Úngó Mósẽ ní ngoó rĩ
15
1 Kúru Mósẽ pi ní úngó ꞌdĩri ngozú ꞌbá Ĩsẽrélẽ vé rĩ pi be Úpí Múngú ní,“Ma úngó ngo Úpí Múngú ní,
ãꞌdiãtãsĩyã ĩri ní ariꞌba rĩ pi ã ũkpõ ndẽé rá rĩ sĩ.
Úꞌbé ꞌbá únjúꞌbá hũsánĩ sĩ rĩ pi
ĩvé hũsánĩ rĩ pi be céré yị̃ị́ tafu agá.
2 Úpí Múngú ri má ní ũkpõ sẽ nĩ, ãzini ĩri sẽ ma úngó ngo nĩ,
pa ma ariꞌba rĩ pi drị́gé sĩ nĩ,
ĩri mávé Múngú, ma ĩri íngú,
ĩri Múngú má ẹ́tẹ́pị vé ni, ma ĩri íngúngũ.
3 Úpí Múngú ri ꞌbá ẹ̃ꞌdị́ ꞌdịị́pi ndẽépi rá ni,
ĩrivé rụ́ Úpí ꞌi.
4 ꞌBãgú rĩ vé ãngáráwá rĩ pi ĩvé ãrãbíyã ĩ ní useése rĩ pi be,
Múngú úꞌbé kộpi Yị̃ị́ Tafu Ika rĩ agá.
ꞌBãgú rĩ vé ũgalaku ẹ̃ꞌdị́ ã tã nị̃ꞌbá múké múké rĩ pi
uꞌdekí ũdrãá Yị̃ị́ Tafu Ika rĩ agá.
5 Yị̃ị́ kụụ́pi kụkụ rĩ ĩmũlũ kộpi,
kộpi uꞌdekí áwí yị̃ị́ ã ndụ́gé ꞌdãá, sụ̃ írã ní ꞌdeé áwí yị̃ị́ ã ndụ́gé rĩ tị́nị.
6 Úpí Múngú,
mívé ũkpõ aga rá,
mívé ũkpõ
úꞌdị́ ariꞌba rĩ pi ũdrãá céré.
7 Mívé ũkpõ agaápi rá rĩ sĩ,
ꞌí ndẽ ꞌbá mi ọwụꞌbá rĩ pi rá,
jĩkó mívé rĩ sĩ,
ꞌí zã ꞌbá ꞌdĩꞌbée veé kuú úfúrágú rú, sụ̃ ásé ní veé rĩ tị́nị.
8 Ẹ̃vị̃vị̃ mívé rĩ sĩ,
yị̃ị́ rĩ aco ꞌi ngaá kuú ngẹ́njị,
yị̃ị́ riípi dịị́pi rĩ gõ ꞌi újá troó kuú ngũ,
Mị ni kụụ́pi kụkụ rĩ gõ dịị́ ku.
9 Ariꞌba rĩ pi rikí ĩ íngú kínĩ,
‘Ma kộpi ã vụ́drị̃ dro, ma kộpi urụ rá,
ma kộpivé ãꞌbú uꞌdụ kộpi drị́gé sĩ,
ma kộpi úꞌdị́ ũdrã céré,
ma mávé ị́lị́ ãco rĩ ínjé,
ma kộpi úꞌdị́ ũdrã rá.’
10 ꞌBo Úpí Múngú, ꞌí vu mívé ẹ̃vị̃vị̃,
sẽ yị̃ị́ tafu rĩ ĩmũlũ kộpi,
kộpi uꞌdekí tĩí yị̃ị́ ã ndụ́gé
sụ̃ írã ní ꞌdeé tĩí yị̃ị́ ã ndụ́gé rĩ tị́nị.
11 Úpí Múngú, múngú ãzi sụ̃ụ́pi mí tị́nị ꞌdãáyo,
Ãꞌdi adri sụ̃ mí tị́nị,
uleteretere ũkpõ be nĩ?
ꞌBá ĩ ní ruú, ãzini ĩ ní íngú sụ̃ mí tị́nị rĩ ãꞌdi ꞌi?
Ãꞌdi ri ícó tã ãyãzú ãyãyã ni ꞌo sụ̃ mí tị́nị nĩ?
12 Mí iꞌda mívé ũkpõ,
nyọ̃ọ́kụ́ rĩ zị̃ ꞌi, ute kộpi céré.
13 Lẽngárá mívé agaápi rá rĩ sĩ,
mi ꞌbá mí ní kộpi ípá rĩ pi ẽ drị̃ ko mụzú rá.
Ũkpõ mívé rĩ ícó kộpi ũtẽ
ca mívé vũrã uletere rĩ gé rá.
14 Sụ́rụ́ rĩ pi kádõ tã ꞌdĩri yịị́, ĩri sẽ kộpi ã rụ́ꞌbá ri yãyã.
Ụ̃rị̃ ri ꞌbá Fẽlẽsétẽ vé rĩ pi ị́mvụ́ ambamba.
15 Ụ̃rị̃ ri ímụ́ drị̃koma Ẽdómã vé rĩ pi ị́mvụ́ ũnjí ũnjí.
Ambugu Mõábã vé rĩ pi ímụ́ yã ambamba,
ꞌbá Kãnánã vé rĩ pi ímụ́ adri ụ̃rị́ rú,
16 ụ̃rị̃ ri ímụ́ kộpi ị́mvụ́ ũnjí ũnjí.
