11
Baabɛɛlɩ Kuduyuu sɔsɔʋ tɔm
1 Kedeŋa yɔɔ ɛyaa kpeekpe yɔɔdaɣ kʋnʋŋ kʋɖʋmʋʋ, tɔm pe kʋɖʋmɛ pɔyɔɔdaɣna. 2 Pɔkɔma pakʋyɩ wɩsɩɖɩlɩyɛ nɛ pɛɖɛɣ lɛ, patalɩ ɛjaɖɛ ndɩ payaɣ se Siineyaarɩ yɔ ɖɩ-taa nɛ pana kɛtɛɛŋa nakɛyɛ nɛ pacaɣ ka-taa. 3 Peeye peheyi ɖama se, powolo poloo filikinaa nɛ pɔhɔbɩ-wɛ miŋ kpou tɛɛ. Pákpaɣ filikinaa ḿba ɛzɩ pɛ yɔ nɛ aŋwɔ ɛzɩ tɛtʋ ndʋ pamaɣna yɔ. 4 Pʋ-wayɩ lɛ, patasɩ ɖama heyuu se, páma ɖɩsɩ nɛ pɩ́la tɛtʋ nɛ páma kuduyuu sɔsɔʋ nakʋyʋ nɛ kɩ́kpa kíyozini ɛsɔmɩndʋ nɛ kiyele pa-hɩɖɛ sɛɛ nɛ pataamɩzɩ ɖama tɛtʋ tɩŋa yɔɔ. 5 Papazɩ maʋ lɛ, nakʋyʋ wiye KƖPAƔLƲ tii nɛ ɛna ɖɩsɩ nɛ kuduyuu sɔsɔʋ ŋgʋ ɛyaa ḿba pamaɣaɣ yɔ. 6 KƖPAƔLƲ pɩsaa lɛ, ɛtɔ se: Panɛ, pɛkɛ ɛyaa kʋɖʋmaa! Pɔyɔɔdʋʋ kʋnʋŋ kʋɖʋmʋʋ pa-tɩŋa payɩ. Pa-tʋmɩyɛ kajalaɣ ñɩnɖɛ lɛ yoo! Lɛɛlɛɛyɔ, ye paɖʋwa se, palakɩ pʋyʋ yɔ, nabʋyʋ ɛɛpɩzɩɣ pɩɖɩɣ-wɛ nʋmɔʋ. 7 Peeye ɛtɔm se ḿba etii nɛ peliɣti ɛyaa ḿba pa-kʋnʋŋ nɛ lɛlʋ ɛyɔɔdʋʋ yɔ, lɛlʋ ɛtaanɩɩ. 8 Ɖɩnɛɛ KƖPAƔLƲ ɖɔɔnɩ-wɛ peeye nɛ pese peyele pɛ-tɛtʋ ndʋʋ maʋ nɛ pamɩzɩ ɖama kedeŋa kpeekpe yɔɔ. 9 Pʋ-yɔɔ payaɣ peeye se Baabɛɛlɩ, mbʋ pʋyɔɔ yɔ, peeye KƖPAƔLƲ liɣti tɛtʋ yɔɔ ɛyaa kpeekpe kʋnʋŋ, peeye ɖɔɖɔ ɛɖɔɔnɩ ɛyaa nɛ pamɩzɩ ɖama tɛtʋ tɩŋa yɔɔ.
Sɛm liɖe taa ñɩma tɔm
10 Ɩɩnaɣ Sɛm sayɩnaa hɩla. Palʋlɩ Sɛm nɛ ɛwɛnɩ pɩnzɩ mɩnʋʋ (100) lɛ, ɛlʋlɩ abalɩbɩɣa, payaɣ-kɛ se Arɩpakɩsaadɩ. Kigiluu tɛʋ nɩwa nɛ pɩnzɩ naalɛ ɖɛɛ lɛ, ɛlʋlɩ-kɛ. 11 Arɩpakɩsaadɩ wayɩ lɛ, Sɛm tasɩ caɣʋ wezuu pɩnzɩ taŋga (500), nɛ ɛtasɩ lʋluʋ halɩbiya nɛ abalɩbiya.
12 Arɩpakɩsaadɩ kɔma ɛwɛnɩ pɩnzɩ niidozo nɛ kagbaanzɩ (35) lɛ, ɛlʋlɩ abalɩbɩɣa, payaɣ-kɛ se Sela. 13 Sela wayɩ lɛ, Arɩpakɩsaadɩ tasɩ caɣʋ wezuu pɩnzɩ nasɩnaza nɛ naadozo (403), nɛ ɛtasɩ lʋlʋʋ halɩbiya nɛ abalɩbiya.
14 Sela ñɔkɔma ɛwɛnɩ pɩnzɩ niidozo (30) lɛ, ɛlʋlɩ abalɩbɩɣa, payaɣ-kɛ se Eebɛɛrɩ. 15 Eebɛɛrɩ wayɩ lɛ, Sela tasɩ caɣʋ wezuu pɩnzɩ nasɩnaza nɛ naadozo (403), nɛ ɛtasɩ lʋlʋʋ halɩbiya nɛ abalɩbiya.
