Yahweh Jing Pô Pơgang Ta
Tơlơi adoh tơdang đĭ nao pơ Sang Yang Ơi Adai.
121
Kâo angak mơta kâo lăng đĭ ƀơi khul bŏl čư̆ laih anŭn tơña tui anai,
“Mơ̆ng anih pă tơlơi djru kâo tơbiă rai lĕ?”
2 Tơlơi djru kâo tơbiă rai mơ̆ng Yahweh yơh,
jing Pô Hrih Pơjing kơ adai rơngit laih anŭn kơ lŏn tơnah.
3 Ñu ƀu či brơi kơ tơkai ta tơbơr rơbuh hĭ amăng tơlơi rŭng răng ôh;
Pô Răng Wai brơi kơ ƀing ta ƀu či pĭt gui ôh.
4 Sĭt yơh, Pô Răng Wai brơi ƀing Israel
ƀu či pĭt gui ôh kŏn pĭt wơr hĭ lơi.
5 Yahweh yơh răng wai brơi kơ ƀing ta;
Yahweh yơh dŏ ƀơi tơngan gah hơnuă ƀing ta kar hăng tơui pơgang.
6 Tui anŭn, yang hrơi ƀu či pơruă hĭ ƀing ta ôh tơdang hrơi,
yang blan kŏn či pơrăm hĭ ƀing ta lơi tơdang mlam.
7 Yahweh či răng pơgang brơi kơ ƀing ta mơ̆ng abih bang tơlơi hyưt huĭ;
Ñu či răng wai brơi kơ tơlơi hơdip ta yơh.
8 Yahweh či răng wai brơi kơ ƀing ta tơdang ƀing ta tơbiă nao laih anŭn mŭt rai
čơdơ̆ng mơ̆ng ră anai hlŏng truh kơ hlŏng lar yơh.