15
Nomnomon ta-o hini aphochan ni ibpfa an takhu
1 Chita-o an nehemad chi pammati na ja anuhan ta-o hana pungkulangan hana agkhuy hemmeˈnad chi pammati na, ja pfu-un hitay achor ja angkhay chi khun ta-o nomnomon, 2 ta un oha-ohanna hon enat nay aphochan hay hana ibpfa an tatakhu ta pfumi-ah cha hi pammati. 3 Ti hi Kristo, chin agawwachaana heto lota, ja pfu-un hini penhod ni achor na chi nomnomnomona, ti inunud na hi Ama na. An amat ay tay impatulaˈ Apo Jos hi nangarjana hi, “Chin namahigwan chi tatakhu ay he-a, Apo Jos, ja nidchumaˈ an napahiw.”a 4 Ja an amin hana impatulaˈ Apo Jos chin nahop ja nitulaˈ ta gway pun-achalan ta-o. Hot hitay Hapit Apo Jos ja papfi-ahonay nomnom ta anuhan ta-o an hahadchon hana maphod an inalin Apo Jos an ichat na hi uchum chi arkhaw.
5 Hi adniˈ Apo Jos an arpugwan chi anuh ja pfi-ah chi nomnom chi tomolong ta gway pun-oh-ohhaan ju, ti hitay chin impatikhaw Hesu Kristo. 6 Hot mun-oh-ohha aju an mundayaw ay Apo Jos an Jos ja Aman Hesu Kristo an Apo ta-o.
7 Manghin-a-apfulut aju an amat ay ni enat Kristo an nangapfulut ay chita-o ta ma-idayaw hi Apo Jos. 8 Achi ta-o alichuwan an hi Kristo ja immali ta tulungana hana Hudju ta ipatikhaw na an umannung hi Apo Jos. Ti impa-annung na hachi inali na hachi a-ammod cha chin nahop. 9 Hay khu oha hi in-aliyana ja ta hachi Hentil ja dayawon cha hi Apo Jos khapo ta ninignikha na chicha. Hitay chi hapiton tay impatulaˈ Apo Jos hi nangarjana hi,
“Midchumaˈ hana Hentil an mundayaw ay he-a, Apo Jos,
Ja ekantaˈ hana pundayaw u ay he-a.”b
10 Ja gwa khu han impatulaˈ na hi nangarjana hi,
“Chaˈju an Hentil, meˈ-an-anla aju hay hana pinilin Apo Jos an tatakhu na.”c
11 Ja gwa khu han oha an allona hi,
“An amin aju an Hentil, dayawon ju hi Apo Jos,
Ja an amin aju an tatakhu, ja meˈdayaw aju.”d
12 Ja gwa khu han intulaˈ profeta Isaiah hi nangarjana hi,
“Gwacha han marpu ay ni holag Jesse
An ipapfagton Apo Jos ta hijay mangpaptoˈ hana Hentil,
Ja hija chi pangehcholan cha.”e
13 Hi Apo Jos an khun ta-o pangehcholan chi mangchat hi an-anla ja lenong ay chaˈju an namati ay hija, ta khapo ay ni apfalinan ni Espiritu Santo ja mehamhamad pay chi i ju pangehcholan hana inalin Apo Jos.
Hini tamu an impulang Apo Jos ay Paul
14 A-akhi, achiyaˈ munharhalinchugwa an umannung an maphod hini ugali ju. Ja ma-awatan ju hi ohto hini omaˈ-atan tay pammati ta-o ja anila ju an manghintitinnukhun. 15 Muti anong ja tayya an nun-aliˈ ay tay tulaˈ u hana uchumna hi achiˈ penhod hi alichuwan ju. Ja hini kalintikhaˈ an mangat heto ja narpu ay Apo Jos an nangkhohkhohan ay ha-in. 16 Hijay nangehaad ay ha-in ta munserbiyaˈ ay Kristo Hesus ay tay khun u puntudtuchugwan ay chaˈju an Hentil. Ti khun u ekasaba hitay Ebanghelyo ay chaˈju, ja omataˈ hi pachi an mangdaton ay chaˈju ay Apo Jos ta maka-ay-ayu aju ay hija khapo ay ni tamun ni Espiritu Santo ay chaˈju an tatakhu na.
