2
Hini maphod an apanuhan chi meha
1 Hotti hitay chi paˈpaˈ-alloˈ ay he-a ta allom hana namati ta pa-ennongan cha an mangekalalakhan an amin hana padchung cha an tatakhu. Ja ekalalag cha ta ekhohkhohan Apo Jos chicha, ja khun cha munyaman hana maphod an khuna aton ay chicha. 2 Peˈkalalakhan cha khu hana ar-ari ja an amin hana a-ap-apo, ta un adniˈ malenong ja ma-id ar-ali ay tay piˈtakhuwan ta-o, ja un ta-o naˈna-unnud ay Apo Jos, ja hay mapmaphod chi aton ta-o hana i-ibpfa an tatakhu. 3 Nu amat hetoy aton ju an mungkalalag, hot maphod ja omepachenor ay Apo Jos an nanakhu ay chita-o. 4 Ti hay podhon Apo Jos ja an amin chi tatakhu ja miˈtakhu cha ay hija, ja annilaon cha hana umannung an tudtuchu. 5 Ti un na-ohhay Apo Jos ja oh-ohha khu hini khun mangepfattan hi tatakhu ay Apo Jos, an ma-id uchumna nu pfu-un hi Kristo Hesus an numpfalin hi takhu. 6 Inapfulut nay natajana ta hijay hugwar chi pfahor an amin chi tatakhua, ja na-at hitay ay chuy timpo an eneˈchan Apo Jos hi a-atana. Hitay chi nangpatikhana an podhona an miˈtakhu hana tatakhu ay hija. 7 Hitay khu chi khimmapo hi ujaˈ nehaachan an muntudtuchu, ja an numpfalin hi apostol, ta gway mangaskasaba hana Hentil ay ni umannung an tudtuchu ta gway aton cha an mamati. Ja umannung hitay alloˈ an pfu-un lahlah.
8 Ja an amin chi hay i ju a-amungan an pundaydayawan, ja hay podhoˈ ja hana linala-e chi mangpangpangulu hi kalalag. Muti tikhan cha ta hini piˈtakhuwan cha ja meˈ-annolot ay ni penhod Apo Jos, ja achi cha mabmapfungot ja achi cha khun meˈhohongnger. 9 Ja hay hato khu chi alloˈ hi peˈ-at hana pfinapfai nu mummeha aju. Piˈtikhaw cha hini aton cha an meˈlopfong ta achi cha ma-arti an mun-usar hana nun-angina ja napfalitu-an an ar-arkos chi achor ja pfuuˈ ja lopfong, ta paˈpa-atigkhan kan kaykhu chi tatakhu chicha. 10 Achi maphod hini amat heto, ti hay maphod hi ahaphapitan ja hini mapmaphod an khun aton chi oha an pfupfai an mangali hi un namati ay Apo Jos. 11 Hana pfinapfai ja khomegkhenong cha nu gway khun muntudtuchu ay ni Hapit Apo Jos ta ekhongahan cha ja lihpituwon cha hini khun muntuchu. 12 Achiˈ ipalubos an ngongohmolon hana pfinapfai hay hana linala-e ta chicha agkhu chi manuchugwan ja mangepadchong ay chicha. Khomenong cha koma ta munchongor cha. 13 Ti chin nangephochan Apo Jos hi takhu ja hi Adam chi nahhun an enephod na ja unot hi Eva. 14 Ja pfu-un hi Adam chi nahhun an na-allilaw an chin pfupfai an hi Eba, an hijay nahhun an pfimmahor ay Apo Jos. 15 Hitay chi khapo na an khun malikhatan hana pfinapfai ay ni i cha tumuˈkhungan, muti miˈtakhu cha chamchama ay Apo Jos hi ma-id chi pogpogna nu pa-ennongan cha an miˈtakhu hi magpong ta magwachaan cha hi pammati ja pamhod hi ibpfah takhu, ja maphod an amin chi peˈ-at cha.