JUDE
1
1 Ha-in hi Jude an uchichiyan James, an oha an khun munserbi ay Hesu Kristo. Tayya an muntula-aˈ ay chaˈju an na-ajakhan an numpfalin hi tatakhun Apo Jos. Hitay Jos Ama ja podpodhon chaˈju ja a-allungan chaˈju ingkhana chin pumpfangngachan Hesu Kristo.
2 Hay kalalag u ja ug-ugman Apo Jos hini nignikha ja pamhod na ay chaˈju ja hay pomhochan ni piˈtakhuwan ju.
Mahumarja hana khun muntudtuchu hi nehahalla
3 Chaˈju an a-akhi an penpenhod u, hay itulaˈ u koma ay chaˈju ja hini aton Apo Jos an manakhu ay chita-o an namati, ti hitay chi penpenhod u an allon. Muti tayya an nat-on hitay itulaˈ u. Ti mahapor an alloˈ ay chaˈju ta etaˈchokhan ju hini umannung an tudtuchu an pinati ta-o. Ti hitay umannung an tudtuchu an impa-innilan Apo Jos hana tatakhu na ja achi marmarman. 4 Hotti itulaˈ u hay hato ay chaˈju ti gwacha anu hana uchumna an nidchum ay chaˈju an achi mangunud ay Apo Jos, an gway nange-encharmon cha hi napukhit an nomnom. Ti podhon cha an lomanon hini podhona an hapiton ay ni khohkhoh Apo Jos, an allon cha hi achi humingar hi Apo Jos nu unuchon ta-o hana napukhit an penhod chi achor, ti ma-agkhohkhoh anu. Ja achi cha apfuluton hi Hesu Kristo ja angkhay chi Apo an unuchon ta-o. Napfajag an nipa-innila ay ni Hapit Apo Jos hini umali an adusaan hay hato tatakhu an nan-ug ay hija.
5 Aniˈ-ila ju hitay hapitoˈ an dusaon Apo Jos hana pfimmahor chin nahop, muti penhod u khu an epanomnom ay chaˈju. Nomnomnomon ju an tinakhun Apo Josa hachi Israelitas an tatakhu na chin nangpakakana ay chicha ad Egypt. Muti gwacha hana agkhuy namati ay hija, hijaot una dusaon chicha ja nun-a-atoy cha hichi let-ang.b 6 Nomnomon ju khu hay hachi angher an achi mappog ay ni haad an inchat Apo Jos ay chicha ja tenaynan cha agkhu niˈ hini maphod an gwachaan cha ad langit. Hijaot un pfenangkelengan Apo Jos chicha hi pfangkeleng an achi mahopchot, ja impfalud na chicha han munhehellong an lukhar hichi ad Chalom, ingkhana hi machakngan hini arkhaw an Punhugijana. 7 Dinusan khu Apo Jos hana tatakhu ad Sodom ja ad Gomorah ja hana nunlenawlaw an pfuglay an pfimmahor an amat chin pfimmahulan hachi angher.c Ti hachi tatakhu ja khun cha akhamangon hana pfu-un ahagwa cha, ja nunhegla hini aton cha an mangat hi akhakhaˈ-ihaw. Hijaot un khenhob Apo Jos chicha ja hachi pfuglay cha, ja hitay enat na chi pun-achalan ta-o an dusaon Apo Jos hana achi umunud ay hija hi apoy an achi madmachop.d
8 Ja hija khu chi omaˈ-atan hay hato muntudtuchu hi nehahalla. Hini khun cha empon ja hijay panghunungan cha ay ni khun cha aton, muti un khuminit ay ni achor cha. Achi cha apfuluton an gway mun-ap-apo ay chicha, ja pahigwon cha pay hana angher. 9 Hi agkhu niˈ Michael an pangpangulun an amin hana angher Apo Jos, ja mun-okhon an mamahiw hi angher. Ti chin niˈhongilana ay Satanas hi hay gway kalintikhana an mangala chin achor Moses, ja agkhuy na intubtupfan hi Satanas. Un hay inali na ja, “Nangamong hi Apo Jos an manghingar ay he-a.” 10 Muti hay hato tatakhu ja munlinapoh hi pamahigwan cha hana achi cha ma-awatan. Mipadchung cha hay hana animar an un lokhomna hon enat cha hini podhon cha an aton. Amat hina khu ay chicha an unuchon cha hana napukhit an penhod chi achor cha, ja hija hini mamaˈ-i ay chicha.