17 Khapo hi neˈ-oh-ohhaaˈ ay Kristo Hesus ja mun-an-anlaaˈ an mangpa-innila hay hato an enat u an tamun Apo Jos. 18 Ma-id uchumna hi ujaˈ hapiton nu pfu-un hato enat Hesu Kristo ta niˈ-unud hana Hentil khapo hana tinnig cha an enat u ja hana chengngor cha an intuchuˈ. 19 Ti cho-or hana enat u an milagro ja hana achi kayan chi takhu an aton khapo ay ni apfalinan ni Espiritu Santo an gwa ay ha-in. Hotti nete-a ad Jerusalem ja ingkhana ad Ilirikum ja enlawlalawlaw u an nangkaskasaba ay tay Ebanghelyon Hesu Kristo. 20 Ti hini podhoˈ an aton ja umujaˈ hana pfuglay hana agkhuy nanginnila ay Kristo ta hichi ujaˈ pangaskasabaan ay tay Ebanghelyo. Ti pfu-un tamuˈ chi i megtap hi ente-an chi uchumna an mangaskasaba. 21 Hitay an khun u aton ja meˈ-annolot ay tay nitulaˈ ay ni Hapit Apo Jos hi nangarjana hi,
“Hana agkhuy natudtuchugwan ay ni omaˈ-atana, ja mitudtuchugwan to ta ma-innila cha,
Ja hana agkhuy nangnangngor ay ni omaˈ-atana, ja chonglon chan to ta ma-awatan cha.”f
Penhod Paul an i omegwangar ad Rome
22 Hijaot unaˈ mahalehalegwa an umali hina achaan ju. 23 Muti ad ugwani ja tan nakhibpfoh hitay tamuˈ, ti angkhaynana an ma-id pay uchumna hi omajaˈ heto. Ja napfajag an penpenhod u an umali hina an miˈ-in-innila ay chaˈju. 24 Hotti hay nenomnom u ja umalijaˈ pay hina achaan ju chin omajaˈ ad Spain. Ja mapfalin an mumpatolongaˈ ay chaˈju hay hana mahapor u ta etoloy u an umuy ad Spain. Muti mihinaaˈ pay ay chaˈju hi athichi hi arkhaw ta mun-an-anla ta-o an munchichittum. 25 Muti achiˈ pay epacheh ad ugwani, ti tan umujaˈ ad Jerusalem ta ijuy u han metolong hana tatakhun Apo Jos hichi. 26 Ti tayya agkhu niˈ an hay hana namati ad Macedonia ja ad Greece ja nun-amung cha hi pelaˈ ta gway i-uy hi metolong hana napubli an tatakhun Apo Jos hichi. 27 Anong un cha Hentil ja un chicha ja nenomnom cha an tomolong hay hachi Hudju an namati. Amat heto tugwali aton cha ti nomnomon cha hini utang cha hana namati an Hudju. Ti khapuh nangaskasabaan hana Hudju ja nidchum cha an nangala hana na-ispirituwan an bindisyon Apo Jos hay hachi Hudju. Hotti ad ugwani an khun malikhatan hana Hudju ja mahapor an tomolong cha khu ay chicha. 28 Hotti nakhibpfoh ayya an inchat u hitay inamung an pihu ay chicha ja epacheh u an umuy ad Spain ja agwuˈ hina gwachaan ju. 29 Ja anilaˈ an, ay ni panggwaaˈ hina, ja munnaud chi i ta-o pun-an-anlaan khapo hana cho-or an pammindisyon Kristo ay chita-o.
30 A-akhi, hay itugtukhaˈ an epfokha ay chaˈju ja tulunganaˈ ta ipapati ju adniˈ an khun mangekalalakhan ay ha-in khapo ta tatakhu chita-o ay Apo Hesu Kristo, ja khapo ay ni pamhod ta-o hi oha-ohanna an narpu ay ni Espiritun Apo Jos. 31 Ekalalag ju ta haniyanaˈ adniˈ ay Apo Jos ta ma-id chi hay napukhit hi aton hay hana agkhuy namati ad Judea ay ha-in. Ja ekalalag ju khu ta hana Hudju an tatakhun Apo Jos ad Jerusalem ja mun-an-anla cha an mangagwat hay hato ijuy u. 32 Hay hato chi ekalalag ta-o ta nu apfuluton Apo Jos ja umaliyaˈ hina an magwachaan hi an-anla, hot munnaud an pfumi-ah hitay nomnom u ay ni umaliyaˈ an punggwangwalan ay chaˈju. 33 Hi Apo Jos an khun mangpaphod hi piˈtakhuwan chi gawwa ay chaˈju an amin. Amen.