Boh Hiăp Rơgơi Jing Yom Pơphan Glông Hloh
4
Ơ ƀing ană đah rơkơi kâo hơi, hơmư̆ bĕ kơ tơlơi ama pơtô laĭ,
laih anŭn pơđi̱ng tơngia bĕ kiăng kơ mă tŭ tơlơi thâo hluh.
2 Kâo pha brơi kơ ƀing gih tơlơi hrăm hiam,
tui anŭn anăm đuaĭ ataih hĭ ôh mơ̆ng tơlơi kâo pơtô laĭ.
3 Tơdang kâo jing sa čô čơđai amăng sang anŏ ama kâo,
jing kơnơ̆ng sa čô ană amĭ kâo khăp hơeng.
4 Ama kâo ăt pơtô laĭ mơ̆n kơ kâo tui anai,
“Djă̱ pioh bĕ khul boh hiăp kâo hăng abih pran jua ih;
răk pioh bĕ khul tơlơi kâo pơđar laih anŭn ih či hơdip tơpă hiam yơh.
5 Mă tŭ bĕ tơlơi rơgơi, mă tŭ bĕ tơlơi thâo hluh;
anăm wơr bĭt hĭ khul boh hiăp kâo ƀôdah wir đuaĭ hĭ mơ̆ng gơñu ôh.
6 Anăm hơngah lui hĭ ôh boh hiăp rơgơi, tui anŭn ñu či pơgang brơi kơ ih yơh;
khăp bĕ kơ ñu, tui anŭn ñu či gak wai brơi kơ ih yơh.
7 Ih khŏm mă tŭ boh hiăp rơgơi yuakơ ñu jing yom pơphan glông hloh,
sĭt tơlơi mă tŭ tơlơi thâo hluh jing yom pơphan hloh kơ mă tŭ dram gơnam yơh.
8 Pơyom đĭ boh hiăp rơgơi bĕ, tui anŭn ñu či pơdun đĭ ih yơh;
pơư pơang ñu bĕ tui anŭn ñu či pơpŭ kơ ih yơh.
9 Ñu či pioh sa kuăl bơngaa hiam rô̆ ƀơi akŏ ih
kar hăng pơyơr kơ ih sa boh đoăn guang kơdrưh kơang yơh.”
 
10 Ơ dăm, hơmư̆ bĕ laih anŭn tui gưt bĕ hơdôm tơlơi kâo laĭ,
tui anŭn khul thŭn tơlơi hơdip ih či jing hĭ lu yơh.
11 Kâo kơčrâo brơi kơ ih đuaĭ tui jơlan boh hiăp rơgơi,
sĭt kâo dui ba ih ƀơi khul jơlan tơpă brăng.
12 Tui anŭn, tơdang ih rơbat nao, khul yak ih ƀu hơmâo hơget tơlơi či dưi pơgăn hĭ ôh;
laih anŭn tơdang ih đuaĭ tañ, ih ƀu či teč tơhơneč ôh.
13 Djă̱ kơjăp bĕ boh hiăp rơgơi anŭn, anăm lui raih hĭ ñu ôh;
djă̱ pioh bĕ ñu, yuakơ ñu yơh jing phŭn kơ tơlơi hơdip ih.
 
14 Anăm mŭt amăng jơlan mơnuih sat ƀai
ƀôdah rơbat ƀơi tơlo̱ng ƀing mơnuih ƀrưh ƀai ôh.
15 Pơbĕ đuaĭ hĭ bĕ mơ̆ng jơlan anŭn, anăm mŭt amăng anŭn ôh,
samơ̆ wir đuaĭ hĭ bĕ mơ̆ng anŭn laih anŭn tŏ tui rơbat nao ƀơi jơlan tơpă ih bĕ,
16 yuakơ ƀing sat ƀai anŭn ƀu thâo đih pĭt ôh tơl ƀing gơñu ngă tơlơi ƀrưh ƀai amơĭ;
ƀing gơñu ƀu thâo pơdơi hĭ ôh tơl ƀing gơñu ngă brơi kơ arăng tơhneč rơbuh kăh.
17 Gơnam ƀơ̆ng gơñu jing tơlơi sat ƀai
laih anŭn gơnam mơñum gơñu jing tơlơi ƀrưh ƀai.
 
18 Bơ kơ mơnuih tơpă hơnơ̆ng, jơlan gơñu jing hrup hăng suai tơlơi bơngač mơguah blung hlâo,
pơčrang bơngač tui tơl yang hrơi đĭ glông.
19 Samơ̆ jơlan mơnuih sat ƀai jing hrup hăng tơlơi kơnăm mơmŏt kơpa̱l;
ƀing gơñu ƀu thâo ƀuh ôh hơget tơlơi ngă brơi kơ ƀing gơñu tơhneč rơbuh.
 
20 Ơ dăm, pơđi̱ng tơngia bĕ kơ tơlơi kâo laĭ;
hơmư̆ pơñen bĕ kơ hơdôm boh hiăp kâo.
21 Anăm brơi hơdôm boh hiăp anŭn đuaĭ hĭ ôh mơ̆ng anăp mơta ih,
samơ̆ djă̱ pioh bĕ gơñu amăng pran jua ih,
22 yuakơ gơñu pha brơi tơlơi hơdip kơ ƀing hlơi pô thâo hluh kơ gơñu,
laih anŭn jing pha brơi tơlơi hơmâo pran kơ abih drơi jan mơnuih anŭn yơh.
23 Răng pơñen hăng gak wai bĕ pran jua ih,
yuakơ mơ̆ng anŭn yơh, ia dơmun tơlơi hơdip rô tơbiă.
24 Anăm brơi kơ amăng bah ih pơhiăp ƀlŏr ôh;
laih anŭn kŏn brơi lơi tơƀông ih pơhiăp plư pleč.
 
25 Brơi bĕ mơta ih lăng tơpă nao pơanăp,
pơdŏ bĕ tơlơi gle̱ng lăng mơta ih klă̱ anăp ƀơi tơlơi kơñăm ih.
26 Pơtơhnă̱ bĕ jơlan kơ plă̱ tơkai ih
laih anŭn kơnơ̆ng rơbat tui bĕ tơlo̱ng pă kơjăp rơđah đôč.
27 Anăm wir nao gah hơnuă ƀôdah gah ieo ôh
kiăng kơ plă̱ tơkai ih ƀu wir nao rơbat tui tơlơi sat ƀai ôh.