5
Aɖam liɖe taa ñɩma, puwolo pɩsɩnɩ Nowee, pʋ-tɔm
1 Ɩɩnaɣ Aɖam liɖe ñɩma:
Alɩwaatʋ ndʋ Ɛsɔ maɣaɣ ɛyʋ yɔ, ɛma-ɩ nɛ ɛnɩɣzɩnɩ ɛ-maɣmaɣ. 2 Ɛma-ɩ abalʋ nɛ halʋ nɛ ɛwazɩ pɔ-yɔɔ nɛ ɛyaa-wɛ se "ɛyaa" puwiye nɖɩ ɛma-wɛ yɔ.
3 Aɖam wɛnɩ pɩnzɩ mɩnʋʋ nɛ niidozo (130) lɛ, ɛlʋlɩ abalɩbɩɣa nɛ kanɩɣzɩnɩ-ɩ, nɛ kɛwɛɛ ɛzɩ ɛ-maɣmaɣ yɔ, nɛ ɛyaa-kɛ se, Sɛɛtɩ. 4 Ɛlʋlɩ Sɛɛtɩ wayɩ lɛ, ɛtasɩ caɣʋ wezuu pɩnzɩ taŋga nɛ nasidozo (800), nɛ ɛtasɩ lʋlʋʋ halɩbiya nɛ abalɩbiya. 5 Aɖam caɣʋ wezuu kedeŋa yɔɔ cɩnɛ yɔ, pɩlɩ pɩnzɩ taŋga nɛ nasɩnaza nɛ niidozo (930), nɛ pɩcɔ ɛsɩ.
6 Sɛɛtɩ wɛnɩ pɩnzɩ mɩnʋʋ nɛ kagbaanzɩ lɛ (105), ɛlʋlɩ Enɔɔsɩ. 7 Ɛlʋlɩ Enɔɔsɩ wayɩ lɛ, ɛtasɩ caɣʋ wezuu pɩnzɩ taŋga nɛ nasidozo nɛ lʋbɛ (807), nɛ ɛtasɩ lʋlʋʋ halɩbiya nɛ abalɩbiya. 8 Sɛɛtɩ caɣʋ wezuu kedeŋa yɔɔ cɩnɛ yɔ, pɩlɩ pɩnzɩ taŋga nɛ nasɩnaza nɛ hiu nɛ naalɛ (912), nɛ pɩcɔ ɛsɩ.
9 Enɔɔsɩ wɛnɩ pɩnzɩ nɩɩnʋwa nɛ nɩɩnaza (90) lɛ, ɛlʋlɩ Keenaɣ. 10 Ɛlʋlɩ Keenaɣ wayɩ lɛ, ɛtasɩ caɣʋ wezuu pɩnzɩ taŋga nɛ nasidozo nɛ hiu nɛ kagbaanzɩ (815), nɛ ɛtasɩ lʋlʋʋ halɩbiya nɛ abalɩbiya. 11 Enɔɔsɩ kɩyakɩŋ tɩŋa kedeŋa yɔɔ cɩnɛ kpɛndɩ pɩnzɩ taŋga nɛ nasɩnaza nɛ kagbaanzɩ (905), nɛ pɩcɔ ɛsɩ.
12 Keenaɣ wɛnɩ pɩnzɩ nɩɩnʋwa nɛ nɩɩlɛ (70) lɛ, ɛlʋlɩ Mahalaalɛɛlɩ. 13 Pʋwayɩ lɛ, ɛtasɩ caɣʋ wezuu pɩnzɩ taŋga nɛ nasidozo nɛ nɩɩnaza (840), nɛ ɛtasɩ lʋlʋʋ halɩbiya nɛ abalɩbiya. 14 Keenaɣ caɣʋ wezuu kedeŋa yɔɔ cɩnɛ yɔ, pɩlɩ pɩnzɩ taŋga nɛ nasɩnaza nɛ hiu (910), nɛ pɩcɔ ɛsɩ.
15 Mahalaalɛɛlɩ wɛnɩ pɩnzɩ nɩɩnɩwa nɛ hiu nɛ kagbaanzɩ (65) lɛ, ɛlʋlɩ Yeerɛɛdɩ. 16 Yeerɛɛdɩ wayɩ lɛ, Mahalaalɛɛlɩ tasɩ caɣʋ wezuu pɩnzɩ taŋga nɛ nasidozo nɛ niidozo (830), nɛ ɛtasɩ lʋlʋʋ halɩbiya nɛ abalɩbiya. 17 Mahalaalɛɛlɩ caɣʋ wezuu kedeŋa yɔɔ cɩnɛ yɔ, pɩlɩ pɩnzɩ kagbaanzɩ fɛyɩ pɩnzɩ taŋga nɛ nasɩnaza (895), nɛ pɩcɔ ɛsɩ.
