3
1,2 Ja khapo ta achi medpor chin ingoho mi ay chaˈju ja nunhahappitanan mi ay cha Timoti ta hija mah niˈ chi immali an nanggwangar ay chaˈju, ti tan nuntaynan ami heto ad Atenas. Hi Timoti ja oha an akhi mi an khun mangitamtamu ay Apo Jos an khun muntudtuchu ay ni Ebanghelyon Hesu Kristo. Hennag mi hija an immali hina an manukhun ay chaˈju ja mangpapfi-ah ay ni pammati ju 3 ta mapfalin ju an hodlon hay hana umali an apalikhatan ju hina. Ti anila ta-o an amat hina chi i ta-o piˈtakhuwan ay Kristo. 4 Chin nidchuman mi ay chaˈju ja ina-alli mi an gway umali hi likhat ta-o an namati. Ja anila ju an hijah tay tatagwa hini na-at. 5 Hijaot un u hennag hi Timoti, ta annilaoˈ hini emmaˈ-atan ni pammati ju ti ma-id eke-ekejana hi punnomnomaˈ. Ti unchani ja natopngan aju ay Satanas ja na-apfak aju, ja ma-id inherpfin ni pfinlay mi an nuntudtuchu ay chaˈju.
6 Ja tayya an numpfangngad hi Timoti an narpu hina gwachaan ju ja mun-an-anla ami ay tay impa-innila na an intortoloy ju hini pammati ja pamhod ju ay Apo Jos. Ja inali na khu an mun-an-anla aju nu nonomnomon chaˈmi, ja immingoho aju anu an amat khu ay chaˈmi. 7 Hotti tayya an anong un cho-or hato khun mi hortapon an apalikhatan, ja mun-an-anla ami chamchama khapo ay ni hemmeˈnad an pammati ju. 8 Ja maphod hi punleˈnaan mi, ti anila mi an nehamad hini aton ju an miˈ-unud ay Apo Jos. 9 Achi ami humikha an munyaman ay Apo Jos ay ni pangkalalakhan mi ay chaˈju, ti otong chi pun-an-anlaan mi khapo ay ni pammati ju. 10 Ja ipapati mi an mungkamungkalalag ay Apo Jos ta gway aton mi an umali an manggwangar ay chaˈju, ta ipapfi-ah mi hini pammati ju, ja ituchu mi hana agkhuy ju pay anila.
11 Hay khun u ekalalag ja hi adniˈ Apo Jos an Ama ta-o ja hi Apo ta-o an hi Hesus chi tomolong ta ma-id homalegwa hi umaliyan mi ay chaˈju. 12 Ja epa-ot-ottong adniˈ Apo Jos hini pamhod ju ta mumpepennohhochan aju ja podhon ju khu an amin chi tatakhu, an amat ay ni pamhod mi ay chaˈju. 13 Hot hi Apo Hesus chi mangpaptoˈ ay ni piˈtakhuwan ju ta ma-id apahigwan ju ta magpong aju hi pannig Apo Jos an Ama ta-o chin pumpfangngachan Apo Hesus ja hana tatakhu na.