Ya Intudek James
1
1 Huyyan tudek ey nalpun hi-gak e hi James e bega-en Apu Dios nan hi Jesus Christo e Apu tayu. Nakka pan-ittudek huyyan tudek ni hi-gayun emin ni kamengullug nan Jesus ni neihilit di kebebbebley. Dakeyu kanenemneman emin.
Ya tayu kapanliligasi hu kamengihhammad ni tayu kapengullug
2 Hi-gayuddan agik ni kamengullug, ey hedin yuka panlelehhani hu hipan ligat yu, man pan-am-amleng kayu. 3 Tep inamta tayu, e ya ligat hu kamengihhammad ni tayu kapengullug nan Jesus, et anin ni hipa mekapkapya ey mannananeng itsun mengu-unnud ni hi-gatu. 4 Et humman hu, mahapul ni ennusan tayu hipan ligat ma-lat maihammad hu tayu kapengullug nan Jesus et endi pangkullangan ni kakinayyaggud tayu.
5 Nem hedin wadan hi-gayu hu eleg tu amta hu pehding tun mengu-unnud nan Apu Dios, ey dammutun mandasal ni hi-gatu et baddangan tu. Tep hi Apu Dios ey madewat et man-am-amleng ni umbaddang niya mengidwat ni panyaggudan ni emin ni tuu. 6 Nem hedin mandasal kayu, ey entan pandewadewa, nem kulug yu e iddawat Apu Dios niya pehding tu hu yuka ibbaga. Tep ya etan tuun kamandewadewa ey henin dalluyun di baybay e kamanbinbinangngad e kamei-unnunnud di kalawwin dibdib. 7-8 Ey naka-ihlan peteg hedin ya humman ni tuu ey tuka nemnemnema e iddawat Apu Dios hu tuka ibbaga.
Ya elaw ni u-unnuden idan newetwet niyadda kedangyan
9 Pan-am-amleng kayun newetwet ni kamengullug nan Jesus, tep eta-gey kapengibbillang Apu Dios ni hi-gayu. 10 Ey hi-gayun kedangyan, pan-am-amleng kayun nengipebabahan Apu Dios ni hi-gayu, et yan nunya law ey dakeyu katettebala gapuh ni yuka pengullug. Tep anin ni kedangyan et kamettey, e henin habung ni helek e hedin nakpit, man kame-gah. 11 Ya habung ni helek ey eleg mannananeng ni kayyaggud ni ingganah hu ang-ang tu, tep hedin pimmetang ni na-let ey kamekling ni naplag et lawah law hu ang-ang tu. Henin etan ni kedangyan e ikkatey tu pehding tun mengdum ni kinedangyan tu, nem hakey alin aggew et endi silbitu hu kinedangyang tu, tep eleg mabalin ni tu ittabin di lawwan tu hedin mettey.
Ya elaw ni kakepatnai niya kakehe-uli
12 Ya tuun nanengtun nehammad hu tuka pengullug, anin ni kamanligligat, ey iddawtan Apu Dios ni panyaggudan tu e humman hu biyag ni endi pappeg tu, tep humman impakulug Apu Dios ni iddawat tuddan tuun neminhed ni hi-gatu.
13 Ey hedin wadan hi-gayu hu mehe-ul ni mengippahding ni lawah, ey entan tu ipenuyun Apu Dios. Tep hi Apu Dios ey eleg tu pinhed hu lawah, et eleg mabalin ni hi-gatu mene-ul ni hi-gayun mengippahding ni lawah. 14 Ya kaumhulun ni kakehe-ulin tuu ey ya neminhed tun mengu-unnud ni lawah ni wadad nemnem tu. 15 Et hedin u-unnuden hu lawah ni wadad nemnem, ey manliwwat ita, et ya pambalinan ni nengipeinaman tun mengippahding ni lawah ey ketteyyan tu et meiddawwin Apu Dios.
16 Et humman hu, hi-gayuddan agik ni kamengullug, ey helipat-i yu ma-lat eleg kayu maheul. Tep hi Apu Dios ey eleg tu he-ula tutu-u ma-lat ipahding da hu lawah. 17 Beken, tep emin hu kamelpun Apu Dios di kabunyan ey kayyaggud niya endi kulang tu. Hi-gatu nengapyan aggew, ya bulan niyadda bittuwen. Hin-addum ni nelumman hu ang-ang da, nem hi Apu Dios ey eleg melumman. 18 Ey hi-gatsun kamengullug hu impambalin tun keta-ta-geyyan di emin ni lintu tu, tep imbilang daitsun u-ungnga tu eman ni nengulugan tayun makulug ni kameituttuddu, tep humman dedan hu pinhed tun pehding.
Ya pengu-unnudan tayun ehel Apu Dios
19 Hi-gayuddan agik ni kamengullug, dengel yu eya e-helen ku. Ilillingisi tayun mengngel ni kayyaggud, beken ni tayu lellelgemen ni umhapit, niya entan pengimbubunget. 20 Tep endi ibbaddang ni bunget di pengippahdingan ni pinhed Apu Dios. 21 Et humman hu, mahapul ni e-kalen yun emin hu hipan lawah ni wadad nemnem yu niya isiked yun mengippahding idan lawah. Ey mahapul ni mampekumbabah kayu et ya ehel Apu Dios ni kinulug yu hu u-unnuden yu e humman hu menellaknib ni hi-gayu.
22 Ya ehel Apu Dios ey mahapul ni unnuden yu, beken ni yu deddengngelen ni ebuh. Tep hedin eleg yu u-unnuda, man ya ngu annel yu hu yuka he-ula. 23-24 Tep ya tuun tuka deddedngelan ebuh hu ehel Apu Dios, nem eleg tu u-unnuda ey heni etan ni tuun nandiggal et paka-ang-angen tu angah tu, et hi-yanen tu etan diggal, ey nekemtang ey liniwwan tu ang-ang tu. 25 Nem ya tuun kameihaha-ad di nemnem tu hu Tugun Apu Dios et tuka pannananeng ni u-unnuden ey panyaggud Apu Dios di hipan pehding tu. Tep ya etan tuun kamengu-unnud nunman ni Tugun ey mebaddangan ma-lat eleg manliwaliwat.
26 Ya etan tuun kamenghel ni kantuy kamengullug, nem lawah hu tuka e-e-hela, ey nehaul humman ni tuu. Endi silbin tuka pengullug. 27 Ya makulug ni kamengullug nan Apu Dios ey tuka baddangidda nebalun bibi-i niyadda etan nepu-hig ni u-ungngad ligat da niya eleg tu iu-unnud di lawah ni elaw idan eleg mengullug nan Jesus.