23
Ya a-appeh David
1 Hi Apu Dios hu kamei-ellig ni kamengipattul ni hi-gak, mukun endi nakka pangkullangid mahapul ku.
2 Tuwak kaippangulud kad-an ni kayyaggud ni pattulan niyad kad-an ni meli-neng ni danum.
3 Tuwak kape-let ey tuka ittudu hu kayyaggud ni u-unnuden ku ma-lat keidaydayawan ni ngadan tu.
4 Anin ni nemahhig hu ligat ku e heni-ak wadad engeenget et eleggak umtakut, tep wada kan hi-gak. Muwak kaipapaptek e heni muwak kaa-allukudan hulkud mu et nakka meihwang di hipan anggetakkut ni mekapya.
5 Muka peang-ang idan buhul ku hu muka pemaptek ni hi-gak, tep muka immangdad hu dakel ni kennen ku niya innumen ku. Ey muka duyyagin lana hu uluk ni muka pengapngan hi-gak. Muwak kabendisyonin kewa-wa-wa.
6 Inamtak e pannananeng mu hu kakinayyaggud mu niya impeminhed mun hi-gak nunyan ketagguk. Et humman hu, daydayawen dakan ingganah di baley mu.