Pô Pơtao Yahweh Ruah
2
Yua hơget hơmâo lu ƀing lŏn čar tuai tơgŭ đĭ pơkơdơ̆ng lĕ?
Yua hơget ƀing ană plei gơñu pơkra hơdôm hơdră mơneč đôč đač lĕ?a
2 Ƀing pơtao gơñu tơgŭ pơkơdơ̆ng,
laih anŭn ƀing khua djă̱ akŏ gơñu pơƀut glaĭ djru pơmĭn hrŏm hơbĭt,
kiăng kơ pơkơdơ̆ng glaĭ hăng Yahweh laih anŭn hăng Pô Pơtao Yahweh ruah laih.
3 Ƀing gơñu pơlaĭ hăng tơdruă tui anai, “Brơi kơ ƀing ta pơrai hĭ bĕ hrĕ čuăk gơñu akă,
laih anŭn glŏm đuaĭ hĭ bĕ tơlơi git gai gơñu mơ̆ng ƀing ta.”
4 Yahweh dŏ ƀơi grê pơtao Ñu amăng adai adih klao
laih anŭn djik djak kơ hơdôm hơdră mơneč đôč đač gơñu.
5 Giŏng anŭn, Ñu pơkơđiăng kơ ƀing gơñu amăng tơlơi hil Ñu
laih anŭn pơbra̱l hĭ ƀing gơñu amăng tơlơi Ñu hil ƀrŭk.b
6 Yahweh laĭ, “Kâo hơmâo pơkô̆ laih pơtao Kâo ƀơi Ziôn,
jing bŏl čư̆c rơgoh hiam Kâo.”
7 Pơtao anŭn laĭ, “Kâo či ruai pơhaih tơlơi Yahweh pơtă pơtăn:
“Ñu laĭ hăng kâo, ‘Ih jing ană Kâo,
sĭt hrơi anai Kâo hơmâo jing laih Ama kơ ih.d
8 Rơkâo bĕ kơ kâo, tui anŭn Kâo či brơi kơ ih git gai abih bang lŏn čar;
tui anŭn abih bang lŏn tơnah či lŏm kơ ih yơh.
9 Ih či pơrai hĭ ƀing gơñu hăng gai hơnuăt pơsơi,
laih anŭn taih pơphač hĭ ƀing gơñu hrup hăng taih gŏ lŏn yơh.’ ”e
10 Hơnŭn yơh ră anai, Ơ ƀing pơtao amăng ƀing lŏn čar hơi, brơi kơ ƀing gih hơmư̆ bĕ tơlơi rơgơi anai;
Ơ ƀing khua djă̱ akŏ amăng lŏn tơnah hơi, hrăm bĕ tơlơi pơkơđiăng anai:
11 Mă bruă bĕ kơ Yahweh hăng tơlơi huĭ pơpŭ
laih anŭn hơ̆k mơak bĕ hăng tơlơi tơtư̆ tơtơ̆ng,
12 laih anŭn bon kơkuh bĕ kơ Ñu,
huĭdah tơlơi hil Ñu či čuh đĭ tañ
laih anŭn ƀing gih či răm rơngiă hĭ yơh;
Samơ̆ mơyŭn mơak yơh kơ abih bang hlơi pô dŏ kơđap amăng Ñu.