5
Yadda hampulun Tugun Apu Dios
1 Inemung Moses ida etan tuu et kantun hi-gaday “Pakadngel yun emin ida eya Tugun Apu Dios ni e-helen kun hi-gayun nunya, ma-lat amtaen yudda et u-unnuden yu. 2 Yan eman ni kaweda tayud Duntug e Sinai, ey nekitbal hi Apu Dios e Dios tayun hi-gatsu, 3 beken idan aammed tayun nunman hu nekiungbalan tu, nem hi-gatsun emin ni wadan nunyan mategu. 4 Yan nunman hu immehelan Apu Dios et mampeang-ang ni hi-gatsu etan di apuy. 5 Nem gapu tep kayu kaumtakut etan ni apuy ey eleg kayu manteyed di duntug, et iehneng dakeyun hi-gak ni mekihhummangan nan Apu Dios. Et yadda intugun tu ey humman intugun kun hi-gayu.
6 Kantuy ‘Hi-gak hi Ap-Apu e Dios yun nengihwang ni hi-gayun neihbutan yud Egypt.
7 Hi-gak ni ebuh hu Dios ni deyyawen yu, endi edum.
8 Entan pengapya yun heniddan wadad kabunyan, ya wadad puyek niya wadad danum ni deyyawen yun dios yu. 9 Eleg mabalin ni kayu manyu-ung ni hi-gada ey yudda deyyawen ni dios yu. Tep hi-gak e Ap-Apu e Dios yu, ey nemahhig bunget ku hedin wada edum ni ibbilang yun dios yu e beken ni hi-gak ni ebuh. Kastiguen kudda etan eleg mengibbillang ni hi-gak, anin idallin u-ungnga da, yadda inap-apu da niyadda pidwan inap-apu da. 10 Nem eleg mepappeg hu impeminhed kuddan etan ni tuun neminhed ni hi-gak niya kamengu-unnud ni tugun ku ingganah di meikkahanlibun helag da.
11 Entan tu usal di legelegem hu ngadan ku e Ap-Apu e Dios yu, tep eggak hehmeka hu tuun mengippahding nunman, et humman hu kastiguen ku.
12 U-unnud yu elaw ni Sabaduh ni kamengillin ni aggew, e humman dedan la intugun ku e Ap-Apu e Dios yu ma-lat ipahding yudda lebbeng tun meippahding. 13 Yan enem ni aggew di hanlingguan hu pengingunnuan yuddan ingngunu yu. 14 Nem yan meikkeppitun aggew e Sabaduh, ey endi an mangngunnun hi-gayu, yadda u-ungnga yun lalakki niya bibi-i, yadda bega-en yun lalakki niya bibi-i, anin idan animal yun baka niya kebayyu, yadda edum ni animal yu, et yadda nekibebley ni hi-gayu. Mahapul ni man-iyyatu kayun emin ni nunman ni aggew, tep humman ni aggew ey neieng-eng ni hi-gak e Ap-Apu e Dios yu. 15 Nemnem yu e neihbut kayu lan nunman di Egypt, et dakeyu awiten ni Ap-Apu e Dios yu, et hi-yanen yu humman ni bebley gapuh ni kamengippetngan kabaelan tu niya gapuh idan impahding tu. Humman gaputun intugun tu e pehding yu hu elaw ni Sabaduh.
16 U-unnud yud ameyun ineyu meippuun di intugun tu ma-lat mebeyyag hu panha-adan yudman ni bebley ni iddawat tun hi-gayu.
17 Entan tu patey hu edum yun tuu.
18 Entan tu iulig hu beken yu ahwa.
19 Entan panekew yu.
20 Entan tu ehel hu itek meippanggep ni edum yun tuu.
21 Entan tu gamgami hu baley ni edum yu, ya ahwa da, ya bega-en da, ya bakeda, ya kebayyu da winu hipan wadan hi-gada.’
22 Huyyadda intugun Apu Dios ni hi-gatsun emin ni helag Israel eman ni inlet tun immehel di apuy e linikweh ni kulput niya engeenget. Huyyan ebuh inhel tun nunman et itudek tuddad dewwan nedampillag ni batu et idwat tun hi-gak.
23 Nem yan nangngelan yuddan nunyan inhel tu etan di engeenget ey kamantetebbel etan apuy, ey immalidda aap-apu yun hi-gak. 24 Et kanday ‘Impeang-ang Apu Dios e Dios tayu hu dayaw tu niya kasina-gey tu, ey dingngel tayu ehel tun nalpud apuy. Dingngel tayun immehel hi Apu Dios ey nanengtun mategu itsu. 25 Nem yan nunya ey kele itsu mettey? Tep nanna-ud e hedin um-ehel mewan hi Apu Dios e Dios tayun hi-gatsu, ey mettey itsu ey gihheben daitsun nemahhig ni apuy. 26 Kaw wada tuun nanengtun mategu anin ni dingngel tu hi Apu Dios ni immehel di apuy? 27 Lakkay e Moses et mu dengelen hu e-helen Apu Dios e Dios tayu. Et mambangngad ka et ehelen mun hi-gami inhel tun hi-gam et u-unnuden mi.’
28 Dingngel Apu Dios humman ey kantun hi-gak ey ‘Dingngel ku inhel idan nunyan tutu-u. Em, kayyaggud numan hu inhel da. 29 Hedin hanniman et anhan hu pannemnem da ey deyyawen da-ak ali niya u-unnuden dan ingganah tugun ku, ey kayyaggud alin ingganah hu meippahding ni hi-gada et yadda helag da. 30 Lakkay et mu ehelen ni hi-gada et mambangngad idad kampu da. 31 Nem hedin hi-gam e Moses ey panha-ad kadya et ehelek ni hi-gam emin hu tugun ku, et ituttuddum ni hi-gada, et u-unnuden daddad bebley ni iddawat kun hi-gadan pambebleyan da.’