15
Nipatikhaw ay John han peto an angher an nichatan hi malokong an nittugwan ni peto an me-ang-angonoh an likhat an ipa-alin Apo Jos heto lota
1 Amat hichi ja gwa khu han nabnab-on an tinnig u ad langit an pang-imatunan. Gwa han peto an angher ja gwa ay chicha hini peto an me-ang-angonoh an mamarpalikhat hi tatakhu. Ti hay hato chi ang-angonoh chi likhat an ichat Apo Jos heto lota. 2 Ja tinnig u khu han omaˈ-at hi chagkhar an baybay an khun umapoy. Tinnig u khu hachi tatakhu an nangameh chin atattata-ot an animar khapo hi agkhuy cha nundayawan chin pfolor na ja agkhuy cha numpamarkaan chin pfilang chin ngachana. Timmataˈchug cha ay chuy pingngit chi amat hi chagkhar an baybay, ja inu-ugnan cha hachi tadcheng an inchat Apo Jos ay chicha. 3 Ja khun cha kankantaon chin kantan Moses an pfaar Apo Jos an hija khu chin kantan ni Pfoˈtot an Karnero, an khun cha ekanta hi,
“Apo Jos an achi malukud chi apfalinam! Napfagpfagto a ja ma-id mangat hana khun mu aton! He-a an arin an amin chi tatakhu, Magpong a ja maphod an amin chi khun mu aton. 4 Ja mataˈtan a, Apo, ja ma-ar-ali hini ngachan mu ti napfagpfagto a. Ma-id chi hay miˈpadchung ay he-a an nasantuwan. He-a chi daydayawon an amin chi tatakhu hi apfuglapfuglay, ti tinnig cha an magpong hana khun mu aton.”
5 Napfalin hato ja tinnig u an nipfughor chin Na-assantuwan an Kwarton chi Templo ad langit an gawwachaan hachi nitula-an chin urchin Apo Jos. 6 Ja pfimmutay ay chuy Templo hachi peto an angher ja gwa ay chicha hachi peto an likhat. Ja maleneh an munherhelat chin lopfong cha ja napfalitu-an hachi nun-elepfod chin pfokhaˈ cha. 7 Ja oha ay cha chuy apat an he-od-odmay chi nanggwanah han peto an pfalitoˈ an malokong ay cha chuy peto an angher. Ja hay nun-itto ay cha tay an malokong ja hini pfungot Apo Jos an hija chi mamattakhu hi ma-id chi pogpogna. 8 Unagkhu la-ahna ja napnu hichi Templo hi ahoˈ ti impatikhaw Apo Jos hini dayaw ja apfalinana. Hotti ma-id chi hay humikhop hichi Templo ingkhana hi mapoh an ma-at hachi peto an likhat an gwa ay chuy malokong an nichat hachi peto an angher.