ꑳꀊꊆꉘꇉꄉꐥ
3
1 ꀉꑳꀋ！ꆏꉠꉙꂘꅇꀋꎺꀋꉆ，ꉠꏥꏦꄻꅽꉌꂵꇬꊐꄉꇬꎷ，
2 ꑞꃅꆏ，ꋍꑠꆹꆏꁳꐥꈎꐥꆪꀊꎴ、ꐥꐨꋬꂻꎻꌠꉬ。
3 ꉂꐪꌋꆀꀋꎪꀋꎙꑠꁳꆎꐞꁧꄡꎽ，
ꏣꄀꇵꆹꇬꁍꄉ，ꁶꉌꂵꇬꄀꄉꑲꆀꍑ。
4 ꑠꃅꑲꆏ，ꏃꃅꌋꌋꆀꃰꊿꐯꇯꀋꎪꃅꆏꉚꒉꄉ，
ꆏꂓꎔꌗꎔꊌꌠꉬ。
5 ꆏꑴꌠꉌꂵꋋꂷꃅꑳꀊꊆꀉꄂꊫꁠꄉꐥ，
ꊨꏦꀑꁮꅺꐳꐨꉘꇉꀋꉆ。
6 ꆏꌤꆿꑞꃅꄿꂿ，ꋌꁳꆏꏁꎻ，
ꋋꆹꀋꎪꃅꅽꈝꃀꁳꈜꌒꇓꀋꎍꎻꌠꉬ。
7 ꅽꊨꏦꌧꅍꂿꅍꐥꃅꄡꉪ；
ꑳꀊꊆꁌꒉꏦꃪꄉꐥ，ꌤꆿꄷꅠꑠꄡꃅ。
8 ꋍꑠꆹꅽꇭꀧꉃꄻꌠ，
ꅽꃷꅍꈲꋌꉬ。
9 ꆏꅽꎆꋚꌋꆀꋚꁧꇬꂾꂔꈧꌠꃅꌞꑳꀊꊆꁵꄉꋋꀑꒉꑊꒉꄀ。
10 ꑠꃅꇬꆹ，ꅽꋙꄉꑳꀋꎪꃅꋚꀋꅓ，
ꅽꎧꋏꅉꑌꎧꏀꐛꂋꏿꌠꉬ。
11 ꀉꑳꀋ！ꑳꀊꊆꉙꅇꂘꅇꉜꄸꀋꉆ，
ꋍꊨꅇꂘꅇꑠꆏꇫꉌꅧꑓꇤꀋꉆ。
12 ꑞꃅꆏ，ꑳꀊꊆꇫꉂꌠꆹ，ꋌꀋꎪꃅꇬꏭꊨꂘ，
ꀋꇊꆏꀉꄉꂷꌺꉂꄉꌺꏭꊨꂘꌠꌡ。
13 ꊿꌧꅍꂿꅍꋌꎹꊊ、ꉌꑳꌧꐨꊌꌠꆹ，
ꌒꃤꐥꌠꉬꀐ。
14 ꑞꃅꆏ，ꌧꅍꂿꅍꆹꐎꂷꏭꀋꋌꃅꍍꊵꅑ，
ꏂꅪꏭꀋꋌꃅꍍꎆꐥꌠꉬ。
15 ꋋꆹꃀꆏꍗꀕꏭꀋꋌꃅꄉꁌꇐꈤa，
ꋍꑞꋍꑵꆏꇫꉌꃃꌠꃅꋌꏡꑵꀋꐥ。
16 ꌧꅍꂿꅍꇇꇀꑳꁆꌠꆹꐥꍂꐤꆹꎴꌠꀀ，
ꇇꇀꃼꁆꌠꆹꇇꇐꌋꆀꀑꒉꑊꒉꑠꇬꀀ。
17 ꋍꈭꈜꇬꉌꇿꑓꇿ，
ꋍꈝꃀꆹꋬꂻꐼꇉꀕ。
18 ꊿꏟꈯꀕꃅꌦꌧꅍꂿꅍꀵꄉꌠꆹ，
ꌧꅍꂿꅍꇁꋀꀑꇬꌩꁧꐛ，
ꊿꏟꈯꀕꃅꌦꇬꀳꄉꌠꆹꀋꎪꃅꋬꂻꊌꌠꉬ。