13
1 Abɩram kʋyɩ Ejipiti ḿbʋ lɛ, ɛ nɛ ɛ-halʋ pakpaɣ mbʋ pɩtɩŋa payɩ paawɛna yɔ, nɛ pa nɛ Looti papɩsɩ Neegɛɛvɩ hɔɔlʋʋ taa.
Abɩram nɛ Looti pacɩyʋʋ ɖama yɔ
2 Abɩram kɛwɛnɩ ñɩm pɩtɩɩfɛyɩ. Ɛɛwɛnɩ naŋ sakɩyɛ nɛ liidiye sakɩyɛ nɛ sika sakɩyɛ. 3 Ɛkɔma ɛkʋyɩ Neegɛɛvɩ hɔɔlʋʋ taa lɛ, ɛɖɔmɩnɩ caɣʋ caɣʋ nɛ ɛkɔɔ ɛtalɩ Beetɛɛlɩ hɔɔlʋʋ taa, ɖenɖe ɛɛwɛ Beetɛɛlɩ nɛ Ayi pɛ-hɛkʋ taa yɔ, 4 ɖenɖe ɛɛma kɩlaŋ ɖɩ-layɛ yɔ. Abɩram talaa lɛ, eluŋ Ɛsɔ tɛɛ nɛ ɛyaa-ɩ se, KƖPAƔLƲ.
5 Looti weyi ɛtɩŋaɣ Abɩram wayɩ yɔ, ɛ́lɛ kɛwɛnɩ ɖɔɖɔ heŋ nɛ pʋŋ nɛ naŋ nɛ ɛ-maɣmaɣ ɛ-kɩɖanɖɩŋ. 6-7 Pʋkɔmaa lɛ, ɛjaɖɛ ńɖɩ ɖɩtatasɩ-wɛ walʋʋ se, pa-tɩŋa pɛkpɛndɩ pɛwɛɛ ɖɩ-taa. Mbʋ pʋyɔɔ yɔ, paawɛnɩ ñɩm kamaɣ fɛyɩ. Ɖɔɖɔ lɛ, Kanaanɩ ñɩma nɛ Periizii ñɩma paawɛ ɛjaɖɛ nɖɩ ɖɩ-taa. Pɩkɛdaa lɛ, you nakʋyʋ lɩɩ Abɩram ninɖiɣyaa nɛ Looti ñɩma pɛ-hɛkʋ taa. 8 Peeye Abɩram heyi Looti se, pɩfɛyɩ se e-ninɖiɣyaa nɛ Looti ñɩma poyoo, mbʋ pʋyɔɔ yɔ, ɛ nɛ ɩ pɛkɛ ɛyaa kʋɖʋmaa. 9 Ɛtasɩ-ɩ heyuu se, tɛtʋ ndʋ tɩwɛ ɛ-ɛsɩndaa yɔ, ɛnʋʋ Looti ɛtɩnɩ-tʋ. Se, ɛ nɛ ɩ payasɩ ɖama. Ye ɛɖɛɣnɩ nɩmɩyɛ yɔɔ yɔ, ɛnʋ ñɛɖɛnɩ nɩwaŋ yɔɔ. Ɛɖɛɣnɩ nɩwaŋ yɔɔ yɔ, ɛnʋ ñɛɖɛnɩ nɩmɩyɛ yɔɔ. 10 Looti cɔnaa lɛ, ɛna se, Yɔɔrɩdaanɩ kɛtɛɛŋa hɔɔlʋʋ taa wɛ ɖeu, tɛʋ nɩɣ peeye camɩyɛ. Pɩcɔ nɛ KƖPAƔLƲ ɖɩsɩ Sodom nɛ Gomɔɔrɩ lɛ, kpaɣ hɔɔlʋʋ ŋgʋ, piwolo pɩsɩnɩ Cowaarɩ, pɩɩwɛ ɛzɩ KƖPAƔLƲ kaɖaɣ nakɛyɛ yɔ. Peeye tɛtʋ wɛ mʋzʋŋ ɛzɩ Ejipiti ɛjaɖɛ taa tɛtʋ yɔ. 11 Peeye Looti lɩzɩ Yɔɔrɩdaanɩ kɛtɛɛŋa hɔɔlʋʋ ŋgʋ kɩ-tɩŋa, nɛ ɛ nɛ Abɩram payasɩ ɖama nɛ ɛkʋyɩ ɖenɖe paawɛɛ yɔ, nɛ ewolo ɛcaɣ hɔɔlʋʋ ŋ́gʋ, kɩ-wɩsɩɖɩlɩyɛ taa. 12 Piyele Abɩram ñacaɣ Kanaanɩ ɛjaɖɛ taa, nɛ Looti ñowolo ɛwɛɛ kɛtɛɛŋa ŋ́ga ka-taa nɛ esiɣ ɛ-kɩɖanɖɩŋ nɛ ɛkɔɔ ɛtalɩ Sodom tɛtʋ taa. 13 Tɛtʋ ńdʋ, tɩ-taa ñɩma kɛkɛ kɩtɛkɛdɩm laɖaa kpem, payʋsaɣnɩ KƖPAƔLƲ kamaɣ fɛyɩ.
14 Looti kɔma ɛkʋyɩ ɛɖɛɛ nɛ piyele Abɩram lɛ, KƖPAƔLƲ heyi ɛ́lɛ nakʋyʋ wiye se, ɛkpasɩ ɛ-ɛza nɛ ɖenɖe ɛwɛɛ yɔ, nɛ ɛcɔnɩ hadɛ nɛ hayo, nɛ wɩsɩɖɩlɩyɛ nɛ sɩ-ɖʋɖɩyɛ pɔ-hɔɔlɩŋ taa. 15 Se, ɛjaɖɛ ńɖɩ ɛnaɣ-ɖɩ yɔ, ɛnʋʋ KƖPAƔLƲ ɛhaɣ-ɖɩ ɛ nɛ ɛ-sayɩnaa kpaagbaa haʋ. 16 Se, eyeki nɛ e-liɖe taa ñɩma ɖɔɔ ɛzɩ tataa mʋzʋʋ yɔ, nɔɔyʋ ɛɛpɩzɩɣ ɛkalɩ-wɛ. 17 Se, ɛkʋyɩ nɛ ɛcɔɔ ɛjaɖɛ nɖɩ ɖɩ-tɩŋa payɩ nɛ ɛna, mbʋ pʋyɔɔ yɔ, ɛnʋ haɣ-ɩ-ɖɩ.
18 Peeye Abɩram kʋyaa nɛ ewolo esiɣ ɛ-kɩɖanɖɩŋ abalʋ weyi payaɣ se Mamɩree yɔ ɛ-tɩŋ cɔlɔ nɛ ɛwɛɛ peeye. Pɩñɔtɩnɩ tɛtʋ ńɖʋ payaɣ se Hɛbɩrɔɔnɩ yɔ. Ɛtalɩ peeye lɛ, ɛma KƖPAƔLƲ kɩlaŋ ɖɩlayɛ.