23
Ya neteyyan nan Sarah
1-2 Hi Sarah ey hanggatut et dewampulut pitu toon tu et han matey di Hebron di Kanaan et ibeluan Abraham.
3 Limmaw hi Abraham di kad-an idan Hittite et kantuy 4 “Hi-gak ey binunallak eyad bebley yu et endi nak pengikkullungan ni ahwak. Igetang kayu anhan ni puyek ma-lat nak pangikulungan ni hi-gatu.” 5-6 Kanday “Dammutu. Hedin hi-gami man daka kaibbilang ni eta-gey ni ap-apu. Et humman hu, ngenamung kan mampillin pinhed mun pengikkullungan ni ahwam.”
7 Ey nanyuung hi Abraham di hinangga dan emin et kantuy 8 “Hedin i-abulut yun ikkulung ku ahwak di deya, ey ibega yu anhan nan Eplon e u-ungngan Sohar 9 et igetang tun hi-gak etan leyang di Makpelah di dagsin payew tu. Mahmahi yu hedin piga pengiggettang tu ma-lat bayadan kun wada kayun menang-ang et pambalin kun gungat ni pamilyah ku.”
10 Wadadman hi Eplon e kamekiyuyyuddung ni hi-gada et umhel et denglen idan emin ni tuun neamung etan di heggeppan di bebley. 11 Kantun Abraham ey “Apu, iddawat kun hi-gam ni liblih humman ni leyang niya payew ni nunyan wadaddan emin eya tuun nangngel. Lakkay et mu ikulung diman etan ahwam.” 12 Nanyuung mewan hi Abraham di hinanggaddan Hittite. 13 Et kantun Eplon ey “Eleg, abulut mu kuma et gatangen ku humman ni puyek et nak pangikulungan ni ahwak. Iddawat ku ustuh ni bayad tu.” Humman ni inhel tu ey dingngel idan etan ni tuun neamung.
14-15 Hinumang nan Eplon e kantuy “Apu, ya balol nunman ni puyek ey epat ni gatut ni palatah ni ebuh. Nem kaw piga anhan humman ni hi-gatan dewwa? Mu kuma ikulung hu ahwam diman.” 16 Inebulut Abraham et ipadngel tuddan Hittite ni binilang hu epat ni gatut ni palatah ni bayad etan ni puyek e in-ingngeh tud kapengigtang idan kamampanggettang.
17 Et humman ni puyek Eplon di Makpelah e neihnup di Mamre e wada leyang tu, ya payew tu niyadda keyew tu ey nambalin ni puyek nan Abraham tep ginatngan tu. 18 Emin ida Hittite ni neamung ey inamta da e puyek law Abraham humman ni puyek Eplon.