Krɩstʋ ɛgbɛyɛ taa ñɩma nɔɔ kʋɖʋmaɣ tɔm
4
1 Ɛsɔ ya-mɩ se ɩɖɔ ɛzɩ pɩkɛdɩnaʋ-ɩ yɔ. Pʋ-yɔɔ weyi ma paɖʋ salaka se malakɩ Kɩpaɣlʋ tʋmɩyɛ yɔ, meheyiɣ-mɩ se ɩñaɣ pana nɛ ɩɖɔ pʋ-yɔɔ mbʋ: 2 iluzi mɩ-tɩ kpem nɛ ɩwɛɛ leleŋ nɛ ɩɖɔkɩ mɩ-hɔ. Ɩɖɔkɩ ɖama camɩyɛ nɛ sɔɔlɩm. 3 Ɩñaɣ pana nɛ ɩtɩŋnɩ laŋhɛzɩyɛ nɖɩ ɖɩwɛ mɩ-hɛkʋ taa yɔ ɖɩ-yɔɔ nɛ ɩɖɔkɩ nɔɔ kʋɖʋmaɣ ŋga Ɛsɔ Kalɩzaɣ yeba nɛ ɩla yɔ mbʋ. 4 Mbʋ pʋyɔɔ yɔ, tomnaɣ kʋɖʋmaɣ koŋ nɛ Ɛsɔ Kalɩzaɣ kʋɖʋmaɣ koŋ nɛ ɖaŋʋʋ kʋɖʋmʋm koŋ pɛwɛna. Ɖaŋʋʋ mbʋ pʋ-yɔɔ ɛya-mɩ. 5 Kɩpaɣlʋ kʋɖʋm koŋ nɛ lidaʋ kʋɖʋmʋʋ koŋ nɛ *lɩm sɔʋ sɔnzɩ kʋɖʋmsɩ koŋ pɛwɛna. 6 Ɛsɔ kʋɖʋm koŋ wɛna: ɛnʋ lɛ Krɩstʋ ñɩma tɩŋa payɩ Caa. Ɛnʋ cɔŋnɩnɩ patɩŋa pɔ-yɔɔ nɛ ɛwɛɛ patɩŋa pa-taa nɛ ɛlakɩ tʋmɩyɛ patɩŋa pa-taa. 7 Paa mbʋ, Krɩstʋ labɩ paa ɖa-taa weyi kʋjɔʋ ɛzɩ ɛɖʋʋ se ɛhaɣ-ɩ yɔ nɛ kɩwɛnɩ ndɩ. 8 Mbʋ pama Ɛsɔtɔm Takayaɣ taa se:
“Ɛkpa ɖooo ɛsɔdaa,
ɛkpɛndɩnɩ yomaa,
ɛlabɩ ɛyaa kʋjɔŋ.”
9 Pɔtɔm se ɛkpawa yɔ, pʋ-tɔbʋʋ se we? Pʋ-tɔbʋʋ se eetibi ɖooo tɛtɛɛ nɛ pʋcɔ. 10 Weyi eetiba yɔ, kʋɖʋm ɛnʋ ɛkpanɩ ɖooo ɛsɔdaa se ɛwɛɛ pɩtɩŋa payɩ pʋ-cɔlɔ. 11 Krɩstʋ ɛnʋ ɛhanɩ nabɛyɛ se pɛkɛ e-*tiyiyaa nɛ lɛlaa lɔɔyɩsɩ tɩnaa nɛ lɛlaa Laŋhɛzɩyɛ Tɔm susiyaa nɛ lɛlaa ɖiyiyaa nɛ lɛlaa Ɛsɔtɔm wɩlɩyaa. 12 Ɛlabɩ mbʋ se ɛñɔɔzɩ Ɛsɔ ñɩma nɛ pala ɛ-tʋmɩyɛ nɛ ɛgbɛyɛ taa ñɩma tɛzɩ kpaʋ ɖoŋ pe-lidaʋ wɛnaʋ taa 13 nɛ pʋkɔɔ pɩsɩnɩ alɩwaatʋ ndʋ ɖatɩŋa payɩ ɖɩlabɩ nɔɔ kʋɖʋmaɣ ɖe-lidaʋ wɛnaʋ taa nɛ ɖɩtɩlɩ Ɛsɔ Pɩyalʋ siŋŋ nɛ ɖɩpɩsɩ ɛyaa sʋtʋyaa nɛ ɖɩwɛɛ ɛzɩ Krɩstʋ wɛʋ kpem yɔ. 14 Mbʋ yekina nɛ ɖɩɩtasɩɣ kɛʋ piya nzɩ pawɩlɩɣ-sɩ nɛ sɩɩsɩŋ mbʋ sɩla nɛ peyiliɣ-sɩ nɛ pʋcɔzʋʋ-sɩ yem yem yɔ. 15 Ɛlɛ, ɖɩyɔɔdʋʋ toovenim nɛ ɖɩsɔɔlʋʋ ɖama nɛ ɖɩpaɣlɩɣ pɩtɩŋa pɩ-taa nɛ ɖɩñɔtʋʋnɩ weyi ɛkɛ ñʋʋ tʋ yɔ, ɛnʋ lɛ Krɩstʋ. 16 Ɛ-yɔɔ pɩtɩŋɩɣna nɛ hola kpɛndɩɣ e-tomnaɣ hɔɔlɩŋ tɩŋa camɩyɛ nɛ ɩpaɣlɩɣ ɛzɩ pʋpɔzʋʋ paa ŋgʋ yɔ. Tomnaɣ ŋga kɛwɛɛ kɛtɛzɩɣ kpaʋ ɖoŋ sɔɔlɩm taa.
