22
Nipatikhaw ay John hini gwanggwang ja ajiw an mangchat hi piˈtakhuwan an ma-id chi pogpogna
1 Impatikhaw ni angher ay ha-in hini gwanggwang an arpugwan ni chanum an mangchat hi piˈtakhuwan an ma-id chi pogpogna. Mamakhanah hichuy an gwanggwang an khun pfumutay ay chuy negpongan chi tronon Apo Jos ja hini Pfoˈtot an Karnero. 2 Ja titinnud tay an gwanggwang hini khawwan ni ampfilog an kurhan chuy an pfuglay. Ay chuy nunchinammangan chuy gwanggwang ja gwa han ajiw an mangchat hi piˈtakhuwan. Pfinnulan an pfumunga hitay an ajiw hotti mumpahimpolo ta chugwa an pfumunga hi hentagwon. Ja hana tupfu na ja ichat nay pomhochan chi achor ta ma-id munchogchokhoh.
3 Ma-id oh-ohhah machakngan hi napukhit hi dusaon Apo Jos ay chuy an pfuglay. Gawwacha hichi hini tronon Apo Jos ja hini Pfoˈtot an Karnero, ja an amin hana khun munserbi ja daydayawon cha hija. 4 Tikhagwun cha hini angah na ja mitulaˈ hini ngachana ay ni tuˈpaw cha. 5 Ma-id mahpay hehellong hichi ja achi cha mahapor chi hilaw ja hukhit, ti hi Apo Jos chi manenakhan ay chicha. Ja miˈ-ap-apo cha ay hija hi ma-id chi pogpog na.
6 Inalin ni angher ay ha-in hi, “Umannung ja nahamad hay hato nipa-innila ay he-a. Ti hi Apo Jos, an khun mangchat ay ni Espiritu na hay hachi profeta, chi nannag ay ha-in an angher na, ta ipa-innilaˈ ay chaˈju an pfaar na hay hato khumaju an ma-at.”
Mumpfangngad hi Hesus.
7 Allon Hesus hi, “Pa-ennongan ju, ti ma-id umijahop hot mumpfangngachaˈ. Madmachennor an amin hana khun mangat hay hato nipadtu ay tay an libju an intuchun Apo Jos.” 8 Ha-in hi John an nangngor ja nanikhaw an amin hato an intulaˈ u. Napfalin an impatikhaw chin angher an amin hay hato ja nunheppeyaˈ ta dayawoˈ hija. 9 Muti inali na hi, “Achiyaˈ dayawon ay he-a. Ti unaˈ oha khu an pfaar Apo Jos, an amat ay he-a ja hana numpun-ibpfam an profeta ja an amin hana khun mangat hay hato nitulaˈ ay tay an libju. Hotti hi Apo Jos chi dayawon ta-o an amin.” 10 Ja entoloy na an nangali hi, “Achim ehaˈpfa hay hato an nipadtu ay tay an libju an impa-innilan Apo Jos, ta un mu gwot ipa-innila hi tatakhu, ti khumaju an ma-at hay hato. 11 Ja nachakngan ayya hini timpo an pa-atan hay hato, ja hana khun mangat hi napukhit ja akhakhaˈ-ihaw, ja etortoloy cha an mangat. Ja hay hana magpong chi piˈtakhuwana ja naˈna-unnud cha ay Apo Jos, ja etoloy cha.”
12 Allon khu Hesus hi, “Pa-ennongan ju ti achi mapfajag hot mumpfangngachaˈ ta ijaliˈ hini linagpfun chi oha-ohanna an me-okor ay ni neˈ-at na ay ni niˈtatagkhuwana. 13 Ha-in hini ma-ali an Alfa ja Omega, ti ha-in chi nahhun ja me-ang-angonoh, ja ha-in chi gawwacha chin hunhunana ja chin ang-angonohna.
14 Akhaˈkhaja aju an na-ulahan chi lopfong na, an hay podhona an hapiton ja na-ulahan hana pfahor ju, ti chaˈjuy gway kalintikhana an humikhop ay ni pantaw nuy pfuglay Apo Jos ja an meˈ-an ay ni pfungan ni ajiw an mangchat hi piˈtakhuwan an ma-id chi pogpogna. 15 Muti achi miˈhikhop hana khun mangat hi napukhit, hana mumpfuni, hana me-eloˈ hi pfu-un ahagwa na, hana khun mundayaw hi achi umannung an jos, hana mumpunlahlah, ja hana khun mangallilaw hi tatakhu.
16 Ha-in hi Hesus an nannag ay ni angher u ta ipa-innila na hay hato hana khun ma-am-amamung an mundayaw ay ha-in hana numpfino-ob-on an pfuglay. Ha-in hini holag Ari David ja ha-in hini ma-ali an mamikhat an pfittuwan.”
17 Hini Espiritu Santo ja hana namati an ahagwaon ni Pfoˈtot an Karnero ja khun cha allon hi, “Umali aju, chaˈju an ma-ugaw ta michatan aju ay ni achi manginaan an chanum an mangchat hi piˈtakhuwan an ma-id chi pogpogna.” Ja an amin khu hana mangngor ay tay ja mahapor an piˈ-ali cha hi, “Umali aju ta midchum aju!”
Hay ang-angonoh an itukhun John
18 Ha-in an hi John ja hay alloˈ ay chaˈju an mangngor ay cha tay nipadtu ay tay an libju an impa-innilan Apo Jos, ja achi ju hulukan hato nitulaˈ. Ti hana manulukan ja dusaon Apo Jos chicha ay ni likhat an nitulaˈ ay tay an libju. 19 Ja hana mangaˈ-aanan ay cha tay inalin Apo Jos an nipadtu ay tay an libju, ja achi apfuluton Apo Jos an meˈ-an cha ay ni pfungan ni ajiw an mangchat hi piˈtakhuwan. Hot achi cha miˈtakhu ay ni Nasantuwan an Siudad Apo Jos an na-ali ay tay an libju. 20 Hi Hesu Kristo an nangpa-innila hay hato intulaˈ u ja allona hi, “Achi mapfajag hot mumpfangngachaˈ.” Amen. Umali a, Apo Hesus!
21 Hi Apo Hesus chi mangkhohkhohan ay chaˈju an amin an tatakhun Apo Jos.