Ɛsɔ Kalɩzaɣ kʋjɔŋ tɔm
12
1 Taabalaa, Ɛsɔ Kalɩzaɣ kʋjɔŋ tɔm taa lɛ, mɔntɔsɔɔlɩ se ɩwɛɛ cɩkpɛndʋʋ tɛɛ. 2 Ɩtɛm sɩm ɛzɩma mbʋ pʋhɔŋaɣ-mɩ nɛ ɩtɩŋɩɣ sɩʋ kpelisi nzɩ sɩɩyɔɔdʋʋ yɔ sɩ-wayɩ yem ɖimɖim alɩwaatʋ ndʋ ɩtaañaŋ Krɩstʋ yɔ. 3 Pʋ-yɔɔ mankaɖɩɣ-mɩ se: nɔɔyʋ fɛyɩ se ɛyɔɔdʋʋnɩ Ɛsɔ Kalɩzaɣ ɖoŋ nɛ ɛtɛ ɛtɔ se: “Ɛsɔ ɛwɩlɩ Yesu kpalʋʋ.” Nɔɔyʋ ɛɛpɩzɩɣ ɛyɔɔdɩ ɖɔɖɔ se: “Yesu lɛ Kɩpaɣlʋ” nɛ pɩtatɩŋnɩ Ɛsɔ Kalɩzaɣ yɔɔ.
4 Paa Ɛsɔ Kalɩzaɣ kʋjɔŋ ɩwɛ ndɩ ndɩ yɔ, ke-ɖeke koŋ kahaɣnɩ-ɩ. 5 Paa tʋma wena ɖɩlakɩ yɔ awɛ ndɩ ndɩ yɔ, Kɩpaɣlʋ kʋɖʋm ɖeke ɖɩlakɩ-yɛ. 6 Paa ɖa-tʋma labʋ ɛwɛ ndɩ ndɩ yɔ, Ɛsɔ kʋɖʋm ɛnʋ ɛhaɣnɩ ɖatɩŋa payɩ ɖoŋ se ɖɩla atɩŋa. 7 Ŋgʋ, kʋjɔʋ ŋgʋ Ɛsɔ Kalɩzaɣ lakɩ paa weyi se pʋwazɩ ɖatɩŋa payɩ yɔ, kɩwɩlɩɣna se kɛwɛ ɛ-cɔlɔ. 8 Pʋ-yɔɔ kaha ɖa-taa nabɛyɛ lɔŋsɩnɖɛ se pɔyɔɔdɩna, nɛ kaha lɛlaa lɛɣtʋ se paba ɛyɔɔdɩna ɖɔɖɔ. 9 Kalɩzaɣ kʋɖʋmaɣ ŋga kahanɩ nabɛyɛ se pɛwɛnɩ lidaʋ nɛ kaha lɛlaa se pala nɛ kʋdɔndɩnaa yɔɔ cɛ. 10 Ŋga ɖɔɖɔ hanɩ nabɛyɛ se pala hama lakasɩ, lɛlaa se posusi tɔm ndʋ tɩlɩnɩ Ɛsɔ cɔlɔ yɔ, lɛlaa se patɩlɩ mbʋ pɩlɩnɩ Kɔ-cɔlɔ yaa mbʋ pɩtalɩnɩ kɔ-cɔlɔ yɔ, lɛlaa se pɔyɔɔdɩ kʋnʋmɩŋ ndɩ ndɩ nɛ lɛlaa se palɩzɩ a-tɔbɩŋ. 11 Ɛsɔ Kalɩzaɣ kʋɖʋmaɣ ŋga kalakɩnɩ pɩtɩŋa payɩ nɛ kaha paa weyi e-ɖeɖe ɛzɩ ke-liu wɛʋ yɔ.
Tomnaɣ nɛ ke-pilinzi sakɩyɛ pɔ-tɔm
12 Toovenim lɛ, Krɩstʋ wɛ ɛzɩ tomnaɣ kʋɖʋmaɣ ŋga kɛwɛnɩ pilinzi sakɩyɛ yɔ. Paa ke-pilinzi ɛɖɔwa yɔ, kɛkɛ kʋɖʋmaɣ. 13 Mbʋ pʋyɔɔ yɔ, Ɛsɔ Kalɩzaɣ kʋɖʋmaɣ ŋga kɔ-yɔɔ pɩtɩŋnaa nɛ pala ɖatɩŋa payɩ *lɩm sɔʋ sɔnzɩ nɛ ɖɩpɩsɩ tomnaɣ kʋɖʋmaɣ. Paa ɖɩkɛ Yuda ñɩma yaa mba pɛtɛkɛ Yuda ñɩma yɔ, yaa yomaa yaa mba pɛwɛ pa-tɩ yɔɔ yɔ, ɖatɩŋa payɩ Kalɩzaɣ kʋɖʋmaɣ ŋga ka-lɩm ɖɩñɔwa.
