14
Ya nengapputan ni patul e hi Asa idan buhul da
1 Netey hi Abijah et maikulung di Bebley David et maihullul hi Asa e u-ungngatun nampatul. Yan nunman ni nampatulan tu ey melinggep hu bebley dad Judah ni hampulun toon.
2 Impahding Asa hu kayyaggud e kamengippeamleng ni Ap-Apu e Dios tu. 3 Ingkal tudda pan-appitan niya kapenaydayawin beken ni makulug ni dios niya binahbah tudda daka deyyawan batun dios niya etan tukud ni biin dios e hi Asherah. 4 Ey in-olden tuddan iJudah e hi Apu Dios e Dios ida lan aammed da hu daydayawen da, niya u-unnuden da tuttuddu tu niya tugun tu. 5 Ingkal tudda kapenaydayawin beken ni makulug ni dios niyadda kapan-appisin insensoh di emin ni bebley di Judah, et humman hu, melinggep hu bebley dan nunman ni nampatulan tu. 6 Endi nengubat ni hi-gatu tep indawtan Apu Dios ni linggep niya inhammad tu luhud idan etta-teng ni bebley di Judah.
7 Kantuddan tutu-ud Judah ey “Mengapya itsun etta-teng ni bebley et luhuden tayuddan nehammad ni batu niya ikkapyaan tayuddan etata-gey ni baballey ni pangguwwalyaan niya eheb ni melekbian niya meiphiw. Nannaneng ni hi-gatsu huyyan bebley tayu tep inu-unnud tayu pinhed ni Ap-Apu e Dios tayu et pelinggep daitsu.” Et ipahding dadda humman ni implanuh da et megibbuh. 8 Ya bilang ni sindalun Asa e patul ey telunggatut ni libun iJudah e nanhappiyaw ida niya nampahul ida, ey nei-dum hu dewanggatut et newalun libun sindalun helag Benjamin ni nanhappiyaw niya nampana. Netuled idan emin niya nelaing idan mekiggubbat.
9 Wada hu hakey ni tuun iEthiopia e hi Serah ngadan tu e ginubat tu Judah. Ingkuyug tudda hakey ni milyon ni sindalu tu niya telunggatut ni nangkalesah et dumteng idad Mareshah. 10 Limmaw hi Asa niyadda sindalu tun nekigubat ni hi-gada e nampustuh idad Nedeklan e Sephathah e neihnup di Mareshah.
11 Nandasal hi Asa ni Ap-Apu e Dios tu e kantuy “Ap-Apu e Dios mi, hi-gam ni ebuh hu dammutun umbaddang idan sindaluk ni mekiggubbat idaddan et-eteng ni kabaelan dan sindalu. Baddangi dakemi anhan tep hi-gam hu mika pandinneli ey gapun ngadan mu ey immali kamin mekiggubbat ida eyan dakel ni peteg ni sindalu. Ap-Apu, hi-gam hu Dios mi, entan anhan tu iebulut ni daka apputen ni tuu.”
\v 12 Et manggugubat ida ey binaddangan Apu Dios hi Asa niyadda sindalu tu et apputen dadda humman ni sindalun iEthiopia et mamsik ida. 13 Nampedug di Asa ida ingganah di Gerar ey dakel hu netey idan nunman ni iEthiopia et endi law kabaelan idan sindalu dan natdaan ni mekiggubbat mewan tep inapput Apu Dios ida. Et dakel inladdan sindalun iJudah ni limmu da. 14 Binahbah dadda ekka-ket ni bebley di nanlinikweh di Gerar tep eleg ida lumeban tep nemahhig hu takut idan bimmebley diman nan Apu Dios. Ey dakel ni peteg hu nan-aladdan sindalun iJudah ni hipan wadadman idan bebley. 15 Hinggep da mewan hu kampuddan kamampaptek ni animal et alen da dakel ni kalneroh niya kamel et han ida mambangngad di Jerusalem.