19
Chengngor John hana khun mundaydayaw ad langit.
1 Napfalin hay hato ja chengngor u han hapit chi cho-or an tatakhu an narpu ad langit, ja hay khun cha allon ja,
“Madaydayaw hi Apo Jos! Dayawon ta-o hi Apo Jos an nanakhu ay chita-o. Napfagpfagto hija ja gwacha ay hija chi apfalinan! 2 Umannung an magpong hini atona an mangdusa! Dinusa na hinuy mahaphapapit an pfupfai an namaˈ-i hi cho-or an tatakhu hichi lota. Ti hitay an pfupfai ja khinujukhuy na chicha ta peˈ-at cha hana akhakhaˈ-ihaw an khuna aton. Nadusa hija khapo ta hijay namatoy hana namati an pfaar Apo Jos.”
3 Ja iniˈgwap cha khu an nangali hi,
“Madaydayaw hi Apo Jos ti magpong hija an munhugwi. Khenhob na hinuy otong an pfuglay ja khun tomolo hini ahoˈ na ja ma-id apogpokhan ni likhat na.”
4 Nunheppe chin chugwam polo ta apat an pangulu ja chin apat an he-od-odmay ta dinayaw cha hi Apo Jos an inu-umpfun ay chuy nuntotonga an trono, ja inali cha chi, “Amen! Madaydayaw hi Apo Jos!”
5 Ja gwacha han hapit an narpu ay chuy negpongan chuy trono ja inali na hi,
“Chaˈju an pfaar Apo Jos an nanginnila an toma-ot ay hija, Natakhay man wenno nababa, Ja mundayaw aju an amin ay Apo Jos.”
Hini kasar ni Pfoˈtot an Karnero
6 Ja chengngor u han hapit chi cho-or an tatakhu an amat hi khongaah chi chanum, ja amat hi ichor an mungkhikhinlunud. Chengngor u an inali cha hi,
“Madaydayaw hi Apo Jos an Apo ta-o! Ti hija hini Jos an achi malukud chi apfalinana an khun mun-ap-apo. 7 Mun-an-anla ta-o ja dayawon ta-o hija an Napfagpfagto! Ti nachakngan chin pungkasalan ni Pfoˈtot an Karnero ja nunhahagkhana hini pfupfai an ahagwaona.a 8 Nichatan hitay an pfupfai hi pfuher ja maleneh ja munlittoˈ an lopfong.”
Angkhaynanah inali cha. Hay hato an pfuher an lopfong na ja hijah tay hana magpong an ugalin hana tatakhun Apo Jos. 9 Ja inalin ni angher ay ha-in hi, “Piˈtulaˈ mu hitay. Akhaˈkhaja aju an meˈkhagong ay ni kasar ni Pfoˈtot an Karnero.” Ja inali na khu hi, “Umannung an hapit Apo Jos hay hato.” 10 Emmopoh hitay an inali na ja nunheppeyaˈ ta dayawoˈ koma hichuy an angher muti inali na ay ha-in hi, “Achiyaˈ dayawon ay he-a! Ti ohaaˈ khu an pfaar Apo Jos an amat ay chaˈju ja cha nuy i-ibpfam an namati, an amin aju an khun miˈ-unud ay ni umannung an tukhun an narpu ay Hesus. Hi Apo Jos ja angkhay chi madayaw! Ti hitay magpong an tudtuchu ja hija hana khun ipa-innilan hana profetan Apo Jos.”
Nipatikhaw ay John hi Hesu Kristo an nunhahakkay hi ampfaju an mapuchaw.
11 Entangad u khu ja nipfughor ad langit ja tinnig u han mapuchaw an ampfaju. Ja hini nunhahakkay ja hija hini ma-ali hi Mapagtarkan ja Umannung. Magpong hija an manugwi, ja magpong khu hini atona an miˈkhupfat hay hana pfuhur na. 12 Chin mata na ja amat hi apoy an khun pfumichang, ja cho-or chin korona na. Gwa han ngachan an nitulaˈ ay ni achor na ja ma-id nanginnila ay ni podhona an hapiton nu pfu-un hija ja angkhay. 13 Chin lopfong na ja netamor hi chala. Ja hay allon cha hi ngachan tay nunhahakkay ja Hapit Apo Jos.b 14 Ja nitnud hachi cho-or an hinchalo ad langit. Numpunhakay cha hi ampfaju an mun-apuchaw ja numpunlopfong cha hi maleneh ja mumpuchaw an lopfong. 15 Hichuy khun mangpangpangulu ay chicha ja gwa han matachom an pfangid an khun pfumutay ay chuy ta-o na,c ja hijay pangapfak na hay hana pfuhur na an tatakhu hi apfuglapfuglay. Ay ni pun-ap-apugwana ay chicha, ja dusaona an amin hana achi mangapfulut ay ni apfalinana, ti pun-ikhamchit na an amat ay ni mumpfaypfay hi pfungan chi ubas ta pfumutay hini chanum na. Hitay chi pangpatikhagwana ay ni munlinapoh an pfungot Apo Jos an achi malukud chi apfalinana. 16 Nitulaˈ han ngachana ay ni lopfong na ja ay ni orpo na. Ja hay nitulaˈ ja, “Arin an amin chi a-ari-ari ja Apon an amin chi a-ap-apo.”
17 Tinnig u khu ja gwa han angher an timmataˈchug ay chuy hukhit. Ugwapana hay hachi hagwiti an khun tomajap ad uchu ja inali na hi, “Umali aju ta meˈ-orpfong aju ay tay enchachaag Apo Jos! 18 Umali aju ta pun-a-an ju hay hato lamoh hana ari, kapitan ja hinchalo an nun-a-atoy ti na-apfak cha. Ja neˈ-an ju hay hato lamoh hana ampfaju ja hana numpunhakay ja hana cho-or an tatakhu, himpfut ja pfu-un, natakhay ja nababa!”
19 Napfalin ja tinnig u chin atattata-ot an animar ja hana ar-ari heto lota ja hana hinchalo cha an na-amung ta meˈpapattoy cha ay chuy nunhahakkay ay chuy mumpuchaw an ampfaju ja hana hinchalo na. 20 Muti nappap chin atattata-ot an animar ja chin munlahlah an profeta an nichatan hi apfalinan an mangat hi milagro. Ja hay hachi an milagro chi nangallilaw na hay hana tatakhu an nun-amarkaan ay ni pfilang an markan ni atattata-ot an animar, ja hay hana nundayaw ay ni pfolor na. Hitay atattata-ot an animar ja hitay munlahlah an profeta, ja nituud cha an mamattakhu ay chuy pfannaw chi asufre an khun munchalang. 21 Ja chin nunhahakkay ay chuy mumpuchaw an ampfaju ja nun-ehegwat na chin pfangid an khun pfumutay ay chuy ta-o na ja nun-a-atoy hachi hinchalon hachi a-ari-ari. Ja nun-a-an hachi hagwiti chin lamoh cha ingkhana hi nun-abhug cha.