21
Ya a-appeh David ni meidwat ni kamengipappangngulun a-appeh
1 Apu Dios, kaman-an-anla etan patul, tep indawat mu kabaelan tu et mengapput.
2 Indawat mun emin hu pinhed tu, endi eleg mu idwat ni hi-gatu.
3 Ey indawtam ni dakel ni panyaggudan tu niya impapngetam ni balituk, tep hi-gatu pinutuk mun mampatul.
4 Nandasal ni hi-gam ma-lat ihwang mud ketteyyan tu ey inebulut mu et mannananeng ni ingganah hu biyag tu.
5 Kamenga-apput humman ni patul tep muka baddangi et mukun kameidaydayaw ey nandingngel.
6 Humman idan indawat mun panyaggudan tud biyag tu ey mannananeng ni hi-gatun ingganah. Ey nemahhig an-anla tu, tep wada kan kenayun di kad-an tu.
7 Kamekaddinnel humman ni patul ni hi-gam e Apu Dios e Keta-ta-geyyan. Ey inamta tu e eleg melumman hu impeminhed mun hi-gatu. Et humman hu, kamekallinggep di biyag tu.
8 Emin idalli buhul mu ey pambalin muddallin balud, tep et-eteng kabaelan mu et nelakah hu pengapputan mun hi-gada.
9 Ap-Apu, yan pampeang-angan mulli ey nemahhig hu bunget mu. Et ya meippahding alin hi-gada ey heniddalli megihheb ni pengastiguan mun hi-gada. a
10 Endillin hekey hu helag dan metdaan, tep petteyen muddan emin.
11 Emin hu lawah ni daka nemnemneman pehding ni hi-gam ey eleg um-amnu et endi an meippahding.
12 Tep umbesik idalli hedin ang-angen da hu neidengdeng ni panam ni hi-gada.
13 Daka kadaydayawa e Apu Dios, tep ya kabaelan mu, niya mika ia-appeh hu amleng mid kayyaggud ni impahding mu.