Job 15

^1-3 Entanni ey kan Eliphas nan Job ey “Kaw henin nuntan hu kapenappihappit ni nenemneman ni tuu? Hiyya law, entan tu tagan ehel. Endi damengu silbi tun emin eya muka e-e-hela. ⁴ Kaw endi lispituh mu ey kaw eleg ka umtakut nan Apu Dios? ⁵ Kamaka-amta hu kalinewah mud muka pan-e-ehhel, nema-ma tep muka henniin hapit mu hu muka pehpehding. ⁶ Anin ni eggak e-hela e nambahul ka, et hi-gam ngu nengipeamta eyad muka pan-e-ehhel.

⁷ Kaw kammu nem hi-gam nemangulun tuun neiungnga? Ey kaw newada ka eman ni nanletuan Apu Dios idan duntug? ⁸ Kaw wada kan nekideddengel ni planuh Apu Dios? Kaw hinakkeyam hu laing? ⁹ Niya kaw hipa ni-man hu inamtam ni eleg mi amta? ¹⁰ Ya nan-adalan min laing mi ey yadda nangkea-amman nangkeubanan e na-na-tengan ida nem hi amam.

¹¹ Kaw beken ni kabbabbal hu kapan-e-ehhel nan Apu Dios? Hipa pay muka heppula? ¹² Kele eleg mu pakannemnema ni bimmunget ka? ¹³ Inwalleng mu hi Apu Dios et deh e lawah eya muka pan-e-helan hi-gatu tep bimmunget ka. ¹⁴ Kaw mabalin ni wada hakey ni tuun kayyaggud di hinanggan Apu Dios? ¹⁵ Anin idan anghel et eleg makaddinnel hi Apu Dios ni hi-gada tep beken idan kayyaggud ni peteg. ¹⁶ Et nema-ma ngu hu tuu e nakalliwatan, e ihik ni mengippahding ni lawah.

¹⁷ Dengel mu kedi e Job eya e-helek ni inamtak. ¹⁸ Makulug ida huyyan intuttuddun nangkelaing niya nangkenemneman ni hi-gak. Dingngel dadda dama huyyan aammed da ¹⁹ e hi-gada hu neidwatan ni bebley eman ni endi ni hu edum ni tutu-un nambebley diman.

²⁰ Yadda lawah ni tuun daka panliligat hu edum dan tuu ey manhelheltap idalli ingganah ni kepappegan ni neitu-wan da. ²¹ Nemahhig hu takutakut dallin ingganah. Anin ni wada ni linggep et ida kaumtakut ni um-alin menggep ni hi-gada. ²² Ida kaumtakut ni um-ehep hedin engeenget tep entanniy pintey dadda. ²³ Ida kamandaladalan ni an menemmak ni kennen da, nem endi daka hemmaka. Ey ida kaumtatakut tep inamta da e anggagannu law ey mettey ida. ²⁴ Nemahhig takut dan nunman ni meippahding ni hi-gada e henin takut da etan ni patul ni um-alin mengubbat ni hi-gada. ²⁵ Henin nunman hu kameippahding di tuun daka taltalanggaa niya daka ngengngehaya hi Apu Dios e Kabaelan tun emin. ²⁶ Ihik idan mekihhanggan hi-gatu e henidda sindalun mekiggubbat e nehammad hu happiyaw da.

²⁷ Huyyaddan lawah ni tuu ey kekeddangyan ida niya mangkatebadda. ²⁸ Nem mangkebahbah ali bebley da et mampambebley idallid nehi-yan ni bebley niya manha-ad idad kamangkebahbah ni baballey. ²⁹ Meendilli kinedangyan da. Eleg meihhinnap hu kinedangyan dad dakel ni bebley.

³⁰ Eleg mabalin ni da ibbebsikan hu engeenget ni panha-adan da. Heniddalli etan ni keyew ni megihheb tep heng-aban idallin Apu Dios et mebahbah ida. ³¹ Eleg dalli law iddinel hu kinedangyan dan endi silbi tun edum ni aggew, tep endi gun-uden da. ³² Anggegannulli ey mepappeg biyag da et meendin emin hu nandinelan da. ³³ Heniddalli hu lameh ni grapes ni nepugah ey eleg maluum, niya heniddalli habung ni olibah ni nangkaplag. ³⁴ Yadda tuun lawah nemnem da ey eleg ida mehlag. Ey mangkegihheb ali baballey dan napnun sinekew da niya piniliw da. ³⁵ Hi-gada hu kamamplennuh niya kamengippahding ni lawah niya maheul ida.”