99
1 Hi Apu Dios hu patul! Yimmudung di ta-pew ida etan ni dewwan anghel di yinudungan tu. Emin hu tuu ey ida kaumgeygey. Anin ni ya puyek et kamanyegyeg.
2 Hi Apu Dios ey kameiddeyyaw di Zion niya hi-gatu hu ap-apun emin di kebebbebley di puyek.
3 Ya keta-ta-geyyan niya kamengippetngan ngadan tu hu lebbeng tun medaydayaw. Kayyaggud ni peteg hi Apu Dios.
4 Hi-gam ni Patul e et-eteng kabaelan tu niya limpiyuh ni emin hu tuka pehding, ey tuka hellipat-i ma-lat ya limpiyuh niya neiptek hu meippahding di Israel.
5 Daydayaw tayu hu Ap-Apu e Dios tayu. Pandukkun itsud hinangga tu, tep hi-gatu hu kayyaggud ni peteg.
6 Yan nunman ey di Moses nan hi Aaron hu padi tu. Ey hi Samuel hu hakey ni nandasal daman hi-gatu. Nandasal idan Apu Dios et baddangan tudda.
7 Nekihummungan idan tutu-u tu eman ni kaweda tud kulput niya inu-unnud da hu tugun tu.
8 Em, Apu e Dios mi, hinumang mu hu dasal da. Impeang-ang mun hi-gada e muka pessinsahi niya muka liwwana hu liwat da. Nem kinastigum ida hedin nambahul ida.
9 Daydayaw tayu hi Apu Dios. Ey itsu pandaydayaw di duntug tud Jerusalem tep hi-gatu e Dios tayu ey kayyaggud ni peteg.