Piya nɛ sɩ-ñɩma pɔ-tɔm
6
1 Mɩ piya lɛ, ɩña mɩ-ñɩma ɛzɩ Kɩpaɣlʋ liu wɛʋ yɔ. Mbʋ pʋyɔɔ yɔ, pʋmʋnɩ mbʋ. 2 Mbʋ pamawa se: “Ɖʋ ña-caa nɛ ño-ɖoo hɩɖɛ.” Ndʋ lɛ kajalaɣ paɣtʋ ndʋ Ɛsɔ tɔm se ye ŋɖɔm tɩ-yɔɔ yɔ, ɛlakɩ-ŋ pʋyʋ yɔ: 3 “Ŋhikiɣ ña-tɩ nɛ ŋcaɣ wezuu kedeŋa yɔɔ cɩnɛ nɛ pileɖi.”
4 Mɩ caanaa lɛ, ɩtaala nɛ mi-piya pana kpa. Ɛlɛ, ɩɖɔkɩ-sɩ nɛ ɩsɩɣzɩ-sɩ lɔŋ nɛ ɩka sɩ-ñʋŋ taa ɛzɩ Kɩpaɣlʋ liu wɛʋ yɔ.
Yomaa nɛ pa-caanaa pɔ-tɔm
5 Mɩ yomaa lɛ, ɩña kedeŋa yɔɔ cɩnɛ mɩ-caanaa camɩyɛ nɛ ɩsɔɔndɩ-wɛ toovenim taa, ñamtʋ ndʋ ɩñaŋ Krɩstʋ yɔ tɩ-yɔɔ. 6 Ɩtaañam-wɛ alɩwaatʋ ndʋ pɛwɛ mɩ-cɔlɔ nɛ pɔcɔŋnɩ-mɩ yɔ ti-ɖeke se pasam-mɩ. Ɛlɛ, ɩla mbʋ se ɩkɛ Krɩstʋ tʋmlaɖaa mba palakɩ mbʋ Ɛsɔ liu wɛɛ yɔ nɛ pa-laŋɩyɛ tɩŋa pilim yɔ. 7 Ɩlabɩ-wɛ tʋma nɛ laŋhʋlʋmɩyɛ ɛzɩ Kɩpaɣlʋ maɣmaɣ ɩlakɩ yɔ. Pɩtaakɛ se ɛyaa ɩlakɩ-yɛ. 8 Ɩtɛm naʋ se paa pɩɩkɛ yom yaa weyi ɛwɛ ɛ-tɩ yɔɔ yɔ, ɖeu mbʋ ɛlaba yɔ, pʋ-yɔɔ Kɩpaɣlʋ hɛyɩɣ-ɩ.
9 Piyele mɩ caanaa lɛ, ɩla mi-yomaa ɖɔɖɔ mbʋ. Ɩɖɔkɩ mɩ-tɩ nɛ ɩtaañazɩ-wɛ. Mbʋ pʋyɔɔ yɔ, ɩtɛm sɩm se mɩ nɛ wɛ mɩ-Caa wɛ ɛsɔdaa. Ɛɛcɔŋnɩ nɔɔyʋ ɛsɩndaa nɛ pʋcɔ ɛlabɩ-ɩ pʋyʋ.
Krɩstʋ tʋ You wondu tɔm
10 Tɔm ndʋ mɛntɛzɩɣna yɔ lɛ se: ɩkpa ɖoŋ mɩ nɛ Kɩpaɣlʋ mɩ-kpɛndʋʋ taa e-ɖoŋ sɔsɔŋ yɔɔ. 11 Ɩkpaɣ you wondu ndʋ Ɛsɔ ha-mɩ yɔ tɩtɩŋa payɩ nɛ ɩpɩzɩ ɩkaɖɩnɩ eleeu alɩwaatʋ ndʋ ɛñɩkɩ-mɩ ɛ-kpacanaa yɔ.ILLUSTRATION 25
12 Pɩtɛkɛ ɖa nɛ ɛyaa ɖiyouna. Ɛlɛ, ɖa nɛ ɛsɔdaa ɖoŋ tɩŋa payɩ nɛ kedeŋa yɔɔ cɩnɛ cɩkpɛndʋʋ tɛɛ awiya nɛ ɛsɔdaa kalɩzasɩ kɩdɛkɛdɩsɩ ɖiyouna. 13 Pʋ-yɔɔ pʋwɛɛ se ɩkpaɣ Ɛsɔ you wondu tɩŋa payɩ nɛ ɩpɩzɩ ɩkaɖɩnɩ-wɛ kɩyakɩŋ kɩdɛkɛdɩŋ taa. Mbʋ yekina nɛ ɩwɛɛ mi-ɖeɖe mbʋ alɩwaatʋ ndʋ ɩtɛŋ patɩŋa payɩ yonaʋ yɔ.