14 Pɩtɛkɛ piliŋa kʋɖʋmaɣ wɛnɩ tomnaɣ yɔɔ, ɛlɛ, sɩɖɔ sakɩyɛ. 15 Paa naŋgbaŋaɣ ɛtɔm se: “Mɛntɛkɛ nesi, pʋ-yɔɔ lɛ, mɛnfɛyɩ tomnaɣ yɔɔ” yɔ, kaapɩzɩɣ keyele tomnaɣ piliŋa kɛʋ. 16 Paa nɩŋgbaŋʋʋ ɛtɔm se: “Mɛntɛkɛ ɛzɩyɛ, pʋ-yɔɔ lɛ, mɛnfɛyɩ tomnaɣ yɔɔ” yɔ, kɩɩpɩzɩɣ kiyele tomnaɣ piliŋa kɛʋ. 17 Ye ɛyʋ tomnaɣ tɩŋa ɛɛkɛ ɛzɩyɛ lɛ, ɛbɛ ɛɛnɩnaa yɔ? Ye kaakɛ nɩŋgbaŋʋʋ lɛ, ɛbɛ ɛɛsɔŋnaa yɔ? 18 Ɛsɔ ɖʋnɩ paa piliŋa ŋga tomnaɣ yɔɔ mbʋ ɛzɩ e-liu wɛʋ yɔ. 19 Ye sɩtɩŋa payɩ sɩɩkɛ piliŋa kʋɖʋmaɣ lɛ, le tomnaɣ ñaawɛɛ yɔ? 20 Pʋ-yɔɔ lɛ, pilinzi ndɩ ndɩ nɛ tomnaɣ kʋɖʋmaɣ koŋ pɛwɛna.
21 Ɛsɩyɛ ɛɛpɩzɩɣ ɖiheyi nesi se: “Man-paa fɛyɩnɩ-ŋ.” Yaa ñʋʋ ñaapɩzɩɣ kiheyi naŋgbanzɩ se: “Man-paa fɛyɩnɩ-mɩ.” 22 Halɩ tomnaɣ yɔɔ pilinzi nzɩ ɖɩkpakɩɣ se sɩkɛ ajamaa kpem yɔ, sɩwɛ-ɖʋ wazaɣ siŋŋ. 23 Ɖɔɖɔ lɛ, tomnaɣ yɔɔ pilinzi nzɩ ɖɩmaɣzɩɣ se sɩkɛ-ɖʋ fɛyɛ pʋyʋ yɔ, sɩ-yɔɔ ɖɩkɩlɩɣ huuzuu. Halɩ nzɩ sɩfɛyɩ cɔnaʋ kpem yɔ, sɩ-yɔɔ ɖɩkɩlɩɣ cɔnaʋ kpem. 24 Ŋgʋ, pɩtɛkɛnɩ-ɖʋ kɩcɛyʋʋ se ɖɩcɔŋnɩ nzɩ sɩwɛ cɔnaʋ yɔ sɩ-yɔɔ mbʋ. Ɛsɔ labɩ tomnaɣ nɛ ɛɖʋ ke-pilinzi nzɩ sɩfɛyɩ cɔnaʋ yɔ hɩɖɛ nɛ pɩkɩlɩ 25 se tayʋʋ ɛtaawɛɛ tomnaɣ yɔɔ. Ɛlabɩ mbʋ ɖɔɖɔ se pilinzi ɛwɛnɩ lɩmaɣza kʋɖʋmɛɛ nɛ sɩtɔzʋʋ ɖama yɔɔ. 26 Ye piliŋa nakɛyɛ ɛnɩɣ siziŋ yɔ, pilinzi tɩŋa nɩɣ siziŋ ɖɔɖɔ ɛzɩ ŋga yɔ. Ye pasam piliŋa nakɛyɛ yɔ, ka nɛ pilinzi tɩŋa pamayɩɣ amaya.
27 Mɩtɩŋa payɩ ɩkɛ Krɩstʋ tomnaɣ nɛ paa mɩ-taa weyi ɛkɛ tomnaɣ ŋga ke-piliŋa. 28 Krɩstʋ *tiyiyaa Ɛsɔ calɩnɩ lɩzʋʋ Yesu ɛgbɛyɛ taa. Pa-wayɩ lɛ, lɔɔyɩsɩ tɩnaa, paba wayɩ lɛ, wɩlɩyaa. Pʋwayɩ lɛ, ɛla lɛlaa kʋjɔŋ ndɩ ndɩ: mba lɛ mba palakɩ hama lakasɩ nɛ mba peyeki se kʋdɔndɩnaa yɔɔ ɛcɛ yɔ nɛ mba pasɩŋnɩ lɛlaa nɛ mba pɔcɔŋnɩ lɛlaa yɔɔ yɔ nɛ mba pɔyɔɔdʋʋ kʋnʋmɩŋ ndɩ ndɩ yɔ. 29 Patɩŋa payɩ pɛkɛ Krɩstʋ tiyiyaa naa we? Pɛkɛ lɔɔyɩsɩ tɩnaa naa we? Pɛkɛ wɩlɩyaa naa we? Palakɩ hama lakasɩ naa we? 30 Pɩha patɩŋa payɩ se peyele kʋdɔndɩnaa yɔɔ cɛ naa we? Pɩha patɩŋa payɩ se pɔyɔɔdɩ kʋnʋmɩŋ ndɩ ndɩ yaa we? Pɩha patɩŋa payɩ se palɩzɩ a-tɔbɩŋ naa we? 31 Pʋ-yɔɔ lɛ, ɩñɩnɩ kʋjɔŋ weyi ɩkɩlɩ lɛɛŋ yɔ.
Ɖɔɖɔ lɛ, mantasɩɣ-mɩ wɩlʋʋ nʋmɔʋ ŋgʋ kɩkɩlɩ pɩtɩŋa payɩ yɔ.