¹ Yan laputu ey lintun Apu Dios hu kabunyan niya puyek. ² Nem ya puyek ey eleg ni mapkel, ey endi nanha-ad diman. Edallem ni danum ni ebuh hu wadadman niya engeenget. Ey wada hu Ispirituh Apu Dios e heni dibdib di ta-pew ni danum.

³ Immehel hi Apu Dios et kantuy “Kaweda kan kawwalwal.” Ey tu-wangun newalwalan. ⁴ Ey inang-ang Apu Dios humman ni lintu tu ey kayyaggud. Impan-appil tu hu kawwalwal niya engeenget. ⁵ Et ngadanan tu hu kawwalwal ni aggew ey nginedanan tu hu engeenget ni hileng. Et mahileng nunman et mewa-wa ey humman hu nemangulun aggew.

^6-7 Kan mewan nan Apu Dios ey “Kaweda kan mengedwan danum et wadad ahpat edum ey wadad nandaul hu edum.” ^a Ey humman neipahding. Ya etan wadad ahpat ey humman ida kulput ni kakelpuin udan, ey ya wadad nandaul ey humman danum eyad puyek. ⁸ Humman ni nengedwan danum di ahpat et yad nandaul ey nginedanan Apu Dios ni kabunyan. Et mahileng et mewa-wa ey humman hu neikadwan aggew.

⁹ Kan Apu Dios ey “Kesiplud kan danum et meappil kad pangil ma-lat meang-ang hu puyek.” Ey humman neipahding.^{b 10} Ya etan mamega ey nginedanan tun puyek, ey ya siniplud tun danum ey nginedanan tun baybay. Ey humman ni lintu tu ey kayyaggud. ^11-12 Immehel mewan hi Apu Dios et kantuy “Patmel mu e puyek emin hu nambakbaklang ni kameitnem niyadda keyew ni kaumlameh ni nebukelan ma-lat mannananeng ni wada henin nunman ni meitnem.” Ey neipahding humman. Ey kayyaggud humman ni lintun Apu Dios. ¹³ Nehileng et mewa-wa ey humman hu neikatlun aggew.

¹⁴ Kan mewan Apu Dios ey “Kawedadda umbebnang di kabunyan ma-lat meappil hu kawwalwal di hileng et pengiimmatunan niya pengamtaan ni tsimpuh ni aggew niyadda tsimpuh ni toon. ¹⁵ Et humman idan umbebnang di kabunyan ey bebnangan da hu puyek.” Ey neipahding ida huyya. ¹⁶ Lintun Apu Dios hu dewwan et-eteng ni kaumbebnang e humman hu aggew e kaumbebnang ni kawwalwal et ya bulan e kaumbebnang ni hileng. Ey lintu tudda pay hu dakel ni bittuwen. ¹⁷ Inha-ad tudda huyyan kaumbebnang di kabunyan ma-lat mabnangan hu puyek ¹⁸ ni kawwalwal ni yan hileng, ey ma-lat meappil hu kawwalwal niya hileng. Ey inang-ang Apu Dios humman ni lintu tu ey kayyaggud. ¹⁹ Nehileng et mewa-wa ey humman neika-pat ni aggew.

²⁰ Kan Apu Dios ey “Kawedan emin hu nambakbaklang ni mategud danum niya kaweda dakel ni nambakbaklang ni mantayyatayyab di kabunyan.” ²¹ Et mawedan emin hu nambakbaklang ni mategud baybay e etta-teng ida edum. Ey lintu tu nambakbaklang ni sisit. Ey inang-ang Apu Dios ida humman ni lintu tu ey kayyaggud. ²² Binendisyonan tudda hu mategun wadad baybay ma-lat medakkel ida et mapnu hu baybay. Ey binendisyonan tudda dama hu sisit ma-lat medakkel ida. ²³ Nehileng et mewa-wa ey humman neikeliman aggew.

^24-25 Kan mewan Apu Dios ey “Kaweda eyad puyek hu nambakbaklang ni animal ni kaman-impah, yadda maeyum niyadda beken, yadda kamambinulluh, yadda kamangkinaddap niyadda kamandinallan.” Ey tu-wangun newadadda. Ey inang-ang Apu Dios ida humman ni lintu tu ey kayyaggud.

²⁶ Entanni ey kan Apu Dios ey “Yan nunya ey leltuen tayu law hu tuun henin^c hi-gatsu ma-lat pan-ap-apun emin ni mategud puyek, yad kabunyan niyad baybay.” ²⁷ Henin nunman hu impahding Apu Dios e lintu tu hu tuun mei-ingngeh hu elaw dad elaw tu. Ey lintu tuddan laki niya bii.^{d 28} Et bendisyonan tudda e kantuy “Kahlag kayu et medakkel kayu et mebebleyan ni emin eya puyek et hi-gayu hu ngenamung eyan puyek, anin idan deleg di baybay, yadda sisit niyaddan emin hu animal.”

²⁹ Ey kantuy “Indaddan kun emin hu nambakbaklang ni kameitnem niyadda keyew ni kamekkan lameh da ma-lat wada kennen yu. ³⁰ Ey winedak hu helek niyadda edum ni kameitnem ma-lat wada kennen idan animal niyadda sisit.” Emin ida huyya ey impahding tu ma-lat panyaggudan da. ³¹ Ey inang-ang nan Apu Dios ida humman ni lintu tu ey kayyaggud ni peteg. Nehileng et mewa-wa ey humman hu neika-nem ni aggew.