18 Yeerɛɛdɩ wɛnɩ pɩnzɩ mɩnʋʋ nɛ nɩɩnʋwa nɛ hiu nɛ naalɛ (162) lɛ, ɛlʋlɩ Henɔɔkɩ. 19 Henɔɔkɩ wayɩ lɛ, ɛtasɩ caɣʋ wezuu pɩnzɩ taŋga nɛ nasidozo (800), nɛ ɛtasɩ lʋlʋʋ halɩbiya nɛ abalɩbiya. 20 Yeerɛɛdɩ caɣʋ wezuu kedeŋa yɔɔ cɩnɛ yɔ, pɩlɩ pɩnzɩ taŋga nɛ nasɩnaza nɛ nɩɩnʋwa nɛ hiu nɛ naalɛ (962), nɛ pɩcɔ ɛsɩ.
21 Henɔɔkɩ wɛnɩ pɩnzɩ nɩɩnʋwa nɛ hiu nɛ kagbaanzɩ (65) lɛ, ɛlʋlɩ Metuuselaa. 22 Metuuselaa wayɩ lɛ, ɛ nɛ Ɛsɔ pɛwɛɛ ɖama taa pɩnzɩ nasidozo (300), nɛ ɛtasɩ lʋlʋʋ halɩbiya nɛ abalɩbiya. 23 Henɔɔkɩ caɣʋ wezuu kedeŋa yɔɔ cɩnɛ yɔ, pɩlɩ pɩnzɩ nasidozo nɛ nɩɩnʋwa nɛ hiu nɛ kagbaanzɩ (365). 24 Ɛ nɛ Ɛsɔ pɛwɛ ɖama taa. Pʋwayɩ lɛ, patatasɩɩ naʋ, mbʋ pʋyɔɔ yɔ, Ɛsɔ kpaɣ-ɩ.
25 Metuuselaa wɛnɩ pɩnzɩ mɩnʋʋ nɛ nɩɩnʋwa nɛ niidozo nɛ lʋbɛ (187) lɛ, ɛlʋlɩ Leemɛɛkɩ. 26 Leemɛɛkɩ wayɩ lɛ, ɛtasɩ caɣʋ wezuu pɩnzɩ taŋga nɛ nasɩlɛ nɛ nɩɩnʋwa nɛ niidozo nɛ naalɛ (782), nɛ ɛtasɩ lʋlʋʋ halɩbiya nɛ abalɩbiya. 27 Pɩnzɩ nzɩ Metuuselaa caɣ wezuu yɔ, sɩwɛ taŋga nɛ nasɩnaza nɛ nɩɩnʋwa nɛ hiu nɛ nakʋ (969), nɛ pɩcɔ ɛsɩ.
28 Leemɛɛkɩ ñɔkɔma ɛwɛnɩ pɩnzɩ mɩnʋʋ nɛ nɩɩnʋwa nɛ niidozo nɛ naalɛ (182) lɛ, ɛlʋlɩ abalɩbɩɣa. 29 Ɛyaa-kɛ se, Nowee, nɛ ɛtɔ se, ɛnʋ hɛzɩɣnɩ pa-laŋa. Mbʋ pʋyɔɔ yɔ, KƖPAƔLƲ wɩlɩ tɛtʋ kpalʋʋ nɛ pɔtɔkɩ kʋñɔŋ pa-tʋma taa. 30 Nowee wayɩ lɛ, Leemɛɛkɩ tasɩ caɣʋ wezuu pɩnzɩ taŋga nɛ nɩɩnʋwa nɛ nɩɩnaza nɛ kagbaanzɩ (595), nɛ ɛlʋlɩ halɩbiya nɛ abalɩbiya. 31 Leemɛɛkɩ caɣʋ wezuu kedeŋa yɔɔ cɩnɛ yɔ, pɩlɩ pɩnzɩ taŋga nɛ nasɩlɛ nɛ nɩɩnʋwa nɛ nɩɩlɛ nɛ lʋbɛ (777), nɛ pʋcɔ ɛsɩ.
32 Nowee kɛwɛnɩ pɩnzɩ taŋga (500) lɛ, ɛlʋlɩ abalɩbiya naadozo (3): Sɛm nɛ Kam nɛ Yaafɛɛtɩ.