Tnyanuk pupule na mangajak domba ma nangafel
10:1-21
1 Yesus nasaur tnyanuk pupular sa ber tomwat Farisyar.
I nfalak,
“Mdyengar fen ngamone safe ma kfwalak ye.
Ni botuan e ise ma nti dombayar nir owe dalam,
nempa to nalyole fofolat ma nkafar tembok,a
iane mangamnange nre tomwate ma nribut tomwatar ma nal nir kabanir.
2 Nempa tomwate ma nti dalam e nalyole fofolat,
iane feti mangajak domba.
3 Ma tomwate ma najake fofolat a ne,
keta nbanril fofolat ber i.
Ma noak ma nti dalam e i ntar dombayar a ne ngarnir mpane.
Ne sir rdengar liriny mpa rlarat i ma nrure sir far burit.
4 Lama nalin monuk ni dombayar far burit e i nmpan a nbalun ma dombayar a ne rlarat i rof mudy fali rserap liriny.
5 Ma farlan tomwat walyetar rtar sir e keta to rlarat nempa rafla rtate sir fali to rserap lirnir.”
6 Yesus nasaur tnyanuk pupule ne ber sir,
nempa to rkaul ral feti I nasaur tnyanuk pupule ne ber sir ma fen safe.
7 Mpa Yesus nfalak a nbal,
“Mdyengar fen ngamone safe ma kfwalak ye.
Ni botuan e Yakw ye farlan fofolat ber dombayar ma rti e mae sir.
8 Tomwatar monuk ma rma baluan rof Yakw,
sir farlan mangamnangar ma tomwate ma nribut tomwatar ma ral nir kabanir.
Sir rtar dombayar a ne nempa keta to rlarat sir.
9 Yakw ye farlan fofolat.
Mpa ise nmpeang ma nti dalam nalyole Yakw,
keta kujake i fen ngamone nema to sasaf diat i.
Iane farlan dombayar ma rtiemae sir ralyole fofolat a ne ror ngamone,
ma rtame na ain ma urwar ramin.
10 Mangamnange nma e,
i nanriak lan ma namnang,
nafen,
ma nafyatak tomwatar nir momorip.
Nempa Yakw kmwa e kose ma ronri momorip dedesar ma berkat ma nlie nlengan.”
11 Yakw ye farlan mangajak domba ma nangafel.
Mangajak domba ma nangafel e i nmat la nlitan ni dombayar.
12 Nempa tomwate ma rsewe i ma najake dombayar,
i to neluk mangajak domba mpa to najake dombayar a ne fen ngamone.
Ma noak ma nsalan asw alas nma e,
i nafla ntate dombayar a ne,
mpa keta asw alas ne nakramas ketnir nwayat ma rafla buiyefar sir.
13 Tomwate ne nafla fali i nkarya ma nanriak lan sewe,
mpa to nsalan fen ngamone dombayar a ne.
14-15 Yakw ye farlan mangajak domba ma nangafel.
Amangw nafai Yakw feleles farlan ma Yakw kufai Amangw.
Iane feleles farlan ma kufai Ningw dombayar ma sir rafai Yakw nbal.
Ma kmwat ber sir.
16 To lan Ningw dombayar ma ramin ye,
nempa Ningw dombayar ma ramin ain walyetar a nbal.
Ma ka Yakw knrure sir a nbal ma keta rdengar liringw.
Mpa Ningw dombayar ma ramin iano keta rabut sir ror Ningw dombayar na ye,
ma koko Yakw kweluk mangajake ma kujake sir monuk.
17 Amangw nkamis Yakw,
fali kunrenre Yakw ma kmwat nema bise ma kmworip a kbwali.
18 To tomwate fen lese nbal ma bise nfen Yakw,
farlan to kwinrang ma kmwat.
Ma farlan kwinrang ma kmwat betno tomwatar bise ma rfen Yakw.
Ma Ningw kuase ma kmwat ma kmworip a kbwali nbal.
Iane farete ma Amangw nal ber Yakw.
19 Noak ma mangfaret Yahudyar rdengar ma Yesus nfalak farane sir rabangal.
20 Tomwatar yadin nof sir a ne rfalak,
“I nfukat,
mpa kete mdyengar I fali smwangat yatak nsung I lo.”
21 Nempa ketnir a rfalak,
“Tate,
tomwatar ma smwangat yatak nsung sir to ratanuk farane.
