13
Hay angonoh chi nuntukhunan Paul hana eKorinto
1 Me-atlo hitay an umaliyaˈ an panggwangalan ay chaˈju. Ja unchani ja gway iliput ju an pfimmahulan chi oha an ibpfa ju an namati, ja unuchon ta-o chin impatulaˈ Apo Jos hi nangarjana hi, “Nu gway mangchalom hi padchung na an takhu ja mahapor an gway chugwa, ja achi ayya ja tolo an mun-oh-ohha an muntihtikhu an umannung hini ipapfahor na.”a 2 Chin me-aggwa hi immaliyaˈ hina ja ina-alliˈ hana pfimmahor an dusaoˈ an dusaon chicha hi pumpfangngachaˈ nu achi cha chuˈkhon hana pfahor cha. Ja amat hina khu nu gway uchumna an pfimmahor. Ni-a-achawwiyaˈ muti tayya an alloˈ khu ad ugwani 3 hi dusaoˈ chicha ta pangtikhan ju an umannung an hi Kristo chi khun mangtuchu ay tay khun u allon. Ma-id pungkuchangan ni apfalinan Kristo hotti matikhaw ju hini otong an apfalinana an mangdusa hi tatakhu an gway pfahor na. 4 Chin natajan Kristo hichi kros ja amat hi ma-id apfalinana. Muti nummahu ja matattakhu an nagwachaan hi apfalinan Apo Jos. Ja chaˈmi khu, ja ma-id apfalinan mi an amat ay Kristo an nidchuman mi. Muti anong ja miˈtakhu ami ay Kristo ad ugwani, ja gwa ay chaˈmi hini apfalinan Apo Jos, ja hijay ipatikhaw mi hi un ami umali an mangdusa ay chaˈju.
5 Chaˈjuy managjagpaw ay ni khun ju aton ta annilaon ju nu umannung hini pammati ju. Toptopngan ju hini pammati ju. Nahamad koma an hi Kristo ja gwa ay chaˈju, ti ma-id ayya ja hijay panginnilaan ay ni agkhuy namati ay hija. 6 Ja hay penhod u ja annilaon ju khu an umannung an apostol chaˈmi ay Kristo. 7 Khun mi ekalalag ay Apo Jos ta achi ju aton chi napukhit. Ti ma-id niˈ chi hay nomnom u hi, anong kay ja enat juy napukhit ta gway pangkha-ichaˈ an humingar ay chaˈju, ta pangtikhan ju ay ni apfalinaˈ an apostol Kristo. Anong kay ja ma-id tikhan ju hi apfalinaˈ hu-unot niˈ magpong hini piˈtakhuwan ju. 8 Pfu-un tamu mi chi manalegwa hay hana miˈ-unud ay ni umannung an tudtuchu, ti un ami gwot tomolong ay ni piˈ-unuchan cha ay ni umannung. 9 Mun-an-anla ami hu-un omot-ottong hini pammati ju ta achi khahin un mi ipatikhaw hini apfalinan mi khapuh huminglan mi ay chaˈju. Hijaot un mi khun ekalalag ay Apo Jos ta pompomhod hini peˈ-at ju.
10 Hotti tayya an intulaˈ u an amin hato an gawwachaaˈ pay heto, ta immaliyaˈ ayya adniˈ hina ja achi khahin un u ipatikhaw chi hay apfalinaˈ an mumpanghingar ay chaˈju. Hini nangchatan Apo Hesus ay tay an apfalinaˈ ja ta papfi-ahoˈ chaˈju hi pammati, an pfu-un agkhu hay apaˈ-iyan ju.
11 Hotti tayya an hay me-angonoh hi alloˈ ay chaˈju an a-akhiˈ, ja epaphod ju hini ugali ju, ja chonglon ju hato an intukhun u. Mun-oh-ohha aju koma hi nomnom ta malenong hini piˈtakhuwan ju. Hot hi Apo Jos an arpugwan chi pamhod ja lenong chi meˈgawwacha ay chaˈju.
12 Manghenpfopfogkha aju an mangpatikhaw hi pumpepennohhochan ju. 13 Omod aju anu hina an allon hato a-akhi ju an tatakhun Apo Jos an gwa heto.
14 Hini adniˈ khohkhoh Apo Hesu Kristo ja hini pamhod Apo Jos ja hini itataˈ-ichilan chi Espiritu Santo chi munchochodcha ay chaˈju.