16 Eebɛɛrɩ ñɔkɔma ɛwɛnɩ pɩnzɩ niidozo nɛ naanza (34) lɛ, ɛ́lɛ ñalʋlɩ abalɩbɩɣa, payaɣ-kɛ se Peelɛɛgɩ. 17 Peelɛɛgɩ wayɩ lɛ, Eebɛɛrɩ tasɩ caɣʋ wezuu pɩnzɩ nasɩnaza nɛ niidozo (430), nɛ ɛtasɩ lʋlʋʋ halɩbiya nɛ abalɩbiya.
18 Peelɛɛgɩ ñɔkɔma ɛwɛnɩ pɩnzɩ niidozo (30) lɛ, ɛlʋlɩ Reewuu. 19 Reewuu wayɩ lɛ, Peelɛɛgɩ tasɩ caɣʋ wezuu pɩnzɩ nasɩlɛ nɛ nakʋ (209), nɛ ɛtasɩ lʋlʋʋ halɩbiya nɛ abalɩbiya.
20 Reewuu ñɔkɔma ɛwɛnɩ pɩnzɩ niidozo nɛ naalɛ (32) lɛ, ɛlʋlɩ abalɩbɩɣa, payaɣ-kɛ se Seeruugi. 21 Seeruugi wayɩ lɛ, Reewuu tasɩ caɣʋ wezuu pɩnzɩ nasɩlɛ nɛ lʋbɛ (207), nɛ ɛtasɩ lʋlʋʋ halɩbiya nɛ abalɩbiya.
22 Seeruugi ñɔkɔma ɛwɛnɩ pɩnzɩ niidozo (30) lɛ, ɛlʋlɩ abalɩbɩɣa, payaɣ-kɛ se Naahɔɔrɩ. 23 Naahɔɔrɩ wayɩ lɛ, Seeruugi tasɩ caɣʋ wezuu pɩnzɩ nasɩlɛ (200), nɛ ɛtasɩ lʋlʋʋ halɩbiya nɛ abalɩbiya.
24 Naahɔɔrɩ ñɔkɔma ɛwɛnɩ pɩnzɩ nɩɩlɛ nɛ nakʋ (29) lɛ, ɛlʋlɩ abalɩbɩɣa, payaɣ-kɛ se Teeraa. 25 Teeraa wayɩ lɛ, Naahɔɔrɩ tasɩ caɣʋ wezuu pɩnzɩ mɩnʋʋ nɛ hiu nɛ nakʋ (119), nɛ ɛtasɩ lʋlʋʋ halɩbiya nɛ abalɩbiya.
26 Teeraa ñɔkɔma ɛwɛnɩ pɩnzɩ nɩɩnʋwa nɛ nɩɩlɛ (70) lɛ, ɛlɛ ñalʋlɩ abalɩbiya naadozo. Payaɣ lɛlʋ se Abɩram, lɛlʋ se Naahɔɔrɩ nɛ lɛlʋ se Haraanɩ.
Teeraa tɔm
27 Teeraa liɖe taa ñɩma hɩla yɔ: Teeraa lʋlɩ Abɩram nɛ Naahɔɔrɩ nɛ Haraanɩ. Haraanɩ ñalʋlɩ Looti. 28 Haraanɩ lɛyɩ ɛ-caa Teeraa sɩbʋ. Ɛjaɖɛ nɖɩ ɖɩ-taa palʋlɩ-ɩ yɔ, ɖɩ-taa ɛsɩba. Payaɣ-ɖɩ se Uuri, ɖɩwɛ Kalɩdee ñɩma hɔɔlʋʋ taa. 29 Abɩram kpaɣ halʋ, payaɣ-ɩ se Saarayɩ, nɛ Naahɔɔrɩ ñakpaɣ weyi payaɣ se Milikaa yɔ, ɛ́lɛ caa lɛ Haraanɩ. Haraanɩ wɛnɩ ɖɔɖɔ pɩɣa lɛɛka, payaɣ kaka se Isikaa. 30 Saarayɩ taawɛnɩ pɩɣa, ɛɛkɛ kaalʋlaɣ.
31 Nakʋyʋ wiye Teeraa lɩwa lɛ, ɛkpaɣ ɛ-pɩyalʋ Abɩram nɛ ɛ-sɛyɩ Looti, Teeraa ɛnʋ, ɛ-pɩyalʋ Haraanɩ pɩyalʋ, nɛ e-wolu, Abɩram halʋ Saarayɩ, nɛ pakʋyɩ Uuri ɛjaɖɛ taa Kalidee ñɩma hɔɔlʋʋ taa peeye se, powoki Kanaanɩ ñɩnɖɛ taa. Pɔkɔma patalɩ tɛtʋ ndʋ payaɣ se Haraanɩ yɔ tɩ-taa lɛ, pacaɣ peeye.
32 Teeraa caɣ wezuu pɩnzɩ nzɩ yɔ, sɩkpɛndɩ nasɩlɛ nɛ kagbaanzɩ (205). Haraanɩ tɛtʋ taa peeye ɛsɩba.