5
Hay aton chi iglesia ay ni namati an khun pfumahor
1 Gwa han chengngor u an khun cha allon hi gwa han oha ay chaˈju an khun mangat hi akhakhaˈ-ihaw, an enahagwa na han pfupfai an enahagwan khuh ama na! Anong un hana agkhuy namati ja achi cha aton chi amat heto. 2 Ja mumpa-akhaja aju agkhu, ja achi aju pay pfuma-in ja umayyong ay tay napukhit an khun maˈma-at. Mahapor an pakakon ju hinuy an lala-e ta achi midchum ay chaˈju an khun ma-am-amamung an mummeha. 3 Ti anong unaˈ mamaˈ-id ay chaˈju, ay tay nomnom u ja gawwachaaˈ hina. Hotti khapo ay tay apfalinaˈ an inchat Apo Hesus ay ha-in an pfaar na, ja hinugiˈ hinuy an takhu an pfimmahor an amat hi gawwachaaˈ ay chaˈju. 4,5 Hotti ma-amung aju ayya ja gawwa ay chaˈju hini apfalinan Apo ta-o an hi Hesus, e-agwat ju hinuy an lala-e ay Satanas ta palikhaton Satanas hini achor na ta gway atona an matitilod ja muntutuju, ta miˈtakhu hija ay nuy arkhaw an pumpfangngachan Apo Hesus. Ja piˈ-apfulut u hitay an aton ju an amat hi gawwachaaˈ ay chaˈju.
6 Manuwot niˈ nun pa-akhaja ju ja achi aju agkhu pfumaˈpfa-in ay ni napukhit an enat ni ohan ibpfa ju hina. Un ju chah agkhuy anila an hini oh-ohha an khun mangtoloy an mangat hi pfahor ja ma-alinan aju an amin, an amat ay ni it-ittang an pfinoˈpfoˈ an ipalaˈ-ukhu na hini cho-or an alena? 7 Hotti mahapor an epokhong ju chin napukhit an ugali ju an mipadchung hi pfinoˈpfoˈ, ja enat ju hana maphod an meˈ-annolot ay ni pangpfilangan Apo Jos ay chaˈju hi magpong. Mahapor an aton ju hina ta mipadchung aju hi tenapay an ma-id pfinoˈpfoˈ na an midchum ay ni pfoˈtot chi karnero an khorton chi Hudju hu-un cha meˈpfehta ay ni Pangnomnoman cha chin Nalohan chin Angher Apo Jos. Ti hi Kristo an etalaton ni pfoˈtot chi karnero ja nidaton mahpay chin natajana ta nawayawaya-an ta-o hi pfahor. 8 Hotti ay tay khun ta-o peˈpfehtaan, ja achi ta-o koma anun hay tenapay an gway pfinoˈpfoˈ na. An hay penhod u an allon ja, ay tay piˈtakhuwan ta-o an namati, ja achi ta-o koma unuchon hana napupukhit an ugali, ta un ta-o unuchon hana maphod ja umannung an ugali an agkhuy nidchuman hi napukhit.
9 Chin oha an tulaˈ u ja inaliˈ ay chaˈju hi achi aju midchum hana tatakhu an mangat hi akhakhaˈ-ihaw. 10 Muti pfu-un hana agkhuy namati chi alloˈ hi chuˈkhon ju nu aton cha hina. Ti nu podhon ju an chuˈkhon hana agkhuy namati an khun me-eloˈ hi pfu-un ahagwa cha ja hana na-amnagwan ja hana mangakaw ja hana khun mundayaw hi achi umannung an jos, ja khahin un aju makak ay tay lota. 11 Muti hay penhod u an allon hi achi ju pidchuman, ja hana khun mangali hi un cha namati ja khun cha chamchama me-eloˈ hi pfu-un ahagwa cha, wenno na-amnagwan, wenno khun mundayaw hi achi umannung an jos, wenno khun pumahiw hi ibpfa cha an takhu, wenno khun mapfutong, wenno mangakaw. Achi aju pay i meˈ-orpfong ay ni amat heto an takhu. 12,13 Ma-id kalintikhan ta-o an manugwi hana agkhuy namati, ti nangamong hi Apo Jos an manugwi ay chicha. Muti tamu ju chamchama chi manugwi hana ninidchum an khun meˈmeha ay cha'ju. Ti gwa han impatulaˈ Apo Jos hi nangarjana hi, “Aanun ju hini takhu an ninidchum ay chaˈju an khun mangat hi napukhit.”a