Job 28

Ya inhel Job meippanggep ni kalinaing niya kapannemnem

¹ Inamtan tutu-un manminnas ni silber niya inamta dan man-eyyug ni balituk ma-lat memahmah. ² Ey inamta dan manminnas ni gumek di puyek niya inamta dan mengappil ni gembang di batu. ³ Daka illaw hu dilag di dallem ni puyek e engeenget ma-lat ku-kuan dadda hu nebalol ni batu. ⁴ Tagan da elaw di dallem ni puyek di eleg handateng ni tuu. Daka ussala linubid ni panta-yunan da. ⁵ Yad ta-pew ni puyek hu katetmeliddan intanem e kakelpuin kennen, nem yad dallem ni puyek ey heni wada apuy ni kamengeyyug ni batun ⁶ neiha-adan ni balituk niyadda edum ni hipan nambakbaklang ni nebalol ni batu. ⁷ Endi pakeang-ang ni dellanen diman, anin idan gawwang niyadda sisit nelaing ni menang-ang ni kennen da et eleg da ang-angen humman. ⁸ Ey endi layon niya hipan anggetakkut ni animal ni kamandellan diman.

⁹ Ya tuu ey kabaelan tun pi-angen hu et-eteng ni batu ey tuka ku-kui hengeg ni duntug. ¹⁰ Ey dakel hu nebalol ni batun tuka hemmakadman. ¹¹ Tuka an uh-uha hu nalpuan ni wangwang et hamaken tu, ma-lat ukaten tu hu hipan nebalol ni wadadman.

¹² Kabaelan ni tuun hemmaken ida humman, nem endi kabaelan dan menemmak ni kalinaing niya kapengewwat, ey eleg da amta nalpuan tu. ¹³ Endi nengamta e nebalol ni peteg hu kalinaing niya eleg mehemmak di bebley idan mategu. ¹⁴ Ey eleg mehemmak anin di dallem ni baybay. ¹⁵ Eleg megettang anin ni balituk winu silber hu pemeyyad. ¹⁶ Eleg mabalin ni an mei-ingngeh hu balol ni kalinaing etan di nekammahmah ni balituk ni nalpud Ophir winu batun onyx winu sapphire. ¹⁷ Nebalbalol hu kalinaing nem ya balituk, anin etan ni kengingnginnaan ni tenged ni nekapyad balituk winu crystal. ¹⁸ E-etteng hu balol ni kalinaing nem ya bayad idan nebalol ni batu e henin coral winu jasper winu ruby. ¹⁹ Ya kalinaing ey eleg mabalin ni meiwwa-hid topaz ni nalpud Kush, niya eleg megettang ni nekammahmah ni balituk.

²⁰ Hipa nalpuan ni kalinaing niya kapengewwat? ²¹ Eleg maipeang-ang ni hi-gatsun tuu hu kalinaing ey eleg maipeang-ang idan sisit ni matedem hu mateda. ²² Nem ya katey, et yadda hipan kaumbahbah ey kanday dingngel da kunu hu penemmakan nunman ni kalinaing.

²³ Hi Apu Dios ni ebuh hu nengamtan kad-an ni kalinaing, ²⁴ tep hi-gatu e Dios ey han-ang-ang tu pappeg ni puyek niya tuka ang-ang-angan emin hu wadad daul ni kabunyan. ²⁵ Indawat Apu Dios hu elet ni dibdib niya lingkud tu hu pappeg ni baybay. ²⁶ Hi-gatu ngenamung hedin attu pengippelawwan tun udan niya kidul. ²⁷ Yan negibbuhan ni nengipahdingan tuddan nunman ey inang-ang tu kalinaing et lekuden tu balol tu. Ey tuka tetbalan hiyya numan e importanteh ni peteg hu kalinaing. ²⁸ Et kan Apu Dios idan tuuy ‘Ya kapengu-unnudin hi-gak hu ustuh ni kalinaing. Ey ya kapengissikedin mengippahding ni lawah hu keweddaan ni ustuh ni kapan-ewwat.’ ”