Job 37

¹ Nakka umkebkeb ni mannemnem ni nunman! ² Dengel yu ehel Apu Dios ni heni kidul. ³ Tuka peukkat hu kedyam di kabunyan ni impalaw tud emin eyad puyek. ⁴ Ey kameittu-nud hu ehel tun heni kidul e kamengipetnga. ⁵ Em, kamengippetnga ehel tu niya eleg han-awat ni tuu hu kainetteng ni kabaelan tu. ⁶ Tuka mandala hu dallallu niya udan ma-lat ma-gah idad puyek.

⁷ Yadda tuu ey daka issiked ngunu da tep yan nunman pengippeamtaan tun hi-gadan kabaelan tu. ⁸ Yadda dama animal di muyung ey ida kamantellud mabetu niyaddad edum ni daka pantellui. ⁹ Hi Apu Dios hu kamengippeellin pewek niya nemahhig ni ketel. ¹⁰ Ey hedin yimmayyah man kamambalin ni dallallu hu danum idad wangwang niyaddad kulukul. ¹¹ Tuka ha-adin danum ida kulput niya tuka unnudin kedyam. ¹² Ey tuka mandaladda kulput ni mambinbinangngad et ida kaumlaw di tuka pengippellawin hi-gada eyad puyek. ¹³ Hin-addum ni peelli tu udan et panenum tun puyek e humman tuka pengippeang-angin neminhed tu, nem hin-addum ni tuka peelli et pengastigu tun tutu-u.

¹⁴ Et humman hu, i-ineng ka kedi e Job niya pandengel ka. Nemnemnem mudda hu kaketngain impenahding Apu Dios. ¹⁵ Kaw inamtam hedin hipa inna-nun Apu Dios ni mammandal ni kedyam ma-lat maukat di kulput? ¹⁶ Ey kaw han-awat mu hedin hipa inna-nun kulput ni kamanhahha-ad di kabunyan? Humman keang-angan tun hi Apu Dios ey nakallaing niya nakannemneman. ¹⁷ Kamanhelheltap ida tuu tep nemahhig atung ni kai-alin dibdib ni kamelpud south. ¹⁸ Kaw dammutun baddangam hi Apu Dios ni mengibbiklag ni kabunyan ma-lat ya ang-ang tu ey heni gembang?

¹⁹ Ya muka pannemnem ni annel mu ey nekangngamta ka. Hedin makulug ni nekangngamta ka, tuttuddui dakemin ihhumang min Apu Dios tep ay eleg mi inamta ihhumang mi. ²⁰ Kaw wada tuun dammutun menuttudun Apu Dios? Ey kaw eleg tu ngu ikkaguh hu biyag tu et tu ipahding humman. ^21-22 Kamedeyyaw ni peteg hi Apu Dios. Kaumhili dayaw tu e endi pengi-ingngehan. Henin aggew e eleg mabalin ni itettekel ni tuu hedin intayab ni dibdib hu kulput et mepukyahan, tep kaumhili. Nem nema-man kaumhili hu dayaw Apu Dios. ²³ Ey eleg tayu han-awat hu kabaelan Apu Dios ni mengippahding ni emin. Nem anin ni hanniman et kayyaggud niya meandeng hu tuka pehding e eleg daitsu panligligat. ²⁴ Et humman hu, kadeyyawa niya katekkusin emin ni tuu niya kadeyyawaddan makulug ni nenemneman ni tuu.”