Yesus natanuk ber Nikodemus na Yerusalem na momorip dedesar
3:1-21
1 Tomwat sa ngarany Nikodemus.
I ye tomwat Farisi ma neluk mangfaret agame Yahudi.
2 Na nronram sa e i nti nakmat Yesus ma nfalak,
“Tuangguru,
kam mafai feti Ratu nsiduk Ko ma muftutu kam,
fali to tomwate fen lese nbal ma bise ma nose kabain mpasalnar neluk faniak far ma Ko mose ne,
farlan Ratu to nor i.”
3 Ne Yesus nfalak,
“Mdwengar fen ngamone safe ma kfwalak ye.
Ni botuan e farlan to ramtoranbabe rbali kmi e keta Ratu to neluk Rai ma nfarete kmi a na mir momorip.”
4 Ne Nikodemus a nfalak,
“Farpe a?
Tomwate ma namaken lo bise ma ramtoranbabe rbali i e?
Ma i nose farpe ma nsung a nbali far enany kampuny dalam ma namtoranbabe nbali i?”
5 Mpe Yesus nfalak ber Nikodemus,
“Mdwengar fen ngamone safe ma kfwalak ye.
Farlan to ramtoranbabe tomwatar sa nof weye ma Ratu Smwangtany,
ni botuan e keta Ratu to nfarete neluk Rai na ni momorip.
6 Eninrar amninrar ramtoranbabe tomwatar kit.
Nempa Ratu Smwangtany ma nal momorip beberi ber smwangtinrar.
7 Mpa kete mimpriang farlan Yakw kfwalak feti ka ramtoranbabe rbali kmi monuk.
8 Contoh farlan mnaur.
Kmi bise ma mdyengar motak nempa kmi to mifai feti mnaur a ne nof mpe nre nal far mpe.
Feleles farlan tomwatar ma Ratu Smwangtany nal momorip beberi ber sir.
Kmi to mifai feti Ratu nkarya na dalmir farpe,
nempa bise ma msyalan Ratu Smwangtany nof mir wewelmpampane.”
9 Ne Nikodemus a nfalak,
“To kufai feti Ko mfwalak safe ne?”
10 Ne Yesus nfalak,
“Ko ye tomwat Israelar nir tuangguru ber ko a ma,
safema to mkwaul mal safe ma kfwalak ye?
11 Mdwengar fen ngamone safe ma kfwalak ye.
Ni botuan e kam mfalak safe ma kam mafai,
ma kam mafbotin safe ma kam msalan,
nempa kmi to milele safe ma kam mfalak ye.
12 Noak ma kfwalak na momorip saryamprene motak e to milele.
Ma keta kfwalak na momorip surga e milele e?
13 To tomwate fen lese nof a kmi ye ma nti surga fuky,
lan Yakw Tomwate Anaky ma ktwompur kof surga ma kmwa saryamprene.
14 Luryain e Musa nose kasi nof tembaga ma ntikloi na katutnwar sa ma nafdiri na ain letkape.
Feleles a nbal farlan Yakw Tomwate Anaky,
ma tomwatar rtikloi Yakw na katutun sangwalu*.
15 Nema tomwatar ma ralele Yakw,
keta ronri momorip dedesar.
16 Ratu nkamis resi tomwatar na saryamprene ye.
Iane nwayat ma nal Anaky lolmesan,
nema tomwatar monuk ma ralele Anaky a ne to rmat dedesar nempa ronri momorip dedesar.
17 Fali Ratu to nsiduk Anaky ma nma saryamprene ye ma nukun tomwatar,
nempa nma ma nfair sir nof nir salar.
18 Mpa ise ma nalele Yakw Ratu Anaky,
keta Ratu to nukun i.
Nempa ise ma to nalele Yakw,
keta Ratu nukun i fali to nalele Ratu Anaky lolmesan.
