Job 11

Ya inhel Sophar

¹ Himmumang hi Sophar e iNamaah ey kantuy ² “Hipa menummang idan nunyan legelegem ni inhel mu? Kaw ya kadinakkel ni ehel ni tuu hu pengi-ang-angan e endi bahul tu? ³ Kaw kammu nem eleg mi hanhumang eya muka e-e-hela? Ey kaw kammu nem pemegga mi i-ineng eyan muka penaltalanggain Apu Dios? ⁴ Kammuy makulug eya muka e-e-hela niya kakkayyaggud kad hinangngab Apu Dios. ⁵ Hamban um-ehel hi Apu Dios ma-lat ehelen tun hi-gam hu wadad nemnem tu ey ⁶ niya ma-lat peamta tun hi-gam hu ustuh ni laing. Dakel mannuman hu eleg tayu amta niya eleg tayu han-awat. Ya kakulugan tu ey kinulngan Apu Dios hu kastiguh mu nem ya etan lebbeng tu et dedan ni pengastigu tun hi-gam.

⁷ Kaw dammutu kuman amtaem hu eleg peamtan Apu Dios e Kabaelan tun emin? Ey kaw dammutu kuman amtaem emin hu meippanggep ni hi-gatu? ⁸ Eleg, tep endi hakey ni tuun wada kabaelan tun man-ewwat nan Apu Dios. Hedin hi-gatu man eleg melkud hu amta tu e henin kadinawwin puyek di kabunyan niya henin kadinallem ni puyek e endi lekud tu. Kaw hipa ka kuma et meiingngeh hu inamtam di inamta tu? ⁹ Ya inamtan Apu Dios ey eleg melkud, kamei-ellig e mahmahkang nem ya puyek, niya melallakkeb nem ya baybay. ¹⁰ Gullat ni kantu et pedpap dakan Apu Dios et ilaw dakad korteh, ey hipa wada kabaelan tun mengippesikked nunman ni pehding tu? ¹¹ Tep inamtan Apu Dios hedin hipa tuun endi silbitu niya tuka hellipat-i hu panliwwatan nunman ni tuu. ¹² Kaw dammutun man-impah hu kebayyun tuu? Ey kaw dammutun menemneman niya umlaing hu tuun endi nemnem tu?

¹³ Ku gullat ni kayyaggud hu wadad nemnem mu niyad puhum et mandasal kan Apu Dios. ¹⁴ Niya mantuttuyyu kan liwat mu ey issiked mun mengippahding ni lawah, ¹⁵ ma-lat yumaggud ka kaya et keang-angan tun endi bahul mu. Lektat tu kaya ey umtuled kan eleg ka umtatakut. ¹⁶ Melebbah kaya ligat mu et liwwanem et henin kakelebbahin danum di daul ni langtay. ¹⁷ Et ya neitu-wan mun kamei-ellig ni engeenget ey kawwalwal ali nem ya emaggew henin tuka kewa-wain kakkabbuhhan. ¹⁸ Ippaptek dakan Apu Dios et tumuled ka tep mewedda namnamah mu ey man-iyyatu ka niya umlinggep ka. ¹⁹ Eleg ka law umtatakut ni buhul mu niya dakel hu mampebaddang ni hi-gam. ²⁰ Nem yadda lawah ni tutu-u ey endi namnamah dan meihwang. Ebuh hu katey ni daka hehheggeda.”