2 KORINTO
1
1 Ha-in hi Paul an numpfalin hi apostol Kristo Hesus, ti hitay chi penhod Apo Jos. Hitay nun-i-ibpfaˈ heto ja hi akhi ta-o an hi Timoti. Tayya an muntulaˈ ami ay chaˈju an tatakhun Apo Jos an khun ma-am-amamung an mummeha hina ad Korinto, ja ay chaˈju khu an amin an gwahna ad provincian chi Akaya.
2 Hi Apo Jos an Ama ta-o ja hi Apo Hesu Kristo chi mangkhohkhohan ay chaˈju ja mangchat hi pomhochan chi piˈtakhuwan ju.
Hi Apo Jos chi tomolong hi un ta-o malikhatan
3 Edaydayaw ta-o hi Apo Jos an hijay Jos ja Aman Hesu Kristo an Apo ta-o. Hitay Ama ta-o ja otong chi khohkhoh na ja hijay khun arpugwan an amin chi tolong. 4 Ja tulungan chita-o an amin hi i ta-o punlikhatan, ta gway aton ta-o an tomolong khuh hana i-ibpfa ta-o hi un cha malikhatan an amat ay ni khun aton Apo Jos an tomolong ay chita-o. 5 Ti anong un nunheglay punlikhatan ta-o an omaˈ-at chin nunlikhatan Kristo, ja en-ar-ala na an otong hini tolong Apo Jos ay chita-o an neˈ-oh-ohha ay Kristo. 6 Hotti anong khu ja cho-or hay hato horhortapon mi an likhat hu-un aju gwot matulungan ta miˈtakhu aju ay Apo Jos. Ja khapo ta khun chaˈmi tulungan ay Apo Jos ja anila mi an tulungan chaˈju khu ta edpor ju hana likhat an khun ju horhortapon an amat ay chaˈmi. 7 Munchomoˈ ami ta madpor aju ti anila mi an anong un aju midchum ay chaˈmi hi likhat ja midchum aju khu ay chaˈmi an tulungan Apo Jos.
8 A-akhi, podhon mi an ipa-innila an nunlinapoh chin nunlikhatan mi chin agawwachaan mi hichi provincian chi Asia. Nunhegla chi i mi nunlikhatan, hotti hay anila mi ja un angkhaynana an achi ami miˈtakhu. 9 Ja khemhon mi un hijay atajan mi. Muti na-at hay hato an nunlikhatan mi ta achi ami munhochor ay ni apfalinan tay achor mi ta hi Apo Jos an manakhu hana nun-atoy chi punhocholan mi. 10 Ja umannung an hinalimunan chaˈmi hi gwa an atajan mi, ja anong khu hi uchum chi arkhaw. Ja munchomoˈ ami an etortoloy na an khun manalimun ay chaˈmi. 11 Hotti hay mahapor hi peˈ-at ju, ja tulungan chaˈmi hi kalalag. Hot hongpfatan Apo Jos hana cho-or an kalalag ju ta ekhohkhohan chaˈmi, hot cho-or chi munyaman ay hija.
Hini khumapo an agkhuy natoloy chin nenomnom Paul an omajan ad Korinto
12 Ja achi ami mun-okhon an muntihtikhu an ma-id oh-ohha hi anila mi hi enat mi an napukhit hi tatakhu ja om-omod ay chaˈju. Ti hi Apo Jos chi nangepadchong ay chaˈmi, hotti magpong an amin chi enat mi, ja ma-id pfinarpfalijan mi. Ja an amin hato enat mi ja agkhuy nepognad hi nomnom chi takhu, an un narpu ay ni khohkhoh Apo Jos. 13,14 Hana intulaˈ mi ay chaˈju ja ma-id chi hay inliliˈ-ud mi hi penhod mi an hapiton, ti nalaka hi pfahaon ja ma-awatan. Ja nu gway agkhuy ju pay na-awatan ja munchomo-aˈ an uchum chi arkhaw hot annilaon ju. Hot chin arkhaw an pumpfangngachan Apo Hesus ja mun-an-anla aju khapo ay chaˈmi an amat khu ay ni pun-an-anlaan mi khapo ay chaˈju.
15 Anilaˈ an immingoho aju an manikhaw ay ha-in. Hotti hay nenomnom u ja mumpiggwaaˈ an umali an manggwangar ay chaˈju ta mapiggwa aju an matulungan. 16 Chin nenomnom u an aton ja mun-agwaaˈ koma hina ay ni omajaˈ ad Macedonia. Ja ay ni pumpfangngachaˈ ja mun-agwaaˈ khu hina ta tulunganaˈ ay ni omajaˈ ad Judea. 17 Agkhuy natoloy hitay nenomnom u an aton ja unchani ja hay allon ju ja un munhempfalang chi nomnom u, muti achi. Achiˈ unuchon hini ugalin chi tatakhu heto lota, an anong un cha allon hi, Aa, muti hini gwa ay ni nomnom cha ja, Achi. 18 Achiyaˈ amat heto ti mapagtarkan hi Apo Jos ja amat hina khu ay ha-in an chin inaliˈ ja pfu-un agkha-agkhah. 19 An amat khu ay Hesu Kristo an Empfalay Apo Jos an engkaskasaba mi ay Silasa ja hi Timoti chin agawwachaan mi ay chaˈju. Achi munhempfalang hini nomnom Kristo, ti an amin hini allona ja ipa-annung na. 20 Ti an amin hana ingkarin Apo Jos ja nipa-annung khapo ay Hesus. Hijaot un ta-o apfuluton an nahamad hana ingkarin Apo Jos, hotti hijay madaydayaw. 21 Hi Apo Jos chi mangpapfi-ah ay chaˈmi, ja amat khu ay chaˈju, ta mehamad hini pammati ta-o ay Kristo, ti hijay nanghaad ay chita-o. 22 Ja inchat na hini Espiritu Santo ay chita-o an pangmatunan an chita-oy tatakhu na. Ja khapo ay tay Espiritu Santo an gawwacha ay chita-o ja munchomoˈ ta-o an ipa-annung Apo Jos an amin hana ingkari na.
23 Ja anilan Apo Jos an umannung hitay alloˈ, an agkhuy natoloy hini nenomnom u an umali an manggwangar ay chaˈju khapo ta achiˈ podhon an umali hina ad Korinto ja unaˈ humingar hay hana nangat hi napukhit. 24 Ja achi mi podhon an gway mangali hi un chaˈmi hon empagpong mi hini pammati ju, ti matikhaw an nehamad hini pammati ju. Hay penhod mi ja un ami tomolong ta machumchuman chi i ju pun-an-anlaan.