ꂘꅇꇐꀳ 13

ꉪꑌꌧꋬꌠꉙꅇꂘꅇꆹꀑꇬꇁꀦꉬ

1 ꉪꑌꌧꋬꌠꌳꃈꅮꆹꀉꄉꉙꅇꂘꅇꅲ；

ꊿꒈꊿꈧꇬꎷꌠꆏꊨꅇꂘꅇꀋꅲ。

2 ꊿꈂꀸꂄꌠꉉꌠꆏ，ꂄꇁꎔꌠꊌ；

ꊿꐈꊿꋑꌠꆏꊋꃷꇱꄉꊾꊝꌠꉪꏡꐺ。

3 ꈂꀸꋓꉪꁨꄉꅇꉉꌠꆏ，ꊨꏦꀑꇬꀧꌋꃅꄎ；

ꈁꐞꏅꄉꇫꄏꇬꎷꌠꆹ，ꀋꎪꃅꄉꈔꑍꁧꌠꉬ。

4 ꊿꐵꑷꑓꀠꀕꌠꉌꂵꂸꉪꇐꉨꑴꇬ，ꑞꍈꑌꊌꀋꄐ；

ꊿꑘꃅꃤꑽꉔꌠꆹꀋꎪꃅꉌꂵꈁꉪꌠꇎꐯꇎꃅꊌ。

5 ꑖꊿꆹꈱꅇꏅꅇꌁꑷ；

ꊿꄸꃅꐨꆹꊽꑊꏦꎲꄏ。

6 ꃅꐨꊒꆽꀕꌠꆹ，ꑖꉬꋋꀧꌋꃅ；

ꄸꃅꅠꑽꌠꆹ，ꑽꃤꆼꁏꇂꃴꊐ。

7 ꌣꀋꈚꀕꎴꃅꌠꆹ，ꁨꅍꇤꀠꀕ；

ꌣꀋꎭꎬꎴꃅꌠꆹ，ꎆꋚꀉꑌꃅꐥ。

8 ꌣꈚꌠꆹꎆꌌꋍꀑꇬꋊꉆ；

ꄚꌢꎭꌠꆹꊿꋋꇷꋌꇋꌠꀋꐥ。

9 ꑖꊿꁨꑭꐝꇅꀕ，

ꊿꄸꂷꇭꆈꋧꋪ。

10 ꆺꒉꄇꒉꇬꆹ，ꐮꏈꐯꅒꌠꇫꅐꇁ；

ꉙꅇꂘꅇꅲꌠꆏ，ꌧꅍꂿꅍꊌꌠꉬ。

11 ꀋꎴꀋꈻꎆꆹꌫꅉꑍꅉꑟ；

ꈪꑌꇔꍣꎅꆹꏓꅉꇱꅉꑟ。

12 ꉘꇉꐨꇀꄮꇬꀋꇁꑲꆏ，ꊽꉌꂵꎭ；

ꉌꃀꉪꅉꐛꌠꆏ，ꀑꇬꌩꑠꁧꌡꌠꉬ。

13 ꉙꅇꂘꅇꉜꄸꌠꆏ，ꋍꈔꋌꎹꇁꌠꉬ；

ꏥꏦꁌꒉꏦꃪꌠꆏ，ꀋꎪꃅꄉꂄꌠꄻꋋꀱ。

14 ꊿꉪꑌꌧꋬꌠꉙꅇꂘꅇꆹꀑꇬꇁꀦꉬ，

ꊿꁳꉔꇁꌦꃤꐱꂦꇬꃹꀋꎽ。

15 ꊿꀑꁮꇗꅉꌧꌠꆏ，ꈀꄸꑌꇫꁌꒉ；

ꊿꐈꊿꋑꌠꈝꃀꆹ，ꐥꍂꃅꄉꈴꀋꌒ。

16 ꊿꀑꁮꉌꑳꌠꆹꌧꇐꇬꈴꄉꌤꃅ；

ꌺꇰꑴꅑꌠꆏꋍꄸꋌꀖꅔꅐꇁ。

17 ꊿꄸꊩꌺꆹꀋꎪꃅꊰꇁꉮꃤꈬꇬꃹ；

ꀋꎪꀋꎙꌠꊩꌺꆹꊿꉁꊿꄻꇁ。

18 ꉙꅇꂘꅇꀋꊪꀋꅲꆏ，ꀋꎪꃅꄉꌢꎭꀑꑊꊰ；

ꊨꅇꂘꅇꅲꌠꆹ，ꀋꎪꃅꄉꀑꒉꑊꒉꊌꌠꉬ。

19 ꉌꃀꉪꅉꐛꑲꆏ，ꊽꉌꂵꇿ；

ꊿꌺꇰꈧꌠꆹꌤꆿꄷꅠꑠꐞꇬꉌꀋꃹꏷꈌꀕ。

20 ꊿꉪꑌꌧꋬꌠꐊꐺꌠꆏ，ꀋꎪꃅꉪꑌꌧꋬꇁ；

ꊿꌺꇰꑴꅑꌠꐋꃅꌠꆏ，ꀋꎪꃅꉮꏣꊝꌠꉬ。