsɩ nɛ hama lakasɩ ndɩ ndɩ pɔ-yɔɔ nɛ ɛwɩlɩ se tɔm ndʋ pɔyɔɔdaa yɔ, tɩkɛ toovenim. Ɖɔɖɔ lɛ, ɛtayɩ-wɛ ɛ-Kalɩzaɣ haɖɛ ɛzɩ ɛ-maɣmaɣ e-liu wɛʋ yɔ.
Weyi ɛyakɩ ɛyaa ñʋʋ yɔ
5 Toovenim lɛ, Ɛsɔ taha e-*tiyiyaa waɖɛ se pɔcɔnɩ kedeŋa ŋga kakaɣ kɔm yɔ kɔ-yɔɔ. Kɔ-tɔm ɖɩɖɔŋ yɔɔdʋʋ. 6 Ɛlɛ, nɔɔyʋ lɩzɩ aseɣɖe Ɛsɔtɔm Takayaɣ hɔɔlʋʋ nakʋyʋ taa se:
“Anɩ ɛyʋ nɛ pʋwɛɛ se ŋtɔzɩ ɛ-yɔɔ?
Anɩ ɛyʋ kpem nɛ pʋwɛɛ se ŋcɔnɩ ɛ-yɔɔ?
7 Ŋyeba nɛ ñe-tiyiyaa kɩlɩ-ɩ alɩwaatʋ pazɩ.
Ɛlɛ, ŋpam-ɩ koboyaɣ hulaɣ nɛ ŋɖʋ-ɩ hɩɖɛ.
8 Ŋkpaɣ pɩtɩŋa payɩ nɛ ŋɖʋzɩ e-nesi taa.”
Ye pɔtɔm se Ɛsɔ ɖʋzɩ pɩtɩŋa payɩ e-nesi taa yɔ, pɩwɩlɩɣ se nabʋyʋ takazɩ se pɩfɛyɩ ɛ-tɛɛ. Ŋgʋ lɛɛlɛɛyɔ, ɖɩnaɣ se pɩtɛkɛ pɩtɩŋa pʋwɛnɩ e-nesi taa. 9 Ɛlɛ, Ɛsɔ yeba nɛ Yesu luzi ɛ-tɩ Ɛsɔ ɛnʋ e-*tiyiyaa tɛɛ alɩwaatʋ pazɩ. Ɛlabɩ mbʋ se pɩtɩŋnɩ e-lootiye yɔɔ nɛ Yesu sɩ ɛyaa tɩŋa payɩ yɔɔ. Ɛnʋ ɖɩnaɣ lɛɛlɛɛyɔ, Ɛsɔ pam-ɩ koboyaɣ hulaɣ nɛ ɛɖʋ-ɩ hɩɖɛ sɩm mbʋ ɛlabɩ kʋñɔŋ nɛ ɛsɩ yɔ pʋ-yɔɔ.
10 Toovenim lɛ, Ɛsɔ labɩnɩ pɩtɩŋa payɩ nɛ pʋwɛɛ e-nesi taa. Yesu lɛ weyi ɛpazɩ ñʋʋ yabʋ tʋmɩyɛ yɔ. Pʋ-yɔɔ lɛ, pɩɩmʋnɩ mbʋ se ɛla kʋñɔŋ nɛ pʋcɔ ɛsʋʋ e-koboyaɣ taa. Ɛlabɩ mbʋ se ɛyaa sakɩyɛ ɛsʋʋ ka-taa ɖɔɖɔ. 11 Mbʋ pʋyɔɔ yɔ, ɛnʋ Yesu weyi ɛñalɩɣ ɛyaa kɩwɛɛkɩm yɔ nɛ mba ɛñalɩɣ-wɛ-pʋ yɔ, patɩŋa payɩ pa nɛ ɩ pa-Caa kʋɖʋm. Pʋ-yɔɔ fɛyɛ ɛɛkpaɣ-ɩ se ɛyaa-wɛ se ɛ-ñɩma. 12 Halɩ ɛtɔm se:
“Hayɩ Ɛsɔ! Mankaɣ heyuu ma-ñɩma ñɔ-tɔm.
Mankaɣ-ŋ sam alɩwaatʋ ndʋ pekpeɣliɣ se pasam-ŋ yɔ.”
13 Ɛtasɩ yɔɔdʋʋ se:
“Mɔnkɔŋ Ɛsɔ taʋ liu.”
Ɛtasɩ ɖɔɖɔ se:
“Ɩna ma nɛ ɛyaa mba Ɛsɔ cɛlɩ-m yɔ!”
14 Ye mbʋ, ɛzɩma mbʋ ɛyaa mba pɛkɛ kedeŋa yɔɔ cɩnɛ ñɩma yɔ, mbʋ ɖɔɖɔ Yesu ɛnʋ ɛ-maɣmaɣ ɛkɔm ɛzɩ ɛyʋ yɔ nɛ ɛkɔɔ ɛsɩ. Ɛlabɩ mbʋ se ɛpɩsɩ weyi ɛɛɖɔkɩ sɩm ɖoŋ yɔ ɛjam: ɛnʋ lɛ *Kañadʋ Satanɩ. 15 Mbʋ ɛlaba nɛ eholi mba peseɣaɣ sɩm alɩwaatʋ kpeekpe pe-wezuu caɣʋ taa nɛ pɛwɛɛ ɛzɩ yomaa yɔ. 16 Toovenim lɛ, pɩtɛkɛ Ɛsɔ tiyiyaa Yesu sɩŋna. Ɛlɛ, Abraham liɖe taa ñɩma ɛsɩŋna. 17 Pʋ-yɔɔ pɩɩkɛnɩ-ɩ kɩcɛyʋʋ se ɛpɩsɩ ɛ-tɩ kpem ɛzɩ ɛ-ñɩma yɔ pɩtɩŋa pɩ-taa. Ɛlabɩ mbʋ se ɛpɩsɩ *cɔjɔ *sɔsɔ weyi ɛnaɣ pa-pʋtɔdɩyɛ nɛ ɛlakɩ Ɛsɔ tʋmɩyɛ camɩyɛ se ɛlɛ ekpeɣ ɛyaa pa-kɩwɛɛkɩm yɔ. 18 Ɛ-maɣmaɣ ɛlabɩ kʋñɔŋ alɩwaatʋ ndʋ pɩtakɩ-ɩ yɔ. Pʋ-yɔɔ ɛpɩzɩɣ ɛsɩnɩ mba pɩtakɩɣ-wɛ yɔ.