Ma smwangat yatak to bise ma nafngamone matbole nre!”
Tomwat Yahudyar to ryoding feti Yesus ye Ratu Anaky
10:22-42
22 Noak a ne nuse nrinririn.
Ma ni tewat ma tomwatar na Yerusalem rose ler silai la ranremi rbali ma rtabis Ratu Ni Das Silai luryain a ne.
23 Ne Yesus nmpan a nlole anir sa na Ratu Ni Das Silai ma rtar feti Siflyoi Salomo.
24 Ne tomwat Yahudyar rma ma rakmat Yesus ma rkolu I ma rfalak,
“Maken,
bengfir a betno mufbotin ber kam feti ise Ko botuan nema kete mdaun lo.
Ma farlan botuan feti Ray Silai Ko e mfwalak desar ber kam.”
25 Ne Yesus nfalak ber sir,
“Yakw kfwalak ber a kmi lo,
nempa to milele Yakw.
Yakw kose kabain mpasalnar kor Amangw Ni kuase la kfwatutu feti ise Yakw.
26 Nempa to milele Yakw,
fali kmi to myeluk Ningw dombayar farlan ma kfwalak ber a kmi a ne.
27 Ningw dombayar rdengar liringw,
mpa rlarat Yakw ma kufai sir a nbal.
28 Ma kal momorip dedesar ber sir ma rlarat Yakw a ne mpa keta to rmat terik ma dedesar.
Ma to tomwate fen lese nbal ma bise nal sir nof Yakw.
29 Ma Amangw ma nal sir ber Yakw.
I Ni kuase ma nlie nlengan nof safe-safe monuk.
Ma to tomwate fen lese nbal ma bise nal sir nof Amangw.
30 Kam madu Amangw ye lese.”
31 Mpe tomwat Yahudyar ral batyar la rakjai rfen Yesus a nbal.
32 Nempa Yesus nfalak ber sir,
“Kmi msyalan kabain ngamonar yadin ma kose ber a kmi lo.
Ma Yakw kose kabanir a ne kor Amangw Ni kuase.
Mpa kabain ngamon mpeye ma nose ma mikjai Yakw ye?”
33 Ne tomwat Yahudyar a ne rfalak,
“Tate,
kabain ngamonar yadin ma Ko mose ne to nwayat ma makjai Ko.
Nempa fali Ko murikan Ratu.
Ma tomwat biase motak Ko ma mose felam farlan Ratu.”
34 Ne Yesus nfalak,
“Rarengi na mir Kitap Lelerap dalam farye,
‘Kmi monuk a ne feleles farlan ratwar.’
35 Kit tafai feti safe ma rarengi na Kitap Lelerap dalam,
tomwatar to bise ma rlikur.
Ma Kitap Lelerap nfalak ber tomwatar ma rdengar Ni ngribatnir a ne feti sir feleles farlan ratwar.
Nempa Yakw e klwengan kof sir a nbal.
36 Fali Ratu nfil Yakw ma nsiduk Yakw ma kmwa saryamprene.
Mpa safema mfyalak feti Yakw kurikan Ratu noak ma kfwalak feti Ratu Anaky Yakw?
37 Nempa farlan to kwaryae karyayar ma Amangw nal ber Yakw,
ka kete milele Yakw.
38 Nempa farlan Yakw kwaryae karyayar ma Amangw nal ber Yakw a ne,
ni botuan e ka milele Yakw na safe ma kose ne.
Boloka to milele Yakw,
nempa ka milele feti safe ma kose ne nof Ratu.
Farlan kmi milele karyayar ma Yakw kose ne,
ni botuan keta mkyaul myal feti kam madu Amangw ye dalmyamar lese.”
39 Lama Yesus nfalak farane tomwat Yahudyar rose ma romat I a nbal,
nempa I nti a ntate sir.
40 Ne Yesus nbali I far wer Yordan balisya nbal ma namin iane.
Ain a ne ma luryain e Yohanes nadiris tomwatar na.
41 Na iane tomwatar yadin rma ma rakmat Yesus ma rfalak,
“Yohanes to nose ngrimpasalan fen lese nbal,
nempa safe-safe monuk ma nfalak na tomwate ye botuan.”
42 Iane nwayat ma tomwatar yadin ma ramin iane ralele Yesus.