Inyarubha ya kasatu ya
Yowana
Obhukeesya
1
1 Anye omukaruka waawo mu‑riikirisya, enikukaamira awe Gaayo omwendwa waani. Chimari nikwendere.2 Woori, omwendwa waani, enikusabhirwa ubhe na amabhando maafu mu‑bhurame bhwawo. Ka wone enikusabhirwa ubhe na obhuwanga bhwa omubhiri gwawo, rwa bhunu uri nabhwo mu‑mutima gwawo. 3 ꞉Naakondeeywe muno, abheejaasu abharebhe, bhejire bhaaja enu nibhambwira ati awe uri mwiyikanyibhwa mu‑chimari na owuruubha echimari. 4 Chitari‑wo echiinu chinu echinkondisya muno, okukira okuungwa ati abhaana bhaani mu‑riikirisya abhagenderera okuruubha echimari.
Obhwiyikanyibhwa bhwa Gaayo
5 Mbe, omwendwa waani, awe uri omwiyikanyibhwa ku‑Nyamuwanga ku‑jinu owukorera abheejaasu, noorwo kutyo ni abhagenyi kw‑awe. 6 Abhaanu bhanu ꞉waasakiiye nibho bhaachibhwira, eswe abheekirisya bha endanu, inguru ya eryenda ryawo. Woori, enikwirembeeresya, genderera okubhasakira ebhiinu bhinu abhakena rwa kutyo ejikondera Nyamuwanga, korereki bhagenderere na orugendo rwebhwe. 7 Bhasakire, kwa okubha ꞉bhaambire orugendo orwa okuraasya Yeesu Kirisito, bhatabhwene obhusakisi bhwonebhwone okusooka ku‑bhaanu bhanu bhatari bheekirisya. 8 Kurwa ejo, eswe wone, echikenwa okusakira abhaanu rwa abho. Kwa okukora kutyo, echibha chisangiiye aamwi nabho ku‑mirimu ja okuraasya echimari.
Diyotiriife omutaamutaamu na Demetiriiyo omuunu wa ekisi
9 Mbe, ꞉naakaamiiye rikanisa inyarubha, nawe Diyotiriife unu keetuura imbere wuti niwe omutangasya weebhwe, atakuchigayukaga. 10 Kurwa ejo, aribha naaja eyo, niryayika joone jinu kaakora. Nirituura ku‑bhweru obhutaamutaamu bhwaye na emibhiibhi joone jinu kaayika inguru yeeswe. Jitari ejo era, tari kaarema okukuma abheejaasu bhanu bhari mu‑rugendo. Ka wone abheekirisya abhandi bhanu abheenda okubhakuma, kaabhagaanya na kaabhabhirimya bhasooke mw‑ikanisa.
11 Woori, omwendwa waani Gaayo, waasiga okuruubha echijekekanyo echibhiibhi, tari echijekekanyo cha ekisi. Omuunu woonewoone unu kaakora ja ekisi, oyo ni mwana wa Nyamuwanga. Nawe unu kaakora ebhibhiibhi, atakusombookerwa ati Nyamuwanga niga.
12 Abhaanu bhoone abhakuuya Demetiriiyo, abhaayika ati ni muunu wa ekisi. Kaaruubha echimari cha Nyamuwanga mu‑bhurame bhwaye. Noorwo eswe wone, echaayika ati ni muunu wa ekisi. Awe omwene, owumenya ati obhubhambaasi bhweswe ni bhwa echimari.
Obhukeesya bhwa obhuteero
13 Niri na emisango myafu ja okukubhwira, nawe nitakwenda okukukaamira ku‑rupapura era. 14 Tari, eniiyikanya okukugosorera bhwangu na okwayika aamwi na awe chibhuganganyiisye ameeso.
15 Woori, omurembe gubhe aamwi na awe. Abhasaani bhaawo bha endanu abhakukeesya. Awe wone, enikusabhwa uchikeesisye abhasaani bheeswe eyo, wumwiumwi kw‑isiina ryaye.