Yesus nafbotin I ber Ni manglartar itw
21:1-14
1 Lama Yesus nafbotin I ber Ni manglartar monuk a ne,
I nafbotin I ber Ni manglarat a nbal na twemul Tiberias.
Ne I nafbotin I farye:
2 Na ler sa e Yesus Ni manglartar rafburat sir.
Sir a ne Simon Petrus,
Tomas ma rtar feti Didimus,
Natanael nof kote Kana ma namin propinsi Galilea,
Zebedeus angkir,
ma manglarat walyetar du a nbal.
3 Ne Simon Petrus nfalak,
“Yakw kose ma ktwi ktwuni fuat.”
Sir rfalak,
“Kam mlarat a nbal.”
Mpe rti rfangat sori.
Nempa nronram ngadoe ne nir fuat to ntey sasaf.
4 Ne ni bobolisin e Yesus namdir twemul seriny.
Nempa Ni manglartar a ne to rafai feti iane Yesus.
5 Ne I nenrat sir,
“Wangur mir inar e?”
Ne sir rfalak,
“To sasaf.”
6 Mpe Yesus nfalak ber sir,
“Mlyui mir fuat a ne far sori balisya fian!
Keta ntey inar.”
Ne rlui nir fuat rlarat safe ma nfalak a ne.
Nempa to rabut ral nir fuat a ne fali ntey inar yadin.
7 Mpe Ni manglarat ma nkamis resi i a ne nfalak ber Petrus,
“I a ne ninr Mangnrur Silai!”
Lama Petrus ndengar feti I a ne nir Mangnrur Silai,
i nasnyalik ma nfonak ni rabit fali tenany motak.
Ne nputuk far weye dalam.
8 Manglarat walyetar ma ramin sori das a ne rakleti nir fuat ma nfen ber inar a ne ma rbes far da.
Fali ain ma ramin a ne to dodo nof da,
ma fafa meter rati motak.
9 Noak ma rtompur rof sori,
sir rsalan ian ma roti na au bwaran das.
10 Ne Yesus nfalak ber sir,
“Myonr inar ketnir ma betno myonr a ne mya ye.”
11 Ne Simon Petrus nfangat far sori dalam ma nakleti fuat a ne far da.
Fuat a ne nfen ber ian silayar rati buty lim resin tel.
Boloka inar yadin nempa fuat a ne to ntarbis.
12 Ne Yesus nfalak ber sir,
“Mya ma tame!”
Nempa to fen lese nbal nof Ni manglartar a ne ma nbaran ma renrat Yesus feti ise I,
fali sir rafai feti I a ne nir Mangnrur Silai.
13 Mpe Yesus nal far lury ma nal roti ne,
ma nal ber sir ma rane.
Betno I nal ian ma nal ber sir a nbal.
14 Na lere ne Yesus nafbotin I ber Ni manglartar fen lain tel e lo,
ntabw ma I nmorip a nbali nof Ni mamate.
Yesus natanuk nor Petrus
21:15-19
15 Lama rtame monuk e Yesus nenrat Simon Petrus,
“Simon,
Yohanes anaky,
ko mkwamis Yakw botuan mlengan mof sir e?”
Petrus nfalak,
“Au Maken,
Ko mufai feti yakw kwamis Ko.”
Ne Yesus nfalak ber i,
“Ka mujake fen ngamone Ningw manglartar,
farlan mangajak domba ma najake ni dombayar.”
16 Yesus nenrat fen lain du,
“Simon,
Yohanes anaky,
ko mkwamis Yakw e?”
Ne nfalak,
“Au Maken,
Ko mufai feti yakw kwamis Ko.”
Ne Yesus nfalak ber i,
“Ka mujake fen ngamone Ningw manglartar,
farlan mangajak domba ma najake ni dombayar.”
17 Ne Yesus nenrat a nbal fen lain tel,
“Simon,
Yohanes anaky,
ko mkwamis Yakw e?”
Ne Petrus dalamy loloi fali Yesus nenrat lain tel desar.
Ne i nfalak,
“Maken,
Ko mufai safe-safe monuk.
Ma mufai feti yakw kwamis Ko.”
Ne Yesus nfalak ber i,
“Farlan farane ka mujake fen ngamone Ningw manglartar,
farlan mangajak domba ma najake ni dombayar.”
18 “Mdwengar fen ngamone safe ma kfwalak ye.
Ni botuan e noak ma lolone mutabwer e koko ko mususan a mbwali ko ma mose safe-safe motak mlwarat nim mpempeang.
Nempa noak ma mumaken e keta munrenre limar ma tomwatar rkete ko,
ma ror ko far anir ma to mpweang.”
19 Yesus nfalak farane la nafbotin felan farpe ma Petrus keta nmat nema tomwatar rdangin Ratu.
Lama Yesus nfalak farane,
I nfalak ber Petrus a nbal,
“Mlwarat Yakw.”
Yesus nfalak na Ni manglarat ma nkamis i
21:20-23
20 Noak ma Petrus nfon far mudy e i nsalan Yesus Ni manglarat ma nkamis resi i a ne nlarat sir.
(I ye ma noak ma rane tnyam faburat e namtoran a nlosir Yesus ma nenrat I feti,
“Ise ma keta nfenri Ko.”)
21 Noak ma Petrus nsalan i e i nenrat Yesus,
“Maken,
ma i ye farpe,
keta tomwatar rose farpe i?”
22 Yesus nfalak,
“Kete mdwaun i.
Farlan Yakw kmpweang ma i nmorip dedesar terik ma kmwa kbwali saryamprene,
nof lan Yakw lo.
Nempa ko e mlwarat Yakw.”
23 Mpe ibar a nsor Yesus Ni manglartar feti manglarat a ne keta to nmat.
Safo Yesus to nfalak ber Petrus feti manglarat a ne keta to nmat.
Nempa I nfalak feti farlan nmpeang ma Ni manglarat a ne nmorip dedesar terik ma nma nbali saryamprene,
iane to Petrus ni urusan.
Penutup
21:24-25
24 Ma yakw ye manglarat a ne lo.
Yakw ye ma kusaur ma kurengi safe-safe monuk na Yesus.
Ma kmi mifai feti koko yakw kswalan desar ngriar monuk a ne,
mpa yakw kurengi ngriar monuk a ne na kitap ye.
Ma kmi mifai feti safe ma kfwalak a ne botuan.
25 Lolone ngriar yadin a nbal ma Yesus nose.
Nempa farlan rarengi leles mpane e yakw kdwaun feti keta saryamprene ye to dengan ma rnau kitpar ma rarengi ne.