14 Pʋ-yɔɔ lɛ, ɩwɛɛ mi-ɖeɖe mbʋ: ɩkpaɣ toovenim ɛzɩ tambaɖɛ nɖɩ sɔɔja tɔɔlʋʋ yɔ nɛ tʋʋzʋʋ ɛzɩ ñɩɣyʋʋ ŋgʋ ehuuzuu e-lotu yɔɔ yɔ. 15 Ɩkpaɣ mi-kpekpeka ŋga ɩwɛnɩ Laŋhɛzɩyɛ Tɔm ɖisusiye yɔ ɛzɩ nataŋgbala wena ɩlɛɣ yɔ. 16 Pʋnɛ pɩtɩŋa pʋ-wayɩ lɛ, ɩkpaɣ mi-lidaʋ alɩwaatʋ kpeekpe ɛzɩ kpayʋʋ ŋgʋ ɩmʋʋnɩ ñɩma wena *Kañadʋ Satanɩ tɔʋ nɛ a-nɔsɩ taa nɛ miɖeɖeŋ yɔ. 17 Ɩkpaɣ ɖɔɖɔ mɩ-ñʋʋ yabʋ ɛzɩ you hulaɣ yɔ nɛ Ɛsɔtɔm ɛzɩ you sɩɣa ŋga ɛ-Kalɩzaɣ cɛlɩ-mɩ yɔ. 18 Ɖɔɖɔ lɛ, ɩtɩŋnɩ Ɛsɔ Kalɩzaɣ yɔɔ nɛ ɩsɛɛ-ɩ nɛ itendi-i alɩwaatʋ tɩŋa pɩtɩŋa pɩ-taa. Ɩtaaɖoo pʋ-yɔɔ, ɩñaɣ pana nɛ itendi-i ɛ-ñɩma tɩŋa yɔɔ. 19 Itendi-i ɖɔɖɔ mɔ-yɔɔ se eyele nɛ monkuli mɔ-nɔɔ lɛ, mantɩlɩ ndʋ maawɩlɩnɩ kaalɛyɩtʋ mbʋ pʋwɛ mɛsaɣ tɛɛ Laŋhɛzɩyɛ Tɔm taa yɔ. 20 Ndʋ Ɛsɔ tiyi-m se monsusi, tɩ-yɔɔ mɛwɛ salaka taa yɔ. Itendi-i nɛ manpɩzɩ monsusi-tʋ kaalɛyɩtʋ ɛzɩ pʋpɔzʋʋ yɔ.
Kɛtɛzaɣ sɛtʋ
21 Pʋcɔ mɩ ɖɔɖɔ ɩtɩlɩ mbʋ mɛnkɛnaa nɛ mbʋ malakɩ yɔ lɛ, taabalʋ kʋsɔɔlʋ Ticiiki weyi ɛkɛ Kɩpaɣlʋ tʋmlaɖʋ nɛ ɛlakɩ mbʋ ɛɖʋwa yɔ, ɛkɔŋnɩ-mɩ kɛdʋʋ pɩtɩŋa payɩ. 22 Pɩ-maɣmaɣ pʋ-yɔɔ kpem mentiyi-i mɩ-cɔlɔ se ɛkɛdɩ-mɩ mbʋ pɩ-taa ɖɩwɛɛ yɔ nɛ ɛhɛzɩ mɩ-laŋa.