2 TESALONIKA
1
Chin punhugijan Hesu Kristo hi tatakhu chin pumpfangngachana
1 Ha-in an hi Paul, ja hato numpun-ibpfaˈ an hi Silas ja hi Timoti, tayya an muntulaˈ ami khu ay chaˈju an khun ma-am-amamung an mummeha hina ad Tesalonika an namati ay Apo Jos an Ama ta-o ja ay Apo ta-o an hi Hesu Kristo. 2 Hi Jos Ama ja hi Apo Hesu Kristo chi mangkhohkhohan ay chaˈju ja mangchat hi pomhochan chi piˈtakhuwan ju.
3 Mahapor an etortoloy mi an khun munyaman ay Apo Jos khapo ay chaˈju an a-akhi. Maphod hitay hi khun mi aton, ti niya an khun pompomhod hini pammati ju ja hini aton ju an mumpepennohhochan. 4 Hijaot un chaˈju chi khun mi padayawon nu munhahapit ami hana uchumna an namati ay Apo Jos, ti agkhuy ju enenghay hini pammati ju, an anong un cho-or hana pfumuhur ay chaˈju ja hana likhat ju.
5 Hitay an panganuhan ju hi punlikhatan ja hijay pangtikhan an magpong hini aton Apo Jos an munhugwi. Ti mapalikhatan aju khapo hi nangunuchan ju ay Apo Jos, hot ipfilang chaˈju ay hija an midchum ay ni Pun-ap-apugwana. 6 Ja hi Apo Jos ja magpong an hugwi, hotti palikhatona hana mamarpalikhat ay chaˈju, 7 ja mapogpog chi i ju punlikhatan ja amat hina khu ay chaˈmi. Ma-at hay hato chin pumpfangngachan Apo Hesus an marpu ad langit, ja mitnud hana napfagto an angher na. Ja midchum han khun mungkhelab an apoy 8 an pangdusa na hana agkhuy nanginnila ay Apo Jos ja agkhuy niˈ-unud ay ni Ebanghelyon Apo Hesus. 9 Madusa cha hi ma-id chi pogpog na ja mi-achawwi cha ay Apo Hesus hotti achi cha tikhan hini apfalinana an ma-id chi ipadchungana. 10 Ay tay an pumpfangngachana ja ma-ipapfagpfagto hija khapo hi nanakhuwana hana tatakhu na. Ja mipfilang aju hi tatakhu na, ti namati aju hana intudtuchu mi ay chaˈju. 11 Hijaot un mi khun eka-ekalalag ta matulungan aju an miˈtakhu an meˈ-annolot ay ni podhon Apo Jos an nangajakhan ay chita-o. Ja khun mi khu epfokha ta magwachaan aju hi apfalinan Apo Jos an mangat an amin hana maphod an nenomnom ju an aton khapo hi pammati ju. 12 Hitay chi kalalag mi ta hini piˈtakhuwan ju ja mangchat hi ipapfagtuwan Hesus an Apo ta-o, ja ta ipapfagpfagto chaˈju khu ay hija, khapo ay ni khohkhoh Apo Jos ja hi Apo ta-o an hi Hesu Kristo.