Yakôb Hăng Sang Anŏ Ñu Nao Pơ Êjip
46
Tui anŭn, Israel mă ba abih bang hơget ñu hơmâo laih anŭn tơbiă nao; tơdang ñu truh pơ anih Beêrseba, ñu pơyơr đĭ hơdôm gơnam ngă yang kơ Ơi Adai ama ñu Isa̱k.
Čơdơ̆ng Phŭn 46:1-47:12
2 Mlam anŭn Ơi Adai pơhiăp hăng Israel amăng tơlơi pơƀuh tui anai, “Ơ Yakôb! Ơ Yakôb!” Ñu laĭ glaĭ, “Kâo yơh anai.”
3 Ơi Adai laĭ, “Kâo jing Ơi Adai, Ơi Adai kơ ama ih. Anăm huĭ ôh trŭn nao pơ čar Êjip, yuakơ Kâo či pơjing kơ ih sa kơnung djuai prŏng pơ anŭn.
4 Kâo či trŭn nao pơ čar Êjip hăng ih laih anŭn sĭt Kâo či ba glaĭ kơnung djuai ih pơ anih anai dơ̆ng. Laih anŭn Yôsêp či dŏ jĕ ƀơi djeo ih yơh tơdang ih tơĭ pran.”
5 Giŏng anŭn, Yakôb tơbiă mơ̆ng anih Beêrseba laih anŭn ƀing ană đah rơkơi ñu ba ama gơñu Yakôb wơ̆t hăng ƀing ană bă gơñu laih anŭn ƀing bơnai gơñu mŭt amăng khul rơdêh rơmok aseh, jing khul rơdêh Pharaoh mơit rai laih.
6 Ƀing gơñu ăt djă̱ ba hăng ƀing gơñu mơ̆n hơdôm dram gơnam laih anŭn tơpul hlô mơnơ̆ng rong ƀing gơñu hơmâo amăng anih Kanaan; tui anŭn Yakôb hăng abih bang kơnung djuai ñu nao pơ čar Êjip yơh.a
7 Ñu djă̱ ba hăng ñu nao pơ čar Êjip ƀing ană đah rơkơi hăng ƀing tơčô đah rơkơi ñu wơ̆t hăng ƀing ană đah kơmơi hăng ƀing tơčô đah kơmơi ñu mơ̆n laih anŭn hăng abih bang kơnung djuai ñu.
8 Anai jing khul anăn ƀing ană tơčô ană đah rơkơi Israel jing ƀing nao pơ čar Êjip hrŏm hăng ñu:
Reuben yơh jing ană kơčoa Yakôb.
9 Ƀing ană đah rơkơi Reuben:
Hanôk, Pallu, Hezrôn laih anŭn Karmi.
10 Ƀing ană đah rơkơi Simeôn:
Yemuel, Yamin, Ôhad, Yakhin, Zôhar laih anŭn Saul, jing ƀing ană mơ̆ng sa čô đah kơmơi Kanaan.
11 Ƀing ană đah rơkơi Lêwi:
Gersôn, Kehat laih anŭn Merari.
12 Ƀing ană đah rơkơi Yudah:
Êr, Ônan, Sêlah, Perez laih anŭn Zerah, samơ̆ Êr hăng Ônan djai hĭ amăng anih lŏn Kanaan.
Ƀing ană đah rơkơi Perez:
Hezrôn laih anŭn Hamul.
13 Ƀing ană đah rơkơi Issakhar:
Tôla, Puah, Yasub laih anŭn Simrôn.
14 Ƀing ană đah rơkơi Zebulun:
Sered, Êlôn laih anŭn Yahleel.
15 Anai jing ƀing ană đah rơkơi HʼLeah hơmâo rai kơ Yakôb amăng anih Paddan-Aram, gah rơngiao kơ ană đah kơmơi ñu HʼDinah. Anai jing ƀing ană đah rơkơi đah kơmơi ñu yơh, mrô yap abih bang jing klâopluh-klâo čô.
16 Ƀing ană đah rơkơi Gad:
Ziphiôn, Haggi, Suni, Ezbôn, Êri, Arôdi laih anŭn Areli.
17 Ƀing ană đah rơkơi Aser:
Imnah, Iswah, Iswi laih anŭn Beriah. Adơi đah kơmơi gơñu jing HʼSerah.
Ƀing ană đah rơkơi Beriah:
Heber laih anŭn Malkhiel.
