31
Ya nanggillig ni inhel Job
1 Insapatah kud annel ku e eggak amyawi hu bii.
2 Ya iddawat Apu Dios e Kabaelan tun emin ni gun-uden ni tuu ey meippuun di ippahding tu. 3 Et humman hu, tuka peelli ligat niya hipan umbahbah etan idan lawah ni tuu.
4 Tuka hellipat-in emin hu nakka pehding niya attu nakka lawwi. 5 Nem kaw wada nak hineul winu nak sinelam? 6 Ngenamung hi Apu Dios ni mengi-uh-uh e endi bahul ku. 7 Hedin eggak u-unnuden pinhed tu, winu wada inamyawak ni inang-ang ni matak, winu wada edum ni nambahulan ku, 8 ey anin katteg ni mebahbah inggaud ku winu anin ew ni kennen ni edum ni tuu hu hipan intanem ku.
9 Ey hedin ngullaw inamyawak hu ahwan dinagsik, et nakka menemmahemmak ni tsimpuh ni pengi-ulligan kun hi-gatu, 10 ey anin ew ni meki-ahwan edum ni laki etan ahwak niya anin ew ni meki-ullig hu edum ni lakin hi-gatu. 11 Tep nemahhig ni bahul hu pengamyawan et iulig hu beken ni ahwa. Et humman hu, mahapul ni mekastigu-ak hedin humman hu nambahulan ku. 12 Hedin kantu et impahding ku humman ni bahul, ey anin ew katteg ni mebahbah ni emin hu hipan wadan hi-gak, tep humman ni bahul ey heni apuy di impiernoh e tuka gihheban emin.
13 Hedin wada mewan neihlan impahding kun bega-en ku winu eggak hanguden hu lilih da, 14 ey hipa inna-nuk ni mekihhinnanggan nan Apu Dios? Hipa ihhumang kun hi-gatu hedin hummanganen tuwak? 15 Hi Apu Dios hu nanletun hi-gak niya hi-gatu dama hu nanletuddan bega-en ku.
16 Kaw eggak baddangan ida newetwet niya kaw eggak hemeken ida nebalu. 17 Kaw nekuliputtak et eggak idwatan ida nepu-hig ni kennen da? 18 Neipalpu dedan eman ni u-ungnga-ak ey mebaddangngak ni hi-gada. 19-20 Hedin wadadda newetwet ni eleg pakegatang ni balwasi ey nak ida kaiddawsin ibbalwasi dan nekapyad dutdut ni animal ku ma-lat eleg ida maktel. Et humman hu, da-ak kapakatbaladdan emin ni tuu. 21 Hedin wada sinelam kun nepu-hig tep et-eteng hu kabaelan ku, 22 ey anin ni mehpung ngamay ku niya anin ew ni melahlah pahhannan ku. 23 Kedukdul ew humman nemet eleg tuwak kastiguen nan Apu Dios, nem ya kakulugan tu ey endi impahding kun hanniman tep nakka umtakut ni hi-gatu e eta-gey ni Dios.
24-25 Eggak pandidinel hu balituk ku. Ey eggak ippahhiya hu kinedangyan ku. 26-27 Ey eggak dayawen hu bulan niya aggew, anin ni inang-ang ku hu kakinayyaggud da. Ey eggak nemnemen ni illigud ni deyyawen ida. 28 Gullat ni impahding ku humman ey lebbeng tun mekastigu-ak, tep ya tuun kamengippahding nunman ey inwalleng tu hi Apu Dios, e Kabaelan tun emin.
29 Eggak mewan ngi-ngi-ngian hu buhul ku hedin wada immalin ligat da. 30 Ey endi nak nandasalan nan Apu Dios ma-lat matey ida. Tep gullat ni impahding ku humman, ey em, e makulug ni nanliwattak. 31 Emin ida bega-en ku ey i-uh-uh da e nakka pengngan emin hu kamanda-guh di baley. 32 Ey endi hakey ni eggak pehgep anin ni hansinu-wan ni nalpud edum ni bebley. 33 Hedin hi-gak man bekennak ni henin edum e daka itattallu lawah ni daka pehpehding. 34 Ey anin ni hipa e-helen ni tuun meippanggep ni impahding ku ey eggak pakdag i-ineng niya eleggak mantalu.
35 Gullat et anhan ni wada hakey ni huwet ni mengngel ni hi-gak, ey amtaen tu e makulug ida huyyan impahding ku. I-ehneng ku hu annel ku. Ngenamung hi Apu Dios e Kabaelan tun emin ni menghel e nambahullak niya hi-gatu mengittuddek ni bahul ku. 36 Eleggak umtakut anin ni kanyuy nambahullak tep nakka medinnel e endi hemmaken tun bahul kun yuka pebehhul ni hi-gak. Imay, ehel yu hu kanyun bahul ku, hedin wada. 37 Nakka medinnel ni an menghel nan Apu Dios ni emin ni impahding ku, ey eggak umbaing.
38 Hedin sinelam ku winu piniliw ku etan puyek ni nakka tattannemi, 39 ey hedin ma-nun hi-gak tep nakka makangngan ey eleg ida mengngan hu nakka pangngunnun nengigeud ni kennen ku, et ida kamanhelheltap, 40 ey anin ew katteg ni ya helek niya hebit hu patmel mudman et beken ni ya wheat niya barley.”
Huyya pappeg ni inhel Job.