11 Kaˈka-ahi cha ti atattata-ot hini i cha adusaan! Gwa ay chicha hini napukhit an nomnom Kain.e Amat cha khu ay Balaamf an ephod cha hay pfumahulan chi uchumna ta gway aton cha an pfumaˈnang. Ngumangannu cha hay hana ap-apo cha an amat ay Korahg an nanglukhangeh ay Moses an enhaad Apo Jos. Machamot chin dusan Korah ja amat hina khu ay cha tay an dusaon Apo Jos chicha hi ma-id chi pogpogna.
12 Hay hato ja uncha paˈ-iyon hini khun ju a-am-amungan an panganan ja pangnomnoman chin natajan Kristo. Achi cha mun-okhon an meˈ-orpfong ja ma-alum cha an mangan, ti hini achor cha chi anila cha ja angkhay. Ma-id herpfi cha, an amat cha hi pfonot an ni-ijah an ma-id i-ali na hi uchan. Ja amat cha khu hi ajiw an achi pfumunga hi ahipfungaan, ja nun-aˈleng ti napfaˈkhut. 13 Hana khun cha aton ja munnaud an umipapfa-in. Amat cha ay ni lukhit an inin-in chi mapfi-ah an tepjaˈ hichi baybay. Amat cha khu hi pfittuwan an ma-id maptoˈ hi i cha pangedchongan. Hotti enhakhanan Apo Jos han munnaud an munhehellong an pipfaluchan cha ja ingkhana.
14 Hi Enok an aleman chi apon Adam, ja impadtu na hini adusaan hay hato khun muntudtuchu hi nehahalla. Inalin Enok hi, “Chonglon ju. Umali an umali hini Apo ja hay hana linipfulipfu an nasantuwan an angher na 15 ta hugijona an amin chi tatakhu. Ukumona hana napfahulan an tatakhu khapo hana pfahor ja napukhit an ugali cha. Ukumona hana tatakhu an gway inali na hi mipfuhur ay hija.” Hitay chi impadtun Enok. 16 Hay hato ja un cha nangulungulan ja un cha maˈngoh an achi cha mapmappog. Unuchon cha hini penhod ni achor cha, ja hini pidaydayawan ni achor cha chi hapihapiton cha. Ja khun cha e-ar-alla an padayawan hana uchumna an tatakhu ta alom ja gway aton cha hi maphod ay chicha.
17 Muti chaˈju an penpenhod u an a-akhi, achi ju alichuwan chin impa-innilan hachi apostol Apo Hesu Kristo an ma-at. 18 Inali cha mit ay chaˈju hi, “Chin ang-angonoh chi ar-arkhaw ja gwa hana umali an khun mangat ay ni napukhit an podpodhon chi achor cha an mipfuhur ay Apo Jos, ja epoy cha hi hupfug hini pammati ay Apo Jos.” 19 Unuchon cha hini nomnom cha an tatakhu ti ma-id ay chicha hini Espiritun Apo Jos. Hay hato chi chumalat hi apaˈ-iyan ni pun-oh-ohhaan ju an namati.
20 Muti chaˈju ayya, a-akhi an penpenhod u, ehamad ju hini pammatin chi oha-ohanna ay tay umannung an tudtuchu an narpu ay Apo Jos. Tikhan ju ta hini Espiritu Santo chi mangpadchong ay ni aton ju an mungkalalag. 21 Achi aju umachawwi ay ni pamhod Apo Jos ad ugwani an panpanochan ju ay ni piˈtakhuwan an ma-id chi pogpogna an michat ay chaˈju khapo ay ni khohkhoh Hesu Kristo an Apo ta-o. 22 Tulungan ju hana munharhalinchugwa chi nomnom na ta mehamad hini pammati cha. 23 Ja nu gway na-allilaw ja lapchu-on ju ta achi meloh an makhah ay ni apoy. Nignikhaon ju khu hana khun pfumahor, muti chuˈkhon ju hini pfahor an khun cha aton ta achi aju ma-alinan.
24,25 Madaydayaw hi ma-id chi pogpogna hini oh-ohha an Jos an Nanakhu ay chita-o khapo ay Hesu Kristo an Apo ta-o. Gway apfalinana an manalimun ay chaˈju ta achi aju ma-utaw khapo hi pfahor. Ja gway apfalinana ta pumpfalinon chaˈju hi magpong ta mehnot aju ay hija, ja munlinapoh hini anla ju an manikhaw ay ni glorya na. Madayaw hija ti hija hini natakhay an Jos an achi malukud chi apfalinana, ja hija chi khun mangpaptoˈ nete-a chin hunhunana ingkhana ad ugwani ja ma-id chi pogpogna. Amen.