1 Kɔrɛntɩ 16

Pahaɣʋ Yeruusalɛm Yesu ɛgbɛyɛ taa ñɩma haɖɛ yɔ

¹ Haɖɛ nɖɩ pahaɣ se pasɩnɩ Ɛsɔ ñɩma yɔ ɖɩ-tɔm taa lɛ, mɩ ɖɔɖɔ ɩla ɛzɩ meheyuu Yesu agbaa taa ñɩma mba pɛwɛ Galaasii yɔ. ² Kpɩtaʋ taa kajalaɣ kɩyakʋ wiye lɛ, pʋwɛɛ se paa mɩ-taa weyi ɛsɩɩ mbʋ ɛpɩzɩɣ se ɛha yɔ nɛ hɔɔlʋʋ nɛ maakɔŋ mantalɩɣ lɛ, ɩtɛm cɔʋ pɩtɩŋa. ³ Alɩwaatʋ ndʋ mantalɩɣ mɩ-tɛ yɔ, mamaɣ takayɩsɩ nɛ mɛncɛlɩ mba ɩlɩzɩ-wɛ se powoni mɩ-haɖɛ Yeruusalɛm yɔ nɛ pɛkpɛndɩna. ⁴ Ye pʋwɛɛ se mowolo ma-maɣmaɣ ɖɔɖɔ yɔ, ma nɛ wɛ ɖiwolo.

Mbʋ Pɔɔlɩ ɖʋwa se ɛlakɩ yɔ

⁵ Mantɩŋɩɣnɩ Masedonii egeetiye taa nɛ mɔnkɔɔ mɩ-tɛ. Mbʋ pʋyɔɔ yɔ, pʋwɛɛ se mantɩŋnɩ peeye nɛ pʋcɔ. ⁶ Pʋtɔmaɣ yɔ, mɔnkɔŋ sɩŋʋʋ mɩ-cɔlɔ pazɩ. Halɩ mancakɩ niŋkaɣ alɩwaatʋ tɩŋa nɛ ɩsɩnɩ-m nɛ mowolo ɖenɖe pʋwɛɛ se mowolo yɔ. ⁷ Me-liu fɛyɩ se mana-mɩ ɖɛʋ taa yem. Ɛlɛ, me-liu wɛɛ se ye Kɩpaɣlʋ etisiɣ yɔ, mancaɣ mɩ-cɔlɔ pazɩ.

⁸ Paa pɩɩla ɛzɩma yɔ, mancakɩ Efɛɛzɩ cɩnɛ mbʋ nɛ pʋkɔɔ pɩsɩnɩ Kʋmtʋ *Kazandʋ wiye. ⁹ Mbʋ pʋyɔɔ yɔ, paa koyindinaa ɛɖɔwa yɔ, pɩha-m waɖɛ se mala tʋmɩyɛ sɔsɔɖɛ nɖɩ ɖɩwɛ wazaɣ yɔ.

¹⁰ Ye Timootee ɛtalɩ mɩ-tɛ lɛ, ɩmʋ-ɩ camɩyɛ nɛ pɩkɛdɩnɩ-ɩ. Mbʋ pʋyɔɔ yɔ, ɛlakɩ Kɩpaɣlʋ tʋmɩyɛ ɖɔɖɔ ɛzɩ ma yɔ. ¹¹ Pɩfɛyɩ se nɔɔyʋ enim-i. Ɛlɛ, ɩsɩnɩ-ɩ nɛ ɛɖɔ ɛ-nʋmɔʋ nɛ laŋhɛzɩyɛ nɛ ɛpɩsɩ ɛkɔɔ mɔn-cɔlɔ. Mbʋ pʋyɔɔ yɔ, ma nɛ taabalaa ɖɩɖaŋ-ɩ. ¹² Piyele ɖa-taabalʋ Apoloosi lɛ, mɔyɔɔdɩnɩ-ɩ se pɩlabɩ-ɩ hʋnʋm nɛ ɛ nɛ taabalaa lɛlaa pɔkɔɔ mɩ-tɛ. Ɛlɛ, e-liu fɛyɩ se ɛkɔɔ alɩwaatʋ tʋnɛ tɩ-taa. Ɛkaɣ kɔm alɩwaatʋ ndʋ pɩhaɣ-ɩ nʋmɔʋ yɔ.

Kɛtɛzaɣ tɔm nɛ sɛtʋ

¹³ Ɩcaɣnɩ mɩ-ɛza nɛ ɩɖɔkɩ mɩ-tɩ kpam mi-lidaʋ wɛnaʋ taa. Ɩwɛɛ abalɩtʋ nɛ ɩwɛɛ ɖoŋ. ¹⁴ Pʋwɛɛ se ɩla pɩtɩŋa payɩ nɛ sɔɔlɩm.

¹⁵ Taabalaa, ɩnawa se Stefanaasɩ nɛ ɛ-hɔʋ taa ñɩma pacalɩnɩ kɛʋ Krɩstʋ ñɩma Akayɩ egeetiye taa nɛ palakɩ Ɛsɔ ñɩma tʋmɩyɛ. Pʋ-yɔɔ mentendiɣ-mɩ se: ¹⁶ iluzi mɩ-tɩ pa nɛ mba patɩŋa payɩ palakɩ tʋmɩyɛ nɖɩ yɔ pɛ-tɛɛ.

¹⁷ Man-taa hʋlʋmɩnɩ Stefanaasɩ nɛ Fɔɔrtunaatusi nɛ Akayikuusi pɔ-kɔm. Pasɩnɩ-m alɩwaatʋ ndʋ ɩfɛyɩ mɔn-cɔlɔ yɔ. ¹⁸ Mbʋ pʋyɔɔ yɔ, peyeba nɛ ma nɛ mɩ ɖa-laŋa hɛɛ. Pʋwɛɛ se ɖɩyɩɣyɩ-wɛ.

¹⁹ Yesu agbaa taa ñɩma mba pɛwɛ Aazii egeetiye taa yɔ, pɛsɛ-mɩ. Akilaasɩ nɛ Prisiili nɛ Yesu ɛgbɛyɛ taa ñɩma mba pekpeɣliɣ pa-ɖɩɣa taa yɔ, pɛsɛ-mɩ ɖeu Kɩpaɣlʋ weyi ɛkpɛndɩɣ-ɖʋ yɔ ɛ-yɔɔ. ²⁰ Taabalaa mba pɛwɛ cɩnɛ yɔ, patɩŋa payɩ pɛsɛ-mɩ. Ɩsɛɛ ɖama ɖeu.

²¹ Ma Pɔɔlɩ, ma-maɣmaɣ mamaɣnɩ tɔm pee anɛ nɛ me-nesi. Ana lɛ se: mɛnsɛ-mɩ.

²² Ye nɔɔyʋ ɛtɔsɔɔlɩ Kɩpaɣlʋ yɔ, pʋwɛɛ se Ɛsɔ ɛwɩlɩ pʋdʋ kpalʋʋ! Kɩpaɣlʋ! Kɔɔ*fd*. \fm d \fr (16.22) \fk Kɩpaɣlʋ! Kɔɔ: \f ye pɛɖɛzɩɣ-tʋ piye piye yɔ, pɛɖɛzɩɣ se: Maraana ta. ²³ Kɩpaɣlʋ Yesu ɛlabɩ-mɩ lootiye. ²⁴ Mɔnsɔɔlɩ mba mɩ mɩtɩŋa payɩ mɩ nɛ Krɩstʋ Yesu ɩkpɛndaa yɔ.