19 Ratu nukun saryamprene fali farye:
I nsiduk Anaky ma nma saryamprene ye ma neluk ngaodir ber tomwatar,
nempa tomwatar rmpeang lan ma rmorip a na makrokap dalam nlengan nof ma rmorip a na ngaodir dalam,
fali rose lan kabain yatkar.
20 Tomwatar ma rose lan kabain yatkar e sir to rmpeang ngaodir.
Sir to rmpeang ma rmorip a na ngaodir dalam nema tomwatar kete rsalan nir adat yatkar ma rose ne.
21 Nempa tomwatar ma rose kabain botunar e sir rmpeang ngaodir a ne.
Fali ngaodir a ne la nfatutu feti safe ma sir rose ne rlarat Ratu Ni mpempeang.”
Yohanes mangadiris nfalak na Yesus
3:22-36
22 Ni lerar fir a ne rsak e Yesus nor Ni manglartar rti propinsi Yudea.
I namin iano lerar fir a ne nor sir ma nadiris tomwatar.
23 Yohanes nadiris tomwatar a nbal na kote Ainon ma nlosir kote Salim a ne,
fali na iane weye silai.
Ma tomwatar yadin rma ma rtak Yohanes ma nadiris sir.
24 (Fali noak a ne tomwatar to rnau Yohanes na sel a fuky.)
25 Ler sa e Yohanes ni manglartar raale sir ror tomwat Yahudi sa.
Sir raale sir a na Yahudyar nir yayatur agame na ma raflerap tenir.
26 Ne Yohanes ni manglartar a ne rma ma rakmat i ma rfalak,
“Tuangguru,
ko munremi tomwate ma nor ko a na wer Yordan balisya ne nre tate?
Tomwate ne ma ko mfwalak i ber kam lo.
Lere ye nadiris tomwatar a nbal,
ma tomwatar yadin rma ma rakmat I.”
27 Ne Yohanes nfalak,
“Farlan Ratu to nal kuase ber tomwatar e keta to fen lese nbal ma bise nose safe-safe ma farane.
28 Kmi lolone minremi noak ma kfwalak ber a kmi feti to Ray Silai yakw,
nempa Ratu nsiduk yakw ma kbwalun,
ma kuflerap dalamtene ber I.
29 Contoh farye,
merwanar sa ma nose ma nafsau nor ni tnyiman.
Ne ni tbwariny namdir a nlosir i ma ndengar ma natanuk e nsenang resi.
Yakw ye farlan merwane ma nafsau ne tbwariny.
Mpa yakw kswenang resi noak ma kdwengar ma I natanuk.
30 Yesus ye ma ka tomwatar rafdas I,
nempa yakw e ka rafufu yakw.
31 Yesus ye ma nma nof surga,
mpa silai I a nlengan nof tomwatar monuk.
Ma tomwatar kit ye tof saryamprene motak.
Mpa ninr adat farlan tomwat saryamprenar ma tfalak lan kabanir na saryamprene.
Nempa Yesus ye nma nof surga mpa I nlengan nof tomwatar monuk.
32 I nfalak na safe-safe monuk ma ndengar ma nsalan na surga,
nempa tomwatar lan du ma ralele safe ma nfalak a ne.
33 Nempa tomwatar ma ralele safe ma I nfalak a ne,
iane feleles farlan ma ryoding feti safe ma Ratu nfalak a ne botuan.
34 Yesus ye ma Ratu nsiduk I ma nafwibar Ni Ngribatnir.
Ma Ratu nal Ni Smwangtany ma nkuase I dedesar.
35 Amninrar Ratu nkamis desar Anaky,
ma nal kuase ber I ma nkuase safe-safe monuk.
36 Mpa ise ma nalele Ratu Anaky,
iane feti nonri momorip dedesar lo.
Nempa ise ma to nose nlarat safe ma I nfalak,
keta to nonri momorip dedesar,
ma Ratu nukun i dedesar.”