Job 13

^1-2 Inang-ang kudda niya dingngel kudda lan nunman emin eya in-inhel yu. Ey nakka ewwasin emin e heni-ak ni hi-gayu, niya dakel dama inamtak. Kaw kanyu nem kulang inamtak nem hi-gayu? ³ Ya pinhed kun pekihhummangan ey hi Apu Dios e kabaelan tun emin, beken ni hi-gayu. Pinhed kun hi-gatu mismuh hu pengibgaak ni pinhed kun ibbaga. ⁴ Hedin hi-gayu man itek hu yuka e-e-helan meippanggep ni hi-gak. Heni kayuddan kaman-eggah nem endi daka eggahi, anin ew ngun hakey. ⁵ Heballi um-i-ineng kayu et eleg meamta e endi inamta yu. ⁶ Pandengel kayu et ehelek hu pinhed kun e-helen.

⁷ Kele maitek kayu? Kaw kanyu nem dammutun i-ehneng yu hi Apu Dios ni penghelan yun itek? ⁸ Ey kaw hi-gayu hu mengi-ehneng ni hi-gatud kasuh tu? ⁹ Kaw makulug makkaw ni endi hu ang-angen Apu Dios ni lawah ni hi-gayu? Ey kaw kanyu nem dammutun i-ittekan yu hi Apu Dios henin yuka pehding ni tutu-u? ¹⁰ Anin ni ittalu yud nemnem yu hu lawah ni elaw yu et ibbunget dakeyu damengu. ¹¹ Kaw eleg kayu umtakut ni kasina-gey nan Apu Dios? ¹² Endi silbin yuka e-e-hela. Heni dep-ul e endi silbitu niya heni bangan pula e kabbabahbah.

¹³ I-ineng kayu et hi-gak dama umhel. Ngenamungngak, anin ni hipa meippahding ni hi-gak. ¹⁴ Nandaddannak di hipan meippahding ni hi-gak. ¹⁵ Anin ni petteyen tuwak Apu Dios ni nanlilihan kun hi-gatu. Ey anin ni endi namnamah kun mebaddangannak nemet ehelen ku lilih kun hi-gatu. ¹⁶ Nem nakka medinnel e meihwangngak tep inamtak e endi bahul ku, tep gullat ni wada bahul ku et eleg mabalin ni nak mekihhanggan hi-gatu.

¹⁷ Pakadngel yu eya e-helek. ¹⁸ Naka-iddaddan ku e-helen kun hi-gatu ey inamtak e neiptekkak. ¹⁹ Kaw wada kahing eyan inhel ku? Hedin wada hemmaken yun kei-ang-angan tu e neihalla-ak ey anin ni pemeggak i-ineng ingganah metteyyak.”

²⁰ Immehel mewan hi Job ey kantuy “Apu Dios, dewwan ebuh ibbagak ni hi-gam ey hedin tetbalem, ey e-helen kun emin et endi nak ittalun hi-gam. ²¹ Isiked mu anhan ni mengastigun hi-gak niya entan tuwak petattakut. ²² Hi-gam pamengulun um-ehel ni hi-gak et humangek, winu iebulut mun um-ehellak et humangem. ²³ Kaw hipa nanliwatak niya hipa lawah ni impahding ku? ²⁴ Kele muwak inwalleng, ey kele heni buhul muwak ni muka pehding ni hi-gak? ²⁵ Ey kele muwak katennattakkuta ey endi damengu silbik tep heni-ak bulung ni keyew ni kameihhuyyahuyyaw? Niya kele heni muwak kapeppepduga ey heni-ak nema-ganan ni dagemi ebuh.

²⁶ Dakel hu lawah ni muka pebehhul ni hi-gak, anin idan impahding kun keu-ungngak. ²⁷ Heni mu binangkiling hu helik niya muka hellipat-i keglidan ku, anin ya gassin ku. ²⁸ Mambabbabballak ni mettey e heni-ak keyew ni kamangkedunnut niya heni-ak luput ni kinelakelat ni ballaing.