Úpí Múngú, ũkpõ mívé rĩ sĩ,
kộpi áwí pá tu sụ̃ írã ní pá tuú vũrãvũrã rĩ tị́nị.
Cĩmgbá ꞌbá mívé mí ní ípá rĩ pi ní agazú mụzú.
17 Mi kộpi jị mụ adri
írã mí ní adrizú rĩ drị̃gé,
Á Úpí Múngú, vũrã ꞌdãri mí ní rizú adrizú rĩ,
Á Úpí, mí údé vũrã rĩ nĩ uletere.
18 Úpí Múngú, mi ãngũ rụ
mụzú nyonyo.”
19 ꞌBá Ĩsẽrélẽ vé rĩ pi zokí fũú yị̃ị́ Múngú ní ẹ́dị́ kuú ngẹ́njị rĩ ãsámvú gé sĩ múké. ꞌBo ꞌbãgú Ẽjẽpétõ vé rĩ pi ívé ãngáráwá rĩ pi be, kộpi kâ lẽé zoó mụzú, Úpí Múngú sẽ yị̃ị́ rĩ ĩmũlũ kộpi kpụ̃kụ́ ĩvé hũsánĩ rĩ pi be, ĩvé ãrãbíyã ĩ ní rií useése hũsánĩ sĩ rĩ pi be.
Úngó Mĩrĩyámã ní ngoó rĩ
20 Mĩrĩyámã Ãrónã ọ́mvụ́pị ri nẹ́bị̃. Kúru ĩri ní kõyõ íꞌdụ́zú rizú cozú, ũkú rĩ pi ní ꞌdezú vụ́drị̃ ni gé sĩ, pí ĩvé kõyõ pi be, kộpi ní rizú úngó tuzú mụzú. 21 Kúru Mĩrĩyámã ní íꞌdózú úngó rĩ ngozú kộpi ní,
“Ĩmi ngokí úngó Úpí Múngú ri íngúzú,
ĩri ní ẹ̃ꞌdị́ rĩ ndẽé gí rĩ sĩ!
Úꞌbé ꞌbá únjúꞌbá hũsánĩ sĩ rĩ pi
ĩvé hũsánĩ rĩ pi be céré yị̃ị́ tafu rĩ agá.”
Yị̃ị́ draápi dradra Márã gá rĩ
22 Kúru Mósẽ ní ꞌbá Ĩsẽrélẽ vé rĩ pi ẽ drị̃ kozú Yị̃ị́ Tafu Ika rĩ gé ꞌdãásĩ mụzú ãngũ ãꞌwí cínyáfã rú ĩ ní zịị́ Sụ́rụ̃ rĩ gé ꞌdãá. Kộpi ẹ́cị́kí caá ụ́ꞌdụ́ na, ị́sụ́kí yị̃ị́ mvụụ́ kuyé. 23 Kúru kộpi kâ caá Márã gá ꞌdãá, kộpi ị́sụ́kí yị̃ị́ rá, ꞌbo yị̃ị́ rĩ ní draádra rĩ sĩ, kộpi mvụkí yị̃ị́ rĩ kuyé. (Zịkí ãngũ ꞌdãri ã rụ́ Márã, yị̃ị́ rĩ ní draádra rĩ sĩ.) 24 ꞌBá rĩ pi rikí unuú Mósẽ bị́lé gá kínĩ, “Mósẽ, yị̃ị́ rĩ dradra, ꞌbâ mvụkí rí ãꞌdi?”
25 Mósẽ ní Úpí Múngú rĩ zịzú ẹ́sị́ be céré. Úpí Múngú ní pẹtị ẹ̃lị́ŋá ni iꞌdazú ĩri ní. Mósẽ ní pẹtị ẹ̃lị́ŋá ꞌdĩri ꞌbezú yị̃ị́ agá ꞌdãá, yị̃ị́ rĩ gõ ícá múké, ĩ ícó mvụ rá.
Márã gá ꞌdãá, Úpí sẽ tãị́mbị́ kộpi ní, ãzini ụ̃ꞌbị̃ kộpi. 26 Kĩnĩ, “Ma Úpí Múngú ĩmivé rĩ, ĩmi yịkí dõ ụ́ꞌdụ́kọ́ mávé rĩ rá, ĩmi ꞌokí dõ tã pịrị má ẹndrẹtị gé, ãzini ĩmi ꞌdụkí dõ tã má ní ẹzịị́ rĩ ngaá rá, má ícó drã ũnjí má ní ọ́tụ́ pẽé ꞌbá Ẽjẽpétõ vé rĩ pi drị̃gé rĩ pẽé ĩmi drị̃gé ku. Ma Úpí Múngú riípi ĩmi ídrípi rĩ ꞌi.”
27 ꞌBá Ĩsẽrélẽ vé rĩ pi ní gõzú ĩ útrúzú cazú Ẽlímũ gé, vũrã ꞌdãri gé, yị̃ị́ riꞌbá ídị́ꞌbá ĩfũꞌbá nyọ̃ọ́kụ́ agálésĩ mãdã mãdã ni pi anigé mụdrị́ drị̃ ni ị̃rị̃, ãzini mbírã pẹtị vũrã ꞌdãri gé anigé pụ̃kụ́ ẹ́zị̂rị̃. Kộpi ní kúru áwízú adrizú vũrã yị̃ị́ be ꞌdãri ã gãrã gá.