Ibar Ngamone nof
Yohanes
Yesus ye Ratu Ni Ngribatnir ma nal momorip ber tomwatar
1:1-18
1 Luryain e noak ma saryamprene to namin a fuky, Tomwat sa ma rtar feti Ratu Ni Ngribatnir a ne namin lo.
Ma I dedesar ma nor Ratu.
Ma I a ne Ratu nbal.
2 Luryain e noak ma saryamprene to namin a fuky, Ratu Ni Ngribatnir a ne dedesar ma nor Ratu.
3 Ma nof Ni Ngribatnir a ne Ratu nose safe-safe monuk.
Ma farlan Ngribatnir a ne to ramin, to fen lese nbal ma Ratu nose.
4 Ratu Ni ngribatnir a ne ma nal momorip ber tomwatar monuk.
Ma I neluk ngaodir a nbal la nodir tomwatar dalmir.
5 I neluk ngaodir na makrokap dalam,
nwayat ma makrokap a ne to nfedam nal ngaodir a ne.
6 Ler sa e Ratu nsiduk tomwat sa ngarany Yohanes.
7 Ratu nsiduk i ma nafwibar ibar botuan na Tomwate ma neluk ngaodir a ne.
I nose farane nema nof safe ma nafwibar a ne tomwatar monuk ralele Tomwate ne.
8 Yohanes a ne to neluk ngaodir,
nempa i nma ma nafwibar na Tomwate ma neluk ngaodir a ne.
9 Fali Tomwate ma neluk ngaodir ma botuan a ne nma saryamprene lo.
Ma I ye ma keta nodir tomwatar dalmir mpane.
10 I namin saryamprene lo,
ma Ratu nose saryamprene ye nalyole I,
nempa tomwatar na saryamprene ye to rafai I.
11 I nma Ni nuse ompak
nempa Ni tomwatar to rlangun I.
12 Nempa tomwatar monuk ma rlangun I,
keta nal kuase ber sir nema reluk Ratu angkir.
Sir a ne ma ralele I.
13 Sir reluk Ratu angkir to nof ma enir amnir ramtoranbabe sir. Ma to nof ma ene sawe nir mpempeang,
nempa Ratu koko I a nal sir ma reluk Ni angkir.
14 I ma rtar feti Ratu Ni ngribatnir a ne neluk tomwate lo
ma nmorip nor kit.
Ma kit tsalan Ni kuase ma nlie nlengan a ne.
I nonri kuase ne nof Ratu, fali I neluk Anaky lolmesan.
Ma nof I, kit bise ma tafai kabain botunar na Ratu,
ma tsalan Ratu Ni dalamy ngamone ma nfatutu ber kit.
15 Noak ma Yohanes nafwibar na Tomwate ne,
i nfalere ma nfalak: “Tomwate ye ma kfwalak ber a kmi lo feti,
yakw kmwa baluan betno keta I nlarat yakw.
Nempa Ni kuase silai nlengan nof yakw,
fali noak ma to kumin saryamprene fuky e I namin lo.”
16 Ma I nfatutu Ni dalamy ngamone ma nlie nlengan ber kit,
nof ma nal berkat ma to terik ber kit a ne.
17 Fali Ratu nal Ni tetetkar ber kit nalyole Musa la nfarete kit.
Nempa kit tafai kabain botunar na Ratu
ma Ni dalamy ngamone nalyole Yesus ninr Ray Silai.
18 To tomwate fen lese nbal ma nsalan Ratu fuky,
lan Anaky lolmesan ma dedesar e nor Amany.
I ye ma nafbotin na Amany ber kit.
Yohanes mangadiris nafbotin feti ise i botuan
1:19-28
19 Na ler sa, mangfaret Yahudyar ma rof Yerusalem rsiduk nir mangsompar ketnir ma tomwat Lewiar ma rti rakmat Yohanes. Sir rti rakmat Yohanes ma renrat feti ise i.
20 Yohanes to nlepusuk ma nfalak desar ber sir, “Yakw to Ray Silai yakw.”
21 Ne sir renrat a nbal, “Farlan farane, ise ko, Elia e?”
Ne nfalak, “Tate!”
Ne sir renrat I a nbal, “Ko ye nabyar sa ma Ratu nyoding i a ne e?”
Ne nfalak, “Tate!”
22 Mpe sir renrat a nbal, “Botuan e ise ko? Nema bise ma mafbotin ko ber sir ma rsiduk kam a ne. Mpa nof ko e ise ko?”
23 Ne Yohanes nfalak,
“Yakw ye ma kfwalere na ain letkape
nema tomwatar raflonri dalamtene ber ninr Mangnrur Silai, iane farlan ma nabi Yesaya nfalak.”
24 Nof tomwatar ma renrat Yohanes a ne, ketnir e tomwat Farisyar sir. 25 Sir rfalak, “Farlan to Ray Silai ko, to Elia ko, nre to nabi ko e, safema ko mudiris tomwatar?”
26 Ne Yohanes nfalak, “Yakw kudiris a kmi kor weye, nempa Tomwat sa ma nor a kmi a ne, ma to mifai I. 27 Yakw ye ma kmwa baluan kof I, betno keta I nlarat yakw. Nempa ktwatar Ni sabatwem firsir motak e to ubangw fali Ni kuase silai nlengan nof yakw.”
