25
Abɩraham sɩm nɛ e-liɖe taa ñɩma lɛlaa pɔ-tɔm
1 Abɩraham katasɩ halʋ kpaɣʋ. Payaɣ-ɩ se Ketuura. 2 Ɛ́lɛ lʋlɩ-ɩ abalɩbiya. Ńzɩɩ yɔ: Zimiraani nɛ Yokisaanɩ nɛ Meedaanɩ nɛ Maadiyaanɩ nɛ Yisibaakɩ nɛ Suwaa. 3 Yokisaanɩ ñalʋlɩ Saabaa nɛ Dedaanɩ. Dedaanɩ liɖe taa ñɩma lɛ Asiirii ñɩma, nɛ Letuusii ñɩma, nɛ Lewumii ñɩma. 4 Maadiyaanɩ ñalʋlɩ piya mba yɔ, pabaɣ yɔ: Eyifaa nɛ Efɛɛrɩ nɛ Hanɔɔkɩ nɛ Aviidaa nɛ Ɛlɩdaa. Ketuura lʋlʋʋ taa abalɩbiya tɩŋa lɛ.
5 Abɩraham keyebini Izaakɩ ɛ-ñɩm tɩŋa payɩ. 6 Piyele ɛla ɛ-halaa lɛlaa piya kʋjɔŋ nɛ ɛkpaɣ-wɛ nɛ ewona wɩsɩɖɩlɩyɛ hɔɔlʋʋ taa nɛ eposini-wɛ nɛ ɛ-pɩyalʋ Izaakɩ. 7 Abɩraham kɛwɛnɩ pɩnzɩ mɩnʋʋ nɛ nɩɩnʋwa nɛ nɩɩlɛ nɛ kagbaanzɩ, (175) 8 nɛ pɩcɔ ɛwoni sɔsaa mʋlʋm. Abɩraham kakpadɩyɩ laŋhɛzɩyɛ taa, ɛsɔsaa nɛ e-liu sɩ nɛ pɩcɔ ɛsɩ nɛ ewolo sɔsaa cɔlɔ. 9 Ɛ-pɩyalaa Izaakɩ nɛ Isimaayɛɛlɩ pepim-i Maakpela hɔɔlʋʋ taa, ɛwaɣ ŋga kɛwɛ Hɛɛtɩ liɖe taa tʋ, Cohaarɩ pɩyalʋ Efirɔɔnɩ hayɩm taa, Mamɩree cɔlɔ yɔ, ka-taa. 10 Abɩraham kayabɩ hayɩm mbʋʋ Hɛɛtɩ liɖe taa ñɩma cɔlɔ. Pɩ-taa pepim ɛ nɛ ɛ-halʋ Saaraa. 11 Ɛsɔ wazɩ Abɩraham pɩyalʋ Izaakɩ yɔɔ, Abɩraham sɩm wayɩ. Izaakɩ kɛwɛ Lahayɩ Rooyi lɔkɔ cɔlɔ.
Isimaayɛɛlɩ pɩyalaa tɔm
12 Saaraa tʋmlaɖʋ halɩñɩnʋ, Ejipiti tʋ Hagaarɩ pɩyalʋ Isimaayɛɛlɩ weyi ɛlʋlɩ-ɩ Abɩraham yɔ, e-liɖe taa ñɩma yɩla yɔ. 13 Ɩɩnaɣ Isimaayɛɛlɩ pɩyalaa yɩla ɛzɩ palʋlʋʋ-wɛ yɔ: Ɛ-pɩyalʋ sɔsɔ Nebayɔɔtɩ, nɛ Kedaarɩ, nɛ Adibeyɛɛlɩ, nɛ Mibisam, 14 nɛ Misemaa, nɛ Dumaa, nɛ Maasaa, 15 nɛ Hadaadɩ, nɛ Tema, nɛ Yetuuri, nɛ Nafisii, nɛ Kedimaa. 16 Mbaɣ lɛ Isimaayɛɛlɩ pɩyalaa hiu nɛ naalɛ (12). Paa anɩ ɛkɛ wiyaʋ e-cejewiye taa. Paya tɛtʋ cikpetu nɛ hɔɔlɩŋ weyi ɩ-taa pɛwɛɛ yɔ, pa-yɩla. 17 Isimaayɛɛlɩ kɛwɛnɩ pɩnzɩ mɩnʋʋ nɛ niidozo nɛ lʋbɛ (137), nɛ pɩcɔ ɛsɩ. Ɛsɩba lɛ, ewolo ɛ-cɔzɔnaa cɔlɔ. 18 Isimaayɛɛlɩ liɖe taa ñɩma kɛwɛ hɔɔlʋʋ ŋgʋ kɩwɛ kpaɣ Hawiilaa egeetiye nɛ piwolo pɩsɩnɩ hɔɔlʋʋ ŋgʋ payaɣ se Suuri yɔ, kɩ-taa. Suuri ñɔtɩnɩ Ejipiti ɛjaɖɛ, Assiirii hɔɔlʋʋ taa. Isimaayɛɛlɩ liɖe taa ñɩma kɛwɛ hɔɔlʋʋ ŋ́gʋ kɩ-taa nɛ papa e-newaa tɩŋa nɛ ɛza.