18 Anai jing ƀing ană bă hơmâo rai kơ Yakôb mơ̆ng HʼZilpah, jing pô hlŭn Laban jao brơi kơ ană đah kơmơi ñu HʼLeah, abih bang jing pluh-năm čô.
19 Ƀing ană đah rơkơi mơ̆ng HʼRačel bơnai Yakôb:
Yôsêp laih anŭn Benyamin.
20 Amăng čar Êjip, Manasseh laih anŭn Ephraim hơmâo tơkeng rai kơ Yôsêp mơ̆ng HʼAsenat, ană đah kơmơi Pôtiphera, jing khua ngă yang pơ anih Ôn.b
21 Ƀing ană đah rơkơi Benyamin:
Bela, Bekher, Asbel, Gêra, Baaman, Êhi, Rôs, Muppim, Huppim laih anŭn Ad.
22 Anai jing ƀing ană đah rơkơi HʼRačel hơmâo tơkeng rai kơ Yakôb, abih bang jing pluh-pă̱ čô.
23 Ană đah rơkơi Dan:
Husim.
24 Ƀing ană đah rơkơi Naptali:
Yahziêl, Guni, Yêzer laih anŭn Sillêm.
25 Anai jing ƀing ană đah rơkơi hơmâo tơkeng rai kơ Yakôb mơ̆ng HʼBilhah, jing pô hlŭn Laban hơmâo jao brơi kơ ană đah kơmơi ñu HʼRačel, abih bang jing tơjuh čô.
26 Abih bang ƀing nao hrŏm hăng Yakôb pơ čar Êjip jing ƀing kơnung djuai mơ̆ng ñu pô, ƀu yap ƀing bơnai gơñu ôh, samơ̆ yap ƀing ană gơñu; abih bang jing nămpluh-năm čô.
27 Laih anŭn hăng dua čô ană đah rơkơi hơmâo tơkeng rai kơ Yôsêp amăng čar Êjip, ƀing mơnuih amăng sang anŏ Yakôb jing ƀing hơmâo nao pơ čar Êjip, abih bang jing tơjuhpluh čô.c
Yakôb Laih Anŭn Sang Anŏ Ñu Amăng Čar Êjip
28 Hlak anŭn Yakôb brơi kơ Yudah nao hlâo kơ ñu pơ Yôsêp kiăng kơ thâo jơlan nao pơ anih lŏn Gôsen. Tơdang ƀing gơñu truh pơ anih tring Gôsen,
29 Yôsêp đĭ ƀơi rơdêh aseh ñu hăng nao kơ Gôsen kiăng kơ bưp ama ñu Israel. Tơdang Yôsêp rai ƀơi anăp ama ñu, ñu kuar tơngan ƀơi jum dar ama ñu hăng hia sui biă mă.
30 Israel laĭ kơ Yôsêp, “Ră anai kâo prap pre kơ djai yơh, yuakơ kâo pô hơmâo ƀuh laih ih ăt dŏ hơdip mơ̆n.”
31 Giŏng anŭn, Yôsêp laĭ kơ ƀing ayŏng adơi ñu laih anŭn kơ ƀing sang anŏ ama ñu, “Kâo khŏm nao pơhiăp hăng Pharaoh laih anŭn laĭ hăng ñu, ‘Ƀing ayŏng adơi kâo laih anŭn ƀing sang anŏ ama kâo jing ƀing hơdip amăng anih lŏn Kanaan hơmâo rai laih pơ kâo.
32 Ƀing mơnuih anai jing ƀing wai triu; ƀing wai hlô mơnơ̆ng laih anŭn ƀing gơñu hơmâo djă̱ ba rai laih tơpul triu, tơpul bơbe laih anŭn tơpul rơmô hăng abih bang hơget ƀing gơñu hơmâo.’
33 Tơdang Pharaoh iâu ƀing ih mŭt hăng tơña, ‘Hơget bruă ƀing gih juăt ngă lĕ?’
34 Ƀing gih năng laĭ glaĭ, ‘Ƀing ding kơna ih ƀing gơmơi anai hơmâo răk wai hlô mơnơ̆ng amăng abih tơlơi hơdip gơmơi, kar hăng ƀing ơi adon gơmơi hơmâo ngă laih.’ Tơdah ƀing gih pơhiăp tui anŭn, ñu či brơi ƀing ih dŏ hơdip amăng anih lŏn Gôsen yơh, yuakơ abih ƀing wai triu jing tơlơi hơƀak drak kơ ƀing Êjip.”