28 Safe-safe monuk a ne Yohanes nfalak na pnu Betania, na wer Yordan balisya. Iane ain ma i nadiris tomwatar.
Yesus neluk Ratu Ni Domba Anak ma nmat la ntebus tomwatar nof nir salar
1:29-34
29 Ni bobole e Yohanes nsalan ma Yesus nakmat i. Ne Yohanes nfalak, “Mswalan Ratu Ni Domba Anak a ne, I ye ma keta nmat la nkes kalin tomwatar na saryamprene nir salar.” 30 I ye ma kfwalak ber a kmi lo feti yakw kmwa baluan betno keta I nlarat yakw. Ma Ni kuase silai nlengan nof yakw fali noak ma to kumin saryamprene fuky e I namin lo. 31 Luryain e to kufai I. Nempa Ratu nsiduk yakw ma kmwa ma kudiris tomwat Israelar kor weye nema rafai feti I a ne Ray Silai.
32 Ma Yohanes nfalak a nbal, “Yakw kswalan desar ma Ratu Smwangtany nof langit ma nose felan farlan manik merpati ma ntompur I. 33 Noak a ne to kufai I, nempa Ratu ma nsiduk yakw ma kudiris tomwatar kor weye ne nfalak ber yakw feti, farlan ko mswalan ma Ratu Smwangtany ntompur tomwatar sa ma namin I, I a ne ma keta nadiris tomwatar nor Ratu Smwangtany. Nof a ne betno kufai I. 34 Ma yakw kswalan desar kabanir monuk a ne, mpa kfwalak ber a kmi feti I ye Ratu Anaky.”
Tomwatar ma rlarat Yesus baluan
1:35-42
35 Ni bobole e Yohanes nor ni manglartar du ramin ain a ne nbal. 36 Noak ma i nsalan ma Yesus nlanre e nfalak, “No msyalan, I a ne Ratu Ni Domba Anak!”
37 Ne Yohanes ni manglartar du a ne rdengar safe ma nfalak, mpa rlarat desar Yesus. 38 Nempa Yesus nmange I ma nsalan e sir rlarat I, mpa nenrat, “Myose safe ye?”
Ne sir rfalak, “Tuangguru ali Ko mumin mpe?”
39 Ne nfalak ber sir, “Mya ma msyalan!” Mpe sir rlarat Yesus ma rsalan ain ma I namin a ne. Ma noak a ne lere da lo fafa jam empat, mpa raktem a ramin iane.
40 Nof radu a ne, sa ngarany Andreas. I ndengar safe ma Yohanes nfalak mpa nlarat Yesus. I ye Simon Petrus wainy. 41 Ne i nti nakmat desar wainy Simon ma nfalak, “Kam mtungan Ray Silai lo!” 42 Mpe i nor Simon ber Yesus.
Lama Yesus nsalan Simon e nfalak, “Simon ko ye Yohanes anaky, keta tomwatar rafngare ko a na Kefas.” (Kefas na Yunani liriny nfalak feti Petrus, ma isiny feti bat fakoran.)
Yesus nfil Filipus ma Natanael ma reluk Ni manglarat
1:43-51
43 Ni bobole e Yesus ntetak ma nti propinsi Galilea. Ne I natungan nor Filipus ma nfalak ber i, “Filipus, mwa ma mlwarat Yakw!” 44 Filipus ye nof kote Betsaida. Andreas ma Petrus rof kote ne nbal. 45 Ne Filipus natungan nor Natanael ma nfalak ber i, “Kam mtungan tomwate ma Musa narengi na tetetkar ma luryain e Ratu nal ber i, ma nabyar rafbotin na I a ne lo. Tomwate ne ngarany Yesus, I nof Nasaret. I ye Yusuf anaky.”
46 Nempa Natanael nfalak ber Filipus, “Farpe a? Nasaret a ne pnue anak motak a ma kabain ngamonar rma desar rof iane e?”
47 Ne Filipus nfalak, “Mwa ma mswalan!” Mpe radu a rti rakmat Yesus. Noak ma Yesus nsalan Natanael nma ma nakmat I e nfalak, “No msyalan tomwate ye, i ye tomwat Israel botuan. Ma i to nafai ma nlepusuk tomwatar.”
48 Ne Natanael nfalak ber I, “Ali Ko mufai yakw mof mpe?”
Mpe Yesus nfalak, “Noak ma Filipus to ntar ko a fuky e Yakw kswalan ko a na katutun ara lebaban lo.”
49 Ne Natanael nfalak, “Tuangguru, Ko ye Ratu Anaky, ma Ko ye tomwat Israelar nir Rai.”
50 Lama Yesus ndengar farane I nfalak, “Ko mulele Yakw fali kfwalak feti kweban ko a na katutun ara lebaban e? Keta ko mswalan kabain silayar nlengan nof a ne nbal.” 51 Ne Yesus nfalak a nbal, “Mdwengar fen ngamone safe ma kfwalak ye. Ni botuan e keta mswalan langit ma ntakbanril ma Ratu Ni malaektar rti e mae sir ma rakmat Yakw, Tomwate Anaky.”