YAAKƆƆBƲ TƆM
Ezaawʋ nɛ Yaakɔɔbʋ palʋlʋʋ tɔm
19 Ɩɩnaɣ Abɩraham pɩyalʋ Izaakɩ tɔm. 20 Izaakɩ wɛnɩ pɩnzɩ nɩɩnaza (40) lɛ, ɛkpaɣ Betuwɛɛlɩ pɛlɛ Reebeeka. Reebeeka nɛ ɛ-ɖalʋ Labaanɩ nɛ pa-caa Betuwɛɛlɩ pɛkɛ Aram ñɩma, Mezoopotamii egeetiye taa. 21 Ɛlɛ, Reebeeka kɛkɛ kaalʋlaɣ. Pʋ-yɔɔ Izaakɩ tendi KƖPAƔLƲ ɛ-yɔɔ, nɛ KƖPAƔLƲ nɩnɩ-ɩ nɛ eyele nɛ Reebeeka haɣ ɖomaa. 22 Ɛhaɣ ḿbʋ lɛ, piya wɛɛ sɩyɔkʋʋ ɖama e-lotu taa, nɛ ɛma kubuka se, ye mbʋʋ pɩwɛɛ yɔ, ɛbɛ yɔɔ pɩwɛɛ se, ɛyʋ ɛhaɣ hoa yɔ? Peeye, ewoba nɛ ɛyɔɔdɩnɩ KƖPAƔLƲ se, ɛna se ɛbɛ lakɩ-ɩ. 23 Pʋ-yɔɔ, KƖPAƔLƲ heyi-i se,
ajɛɛ naalɛ (2) wɛ e-lotu taa.
Samaɣ naalɛ (2) ndɩ ndɩ lɩɣnɩ ɛ-taa.
Lɛɛka kɩlɩɣ lɛɛka ɖoŋ,
sɔsɔɔ kaɣ cikpelaɣ tɛɛ luŋuu.
24 Alɩwaatʋ kɔma tɩtalɩ se Reebeeka ɛlʋlɩ lɛ, pɩna keɣlee se, ɖomaa wɛnɩ ɛ-taa. 25 Ɛlʋlaɣ lɛ, weyi ɛcalɩ lɩʋ yɔ, ɛñɔ hʋndʋ ɛ-tɩŋa yem kpimm. Payaa-ɩ se, Ezaawʋ. a 26 Ɛ-wayɩ lɛ, e-neu ñalɩɩ. Ɛkɔɖɔkɩ Ezaawʋ naakikiɖe. Paya ɛ́lɛ se, Yaakɔɔbʋ. b Izaakɩ kɛwɛnɩ pɩnzɩ nɩɩnʋwa nɛ hiu (60) alɩwaatʋ ndʋ palʋlɩ-wɛ yɔ.
Ezaawʋ pɛdʋʋ ɛ-sɔsɔtʋ yɔ
27 Abalɩbiya ńzɩ, sɩkɔma lɛ, sɩpaɣlɩ. Ezaawʋ kɛ ɛgbam kpimkpim weyi ɛsʋʋnɩ lakʋ taa yɔ. Yaakɔɔbʋ ñɛkɛ ɛyʋ weyi ɛwɛ hɛɛ nɛ ɛsɔɔlɩ ɖɩɣa caɣʋ yɔ. 28 Izaakɩ kakɩlɩ sɔɔlʋʋ Ezaawʋ. Mbʋ pʋyɔɔ yɔ, ɛɛsɔɔlɩ tɛyɛ nandʋ. Ŋgʋ, Reebeeka ñakɩlɩ sɔɔlʋʋ Yaakɔɔbʋ.
29 Nakʋyʋ wiye Yaakɔɔbʋ hilaɣ ɖozi kɩsɛmsɩ nasɩyɩ. Pɩkɛdaa lɛ, Ezaawʋ lɩnɩ lakʋ taa nɛ ɛtalɩ, pɩnɩ-ɩ taɣtaɣ. 30 Ɛtalɩ ḿbʋ lɛ, eheyi Yaakɔɔbʋ se, pɩnɩ ɛnʋ taɣtaɣ. Ɛnʋ tendi-i se, ɛha-ɩ e-ɖozi kɩsɛmsɩ nzɩ nɛ ɛñɔɔ. Sɩ-yɔɔ pakʋm Ezaawʋ ɛnʋʋ hɩɖɛ se, Edom c. 31 Peeye Yaakɔɔbʋ heyi-i se, éyebini-i ɛ-sɔsɔtʋ nɛ pɩcɔ. 32 Ezaawʋ heyi-i se, ñɔɔsɩ ɖiɣni ɛnʋʋ kʋʋ, ɛnʋ sɔsɔtʋ wazɩɣ ɛnʋ we? 33 Yaakɔɔbʋ kitini-i se, éɖuu kpaagbaa nɛ pɩcɔ. Peeye Ezaawʋ ɖuwaa se, ɛnʋ yekini-i ɛ-sɔsɔtʋ. 34 Ɖɩnɛɛ Yaakɔɔbʋ ha-ɩ kpɔnɔ nɛ ɖozi ńzɩ. Ezaawʋ tɔɔ nɛ ɛñɔɔ, nɛ pʋwayɩ lɛ, ɛkʋyɩ ɛɖɛɛ. Ɛtakpaɣ ɛ-sɔsɔtʋ nɛ ɛyaa pʋyʋ.