2
1 Mancaɣ se ɩna lʋbɩyɛ sɔsɔɖɛ nɖɩ mɛwɛɛ malʋkɩ mɩ nɛ Laodisee ñɩma nɛ mba patɩŋa payɩ patatɩɩnadɩ ma Pɔɔlɩ mɛ-ɛsɩndaa yɔ mɩ-yɔɔ yɔ. 2 Malʋkɩ mbʋ se pɩlabɩ-wɛ hʋnʋm nɛ pɔsɔɔlɩ ɖama camɩyɛ nɛ papɩsɩ ɛyʋ kʋɖʋm nɛ piyele pɛtɛzɩ wɛnaʋ lɛɣtʋ. Pʋbʋ, patɩlɩɣ mbʋ Ɛsɔ kɛmɛsaa yɔ: mbʋ lɛ Krɩstʋ. 3 Ɛ-cɔlɔ Ɛsɔ lɔŋsɩnɖɛ nɛ ɛ-lɛɣtʋ pa-ñɩm tɩŋa payɩ wɛ mɛsaɣ tɛɛ. 4 Meheyiɣ-mɩ mbʋ se nɔɔyʋ ɛtaakɔɔ ɛcɛtɩ-mɩ nɛ ɛ-nɔɔ leleŋ. 5 Paa mɛnfɛyɩ mɩ-hɛkʋ taa yɔ, mɛwɛɛ mamaɣzɩɣ mɩ-yɔɔ. Man-taa hʋlʋmaa, mbʋ pʋyɔɔ yɔ, manaɣ ɛzɩma mbʋ ɩwɛɛ ɩlakɩ ɛzɩ pʋmʋnaʋ yɔ nɛ ɩɖɔkʋʋ mɩ-tɩ siŋŋ mi-lidaʋ ŋgʋ ɩwɛnɩ Krɩstʋ yɔɔ yɔ kɩ-taa yɔ.
Pɩtɩŋnaʋ *kaamaŋkaɣ yɔɔ nɛ Krɩstʋ wa pɩtɩŋa payɩ yɔ
6 Pʋ-yɔɔ lɛ, ɖenɖe itisaa se Krɩstʋ Yesu lɛ Kɩpaɣlʋ yɔ, ɩcaɣ wezuu mɩ nɛ ɩ mɩ-kpɛndʋʋ taa. 7 Ɩka lila ɛ-yɔɔ nɛ ɩpaɣlɩ nɛ ɩtɛzɩ pɩʋ mi-lidaʋ wɛnaʋ taa ɛzɩ pawɩlʋʋ-mɩ yɔ. Ɖɔɖɔ lɛ, ɩsam-ɩ siŋŋ. 8 Ɩkpa mɩ-tɩ ɖeu nɛ nabɛyɛ ɛtaacɛtɩ-mɩ nɛ pa-maɣmaɣ pɔ-lɔŋsɩnɖɛ tɔm. Cɛtɩm tɔm ndʋ, tɩɩwazɩɣ pʋyʋ. Ɛyaa sɔnzɩ nɛ kedeŋa yɔɔ cɩnɛ ɖoŋ pɔ-cɔlɔ tɩlɩnaa. Tɩtɛkɛ Krɩstʋ ñɩndʋ. 9 Toovenim lɛ, Krɩstʋ wɛʋ yɔ, Ɛsɔ wɛ e-tomnaɣ taa pilim 10 nɛ mɩ nɛ ɩ mɩ-kpɛndʋʋ taa lɛ, ihiɣ pɩtɩŋa. Ɛnʋ kɩlɩnɩ awiya nɛ ɖoŋ tɩŋa payɩ. 11 Mɩ nɛ ɩ mɩ-kpɛndʋʋ mbʋ pɩ-taa pɛpɛlɩ-mɩ. Pɛtɛpɛlɩ-mɩ ɛzɩ ɛyaa *pɛlʋʋ yɔ, ɛlɛ, pɛpɛlɩ-mɩ ɛzɩ Krɩstʋ ɖʋʋ yɔ. Mbʋ lɛ se ɩsɛtɩ mɩ-kɩwɛɛkɩm nɛ ɩlɔ. 12 Palabʋ-mɩ *lɩm sɔʋ sɔnzɩ yɔ, mɩ nɛ Krɩstʋ pepima. Mɩ nɛ ɩ ifemna ɖɔɖɔ, mbʋ pʋyɔɔ yɔ, ɩwɛnɩ lidaʋ ɖoŋ weyi Ɛsɔ fezini-i nɛ sɩɖaa taa yɔ ɛ-yɔɔ. 13 Ɖooo lɛ, ɩɩkɛ sɩɖaa mɩ-kɩwɛɛkɩm nɛ mɩ-kɩtɛpɛlɩtʋ pɔ-yɔɔ. Ɛlɛ, lɛɛlɛɛyɔ Ɛsɔ tɩŋnɩ Krɩstʋ yɔɔ nɛ ɛha-mɩ wezuu: ekpeɣ-ɖʋ ɖa-kɩwɛɛkɩm tɩŋa payɩ. 14 Ɛkpaɣ takayaɣ ŋga pama ka-taa kɩwɛɛkɩm mbʋ paɣtʋ wɩlaa se ɖɩlaba yɔ nɛ ɛkam-kɛ *kaamaŋkaɣ yɔɔ nɛ eɖizini-kɛ. 15 Mbʋ Ɛsɔ lɩzɩ mbʋ pɩtɩŋa payɩ pʋwɛ ɛsɔdaa nɛ tataa yɔ pu-ɖoŋ nɛ eyele nɛ ɛyaa tɩŋa na-pʋ nɛ pɩwɩlɩ se ɛtɩŋnɩ kaamaŋkaɣ yɔɔ nɛ ɛwabɩ-pʋ. 16 Pʋ-yɔɔ lɛ, ɩtaaha nɔɔyʋ waɖɛ se ɛkpɛzɩnɩ-mɩ mbʋ ɩtɔkɩ yaa ɩñɔʋ yɔ pʋ-yɔɔ yaa mbʋ pʋwɛɛ se ɩla kazandʋ natʋyʋ wiye yaa ɩla alɩwaatʋ ndʋ fenaɣ kɩfalaɣ lɩɣ yɔ yaa *kɩyakʋ kɩhɛzʋʋ wiye yɔ pʋ-yɔɔ. 17 Pɩtɩŋa payɩ pɩkɛ mbʋ pɩkaɣ kɔm yɔ pɩ-kɩlɛmʋʋ. Mbʋ lɛ Krɩstʋ. 18 Ɩtaayele nɛ mba pawaɣnɩ se poluzuu pa-tɩ nɛ poluŋuu Ɛsɔ tiyiyaa tɛɛ yɔ, pa-taa nɔɔyʋ kʋ mɩ-tɔm. Mbʋ pʋyɔɔ yɔ, pakpakɩɣ po-ɖozee payaɣ pʋyʋ nɛ pakpazɩɣ pa-tɩ nɛ pa-maɣmaɣ pa-lɩmaɣza. Ŋgʋ, akɛ ɛyaa lɩmaɣza yem. 19 Weyi ɛlakɩ mbʋ yɔ, ɛ nɛ Krɩstʋ pɛfɛyɩ ɖama taa. Ŋgʋ, ɛlɛ lɛ tomnaɣ ñʋʋ. Ŋgʋ yekina nɛ hola nɛ ɖɩtanɖɛ pɛkpɛndɩ ɖama nɛ papaɣlɩ ɛzɩ Ɛsɔ liu wɛʋ yɔ.
Ɛyʋ sɩkʋʋ nɛ efe ɛ nɛ Krɩstʋ pɛ-kpɛndʋʋ taa yɔ
20 Mɩ nɛ Krɩstʋ ɩsɩbɩna nɛ pɩlɩzɩ-mɩ kedeŋa yɔɔ cɩnɛ ɖoŋ nesi taa. Ye mbʋ lɛ, pɩlabɩ ɛzɩma nɛ ɩɖaɣnɩɣ wezuu caɣʋ ɛzɩ kedeŋa yɔɔ cɩnɛ ñɩma nɛ iyeki mɩ-tɩ nɛ paɖʋʋ-mɩ paɣtʋ se: 21 “Taakpaɣ pʋnɛ?” “Taaɖɩŋ mbʋ yɔ?” Yaa “Taatukuni pʋnɛ yɔ?” 22 Pʋnɛ pɩtɩŋa payɩ, palakɩnɩ-pʋ tʋmɩyɛ nɛ pɩtɛmnɩ mʋʋʋ. Ɛyaa yem ɖʋnɩ-pʋ nɛ pawɩlɩɣ. 23 Toovenim lɛ, tɩwɛ ɛza yɔɔ ɛzɩ lɔŋsɩnɖɛ yɔ. Mbʋ pʋyɔɔ yɔ, tiyeki nɛ poluŋuu Ɛsɔ tɛɛ ɛzɩ pa-maɣmaɣ paɖʋʋ yɔ. Ɖɔɖɔ lɛ, poluzuu pa-tɩ nɛ paɖʋʋ pa-tɩ kʋñɔŋ. Ɛlɛ, pɩfɛyɩnɩ wazaɣ nakɛyɛ, pa-maɣmaɣ pɩkɛdɩɣna.