Wezuu caɣʋ kɩfam tɔm
17 Iwelesi tɔm ndʋ mankaɖɩɣ-mɩ nɛ Kɩpaɣlʋ nɔɔ yɔ. Ndʋ lɛ se: pɩfɛyɩ se ɩtasɩ caɣʋ wezuu ɛzɩ mba pɛtɛkɛ Yuda ñɩma yɔ. Palakɩ mbʋ pamaɣzɩɣ nɛ pɩɩtalɩɣnɩ-wɛ ɖoli yɔ. 18 Pɛwɛ cɩkpɛndʋʋ tɛɛ, paasɩŋ wezuu ŋgʋ Ɛsɔ haɣ yɔ, pa-laŋkpɩzɩyɛ yɔɔ lɛ, pɛwɛ kaatɩlɩtʋ taa. 19 Fɛyɛ ɛɛtasɩɣ-wɛ kpaʋ nɛ pʋyʋ, palakɩ yem yem nɛ azuluma lakasɩ tɩŋa payɩ nɛ pɛwɛnɩ liidiye laɣzaɣ ɖɔɖɔ.
20 Piyele mɩ lɛ, pɩtɛkɛ mbʋ pɛkpɛlɩkɩ-mɩ Krɩstʋ tɔm taa. 21 Paa pɩlabɩ ɛzɩma, pɔyɔɔdɩ ɛ-tɔm nɛ ɩnɩɩ nɛ pɛkpɛlɩkɩ Yesu ñɩma mɩ toovenim mbʋ pʋwɛ ɛ-cɔlɔ yɔ. 22 Ye mbʋ, pʋwɛɛ se iyele mɩ-wɛtʋ kɩbɩndʋ nɛ mi-wezuu caɣʋ kɩbɩm, mbʋ pʋyɔɔ yɔ, mba cɛtɩɣnɩ-mɩ nɛ paɖʋzʋʋ-mɩ. 23 Pʋwɛɛ se paa mɩ-taa weyi eyele nɛ Ɛsɔ Kalɩzaɣ lɛɣzɩ ɛ-lɩmaɣza 24 nɛ ɛkɛ ɛyʋ kɩfalʋ. Ɛsɔ ma-ɩ ɛzɩ ɛ-maɣmaɣ yɔ nɛ ɛtʋʋzɩ nɛ ɛwɛɛ cɩɖɩcɩɖɩ ɛzɩ pɩwɛʋ toovenim taa yɔ.
25 Pʋ-yɔɔ lɛ, pʋwɛɛ se iyele cɛtʋʋ: paa mɩ-taa weyi eheyi lɛlʋ toovenim. Mbʋ pʋyɔɔ yɔ, ɖatɩŋa payɩ ɖɩkɛ Krɩstʋ tomnaɣ pilinzi. 26 Ye mɩ-pana ɛkpawa lɛ, ɩɖɔkɩ mɩ-tɩ nɛ ɩtaala kɩwɛɛkɩm, wɩsɩ ɛtaakpem-yɛ. 27 Ɩtaaha eleeu waɖɛ. 28 Weyi ɛmɩlaɣ yɔ, ɛtaatasɩ mɩlʋʋ. Ɛlɛ, ɛñaɣ pana nɛ ɛla tʋmɩyɛ nɛ toovenim nɛ ɛ-maɣmaɣ e-nesi nɛ ehiɣ nɛ ɛha weyi ɛwɛ kɩcɛyɩm taa yɔ. 29 Ɛzaɣtʋ tɔm natʋyʋ ɛtaalɩɩ mɩ-nɔɔ taa. Ɛlɛ, ye pʋwɛɛ se natʋyʋ ɛlɩɩ yɔ, tɩkɛnɩ kɩbandʋ ndʋ tiyeki se mba panɩɣ-tʋ yɔ, pɛtɛzɩ pɩʋ nɛ patɩlɩ mbʋ lootiye kɛnaa yɔ. 30 Ɩtaapɩsɩ Ɛsɔ Kalɩzaɣ hɔyɛ, ŋga lɛ mayaɣ ŋga ɛñɩɣ mɩ-yɔɔ se ɛɛlɩzɩ-mɩ pɩ-taa puwiye nɖɩ ɛkɔŋ yɔ. 31 Iyele ɛzɩñɩŋɩyɛ nɛ tɔm ñasʋʋ nɛ pana nɛ holuu nɛ ɛyaa hɩla wɛɛkʋʋ nɛ pɩkpɛndɩnɩ kañatʋ tɩŋa payɩ. 32 Ɛlɛ, ɩla ɖama hɛɛɛ nɛ ɩna ɖama pʋtɔdɩyɛ. Ikpeɣ ɖama ɛzɩ Ɛsɔ kpeɣu-mɩ yɔ, mɩ nɛ Krɩstʋ mɩ-kpɛndʋʋ taa.