3
Chin nangarjan Paul hi ekalalakhan cha hija
1 Hotti tayya, a-akhi, an hay podhon mi hi allon ja mahapor mi hini kalalag ju, ta khagkhaju an chom-or hana munchongor ay ni hapit Apo Jos an khun mi itudtuchu, ja apfuluton cha an amat ay ni enat ju hina ad Tesalonika. 2 Ekalalag ju khu ta hi Apo Jos ja haniyan chaˈmi hay hana achi matukhun an tatakhu an napukhit chi ugali cha. Ti achi an amin chi tatakhu ja gway pammati cha. 3 Muti anong un amat heto ja hi Apo Jos ja mapagtarkan hot papfi-ahon chita-o ja haniyan chita-o hay hana napukhit an aton Satanas. 4 Ja khapo hi neˈ-oh-ohhaan ta-o ay Apo Hesus ja munchomoˈ ami an khun ju unuchon hana inali mi an aton ju, ja etortoloy ju an khun aton. 5 Hay ekalalag mi ja tulungan chaˈju ay Apo Jos ta ma-ug-ugman hini anila ju ay ni omaˈ-atan ni pamhod na ja hini aton ju an manganuhan hi likhat, an amat ay ni enat Kristo.
Hay nitukhun hana nahachot
6 A-akhi, chaˈmi an hennag Apo ta-o an hi Hesu Kristo, ja tayya an allon mi ay chaˈju hi achi aju mimidchum hana ibpfa ju an namati an nahachot an muntamu hi anun cha, ti pfu-un hitay chi intukhun mi ay chaˈju. 7 Ja anila ju mit chin enat mi hi nihihinnaan mi ay chaˈju an agkhuy ami himmachot. Hotti hitay koma chi peˈ-at ju. 8 Pfinajachan mi an amin hini inchat ju an inan mi. Ja inhihi-ar mi an i neˈpfoˈla hi a-arkhagwan ja anong un lapfi, ta achi aju malikhatan an mamangan ay chaˈmi. 9 Ti chaˈju koma chi mamangan ay chaˈmi an khun mangtudtuchu ay ni hapit Apo Jos muti agkhuy ami enehchor ay chaˈju ta gway aton mi an mangpatikhaw ay ni maphod an unuchon ju. 10 Ti hitay chi inali-ali mi chin agawwachaan mi ay chaˈju, an hini nahachot an i muntamu ja achi mangan. 11 Ja tayya an ipiggwa mi an mangali ay chaˈju, ti chengngor mi an nahachot hana uchumna ay chaˈju an i muntamu. Ingnganuy cha an i muntamu ja enchagkha cha khu an i tomaktak hay hana tamun chi uchumna. 12 Hotti hay paˈpa-allon mi hay hato an nahachot ja hay podhon Apo ta-o an hi Hesu Kristo ja pa-ennongan cha an muntamu ta gway pangalan cha hi mahapor cha. 13 Ja chaˈju khu an a-akhi, achi aju humikha an mangat hana maphod.
14 Unchani ja gway achi mangat ay tay inali mi ay tay tulaˈ. Ja tikhan ju ta achi aju midchum ay chicha ta gway aton cha an pfuma-in. 15 Muti achi ju ipfilang chicha hi pfuhur ta un ju gwot ihingar ja tinukhun ju chicha an amat hi akhi ju.
Hay kalalag Paul hay hachi eTesalonika
16 Hi adniˈ Apo Hesu Kristo chi mangchat hi malenong an piˈtakhuwan ju an amin hi timpo, anong un nga chah chi hay amatana, ti hijay arpugwan chi lenong. Hi Hesu Kristo chi magwacha ay